سؤال وابي ااجابه يالربع شافيه

[محمد الصقر]

ابي انشدكم عن اضراب القعود لامه بعضهم يقول مايصلح يجي الانتاج ماهوب طيب هل هو صحيح ذالكلام

[مشعل الشويش]

اعوذ بالله ,
لاتضرب البعير أمه , وحتى ضرابه من خواته مكروهـ ,في سنةً من السنين كان عندنا بعيرً غييثي كفو
ومن رغبتنا في انتاجه هديناه في بناته , والله ماتوفقن اللي لقحن منه اللي ماتت واللي جاء ولدها عايب واللي مات ولدها ,

,,

[سلطان الدلبحي]

خابر لي شايب في وادي الرشاء راعي مجاهيم فحله واحد والله انه اضرب امه واخواته وبناته

واشوووف في ابله حيران زانه والفحل زين يقول على مشعوفان وانتاجه طيب يـنتوبل به

با النسـبه لي مقد جاء عندي مثل ذا الحاله ولالكني شفتها عند ذا الشايب

[محمد سعود العتيبي]

اعوذ بالله ,
لاتضرب البعير أمه , وحتى ضرابه من خواته مكروهـ ,في سنةً من السنين كان عندنا بعيرً غييثي كفو
ومن رغبتنا في انتاجه هديناه في بناته , والله ماتوفقن اللي لقحن منه اللي ماتت واللي جاء ولدها عايب واللي مات ولدها ,

,,

اوافق اخوي مشعل في كل الي قاله

انا شفت بعيني نفس الحاله ذي اذا هديته في بناته يجيك الحوار غير طبيعي

كيف اذا هديته في امه

دور لك اي فحل ثاني واضربها عليه

نصيحه لوجه الله

[محمد ابو عدوة]

مرحبا اخوي محمد هذا الكلام غير صحيح ان الحوار يجي ماهو طيب هذي توافيق و لكن البدو يستكرهونه والان والحمد لله مافيه راعي حلال الا وعنده فحلين وثلاثة من سلالات مختلفه . وفيه واحد من ربعنا عنده بعير امه موجوده مع الابل وقت الضراب وعز الهياج مايقرب امه ولابعد اضربها مع انه مهدود في البل سنين لين باعه بعد ماتعدنه بناته .

[عبدالعزيز مبارك]

مرحبا اخوي محمد هذا الكلام غير صحيح ان الحوار يجي ماهو طيب هذي توافيق و لكن البدو يستكرهونه والان والحمد لله مافيه راعي حلال الا وعنده فحلين وثلاثة من سلالة مختلفه . وفيه واحد من ربعنا عنده بعير امه موجوده مع الابل وقت الضراب وعز الهياج مايقرب امه ولابعد اضربها مع انه مهدود في البل سنين لين باعه بعد ماتعدنه بناته .
أوافق كلام أخوي محمد أبوعدوه

[محمد الوهبي التميمي]

لاتهده في امه وأخواته
بغض النظر عن إنتاجه ورداءه
واعرف ناااس واجد وأهل ابل من سنين مهيب بسيطه
الفحل لاصارن بناته جذعات اعفوه من الضراب او يبيعونه
فنصيحتي للجميع الابتعاد عن هالشي والله الرزاق

[احمد بن خلف]

نعم صحيح الانتاج يجي فيه اعاقه في غالب الوقت لكن في خواته كيف مكروه هذي اول مره اسمع فيها
اني خابر لايقرب امه وبناته واما غير كذا نرجو التوضيح من الاخوه

[محمد الصقر]

الله لايهينكم يالربع وبيض الله وجيهكم ع الردود الوافيه

[فايز بن محمد]

حصل معنا بعير ضرب بناته ثنتين

وحده ذبت ولدها هبدت به والثانيه جابت قعوود سليم ويوم كبر وهو يتعوووق وعلى القصاااب على طوووول

واعرف رجال عنده فحل اوضح ضرب خمس من بناته ويوم ولداً

وهن يجيبن خمس حيران عمي مايشوفن

وسلامتك وعفاك

[خالد علي]

البدوى منول يذكر ابعيره للبيع واذا انشدوه عن سبب البيع قال ناطح بناته فالبدوى يكره ان البعير يضرب بناته

[احمد محمد سلمان]

هل صحيح اذا البعير يظرب خواته مكروه؟ اول مره اسمع بها ؟

[محمدبن رشيد الحنتوشي]

البعير يهدونه في خواته طبيعي وهاذي هي البداوه والحفاظ على السلالات
بس خوينا اللي كتب الرد اخطأ يبي يكتب بناته كتب خواته؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟ بس

[عبدالمحسن المقاطي]

الله واعلم انه مايعمرها

ما انصح في هده في بناته نهائياً

[عبدالهادي آل سلطان]

لا تخلية يقرب أمة

و أنا خابر فحل عندنا أبركت أمة لة في الليلة ويوم جا يبغي يبرك عليها

فرغت يوم سمع صوتها عرف أنها أمة وقام وخلاها

(( سبحــان الله ))

تحيــاتي

[سعد بن راشد]

عندنا واحد من الربع فحله اضرب امه وانتجت وجابت بكره البكره هذي وصل سنها جذعه لاشفتها تقول حواره او مفروده حجم صغير

[بندر الرمالي]

يالربع والله اني مستغرب من بعض كلام الربع واحترمهم واحترم كلامهم وارائهم ...

لكن الفائده من هذا الموضوع عظيمه ... والي يدلي برايه لا يدليه الا من تجربه او يعرف شخص مرت عليه الحالات ..

اما الي يعطي رايه وهو ما جرب او يعرف احد فانا اشبهه على ( العمى الي يتلمس الطريق) ....

كلنا نعرف اهل حلال هدو فحولهم ببناته وخواته والانتاج ذهب ولكن اذا رده اكثر من ثلاث مرات احرق البل وعوقها ...
ومن اهل الحلال رجلن كلنا نعرف وهو : مبلش المرزوقي الله يرحمه ..
هد البارز بخواته وامهاته وجاه الفحول النادره
نبع الجود
سهيل
برزان
وغيرها .....


وانا شخصيا اعرف رجال جاءه بعير من فحول الامير سلطان بن عبدالعزيز الله يرحمه
وهده في ابله وجاء الانتاج احلي من امهاته .. ويوم استعدت بناته للضراب هده في بناته وجاء الانتاج اطيب بواجد ...
والان ماشاءالله يبيع بيعات جدا طيبه...

هذا رائيي وتجربتي ...

[ياسر الشيباني]

من الناحية الشرعية ليس فيه شيء لان البهائم ليست من اهل التكاليف الشرعية ومن الناحيه الطبية يمكن يكون صحيحاً وهذا يعرف بالتجربه