الناقه من شهرين تبرك للجمل ولا تلقح

السلام عليكم ورحمة الله وبركاته
عندي لي ناقه تحتها بكره من العام ويوم حل وقت الضراب عزلت بكرتها عنها وأبعدتها عنها نهائيا
وأول ضراب لها كان في 25/12/1428هـ والى الآن لها شهرين يضربها الفحل ولا تلقح
والناقه سليم ولا فيها شي بيين
وش تتوقعون السبب يالربع

السلام عليكم ورحمة الله وبركاته
عندي لي ناقه تحتها بكره من العام ويوم حل وقت الضراب عزلت بكرتها عنها وأبعدتها عنها نهائيا
وأول ضراب لها كان في 25/12/1428هـ والى الآن لها شهرين يضربها الفحل ولا تلقح
والناقه سليم ولا فيها شي بيين
وش تتوقعون السبب يالربع

مادامها توّك عازل بنتها عنها يمكن في الناقة صيد شف لك خبير يقلبها ويقطع عنها وإن شاء الله بتلقح


تحياتي للجميع

مع اخوي شجاع

اخوي سلطان السلام عليكم ولرحمةالله وبركاته
الحاله الى عندك مرت على نفس الحاله العام الماضى
العلاج خل واحد خبير يقطع الصيد الى فيها وبعد التقطيع
حط ملح وبعد يومين اضربها
وان شاء الله بتلقح

مع الاخوان

مع الاخوان
شوف من يقطع الصيد

وينضف الناقه ويغسل رحمها

وتوكل على الله انا قطعت الصيد والحمدلله عشرو

وعليكم السلام ورحمة الله وبركاتة

عندي ناقة من كم شهر تبرك للجمل ولا تلقح

من شهر 10 وانا اضربها مانفع

جبت دكتور ودس عليها وعمل لها غسيل

وعطاها ابرة الاستروميت لتنشيط المبائض

وقطع الصيد وقطع الحميرا ولا فيه فائدة

ثم دسيت عليها انا وحطيت لها تمر وعويدي وملح ومره ولا نفع

وكان عندي ناقة ثانية ولدت ولا طلع سلاها وعطاني الدكتور لها ابرة تسوي تقلصات بالرحم

حتى يطلع السلا وينظف الرحم

طرت على فكره اني اعطي الناقة الى ماعشرت من الابرة

عطيتها 8 سيسي لمدة يومين كل يوم مره

واليوم الثالث وديتها للجمل وعشرت والحمد لله


بعض النياق تجي قراينها بعيد

وهذا تعرفة اذا دسيت عليها

ولازم لها ابرة التقلصات

بس احذر تكثر لها الجرعات وينقلب الرحم

هذه تجربتي والله الموفق


وانا شفت بعض الشيبان اهل الخبرة

يقطعون الصيد بعد الضراب مباشرة

ويقولون هو الافضل

والله اعلم

نعم التقطيع بعد الاظراب مباشرة ثم الملح على طول باذن الله تعشر

اخوي نواف ذكر السلا ماطلع

حسب تجربتي انه دواء السلا الي مايطلع (( المرخ )) ينقع في مويه ويدق جيدا

وبعدين تغر به الناقه ماهي الا ساعات ويطلع بإرادة الله عز وجل

هذا مجرب ,,,

والله وانا اخوك

اللقاح من الله

انا عندي ثنتين للحين ماعشرو وقطعت عنها وسويت لها كل شي

لكن مالله كتب لها

جميع الأخوة الأعزاء عذرا عن التأخر في الرد على مداخلاتكم لحدوث ظرف بسيط منعني من متابعة موضوعي

شاكرا للجميع المداخله وماقصرتوا

وعسى الله يبارك لنا ولكم في المال والحلال

وراح نحاول باللي شرتوا علينا به والله يكتب لنا ولكم اللي فيه خير

ياأخ سلطان جرب الأبرة الفرنسية حقت الهيام ماحتضرها بالعكس لأن كان عندي ناقة حايل سنتين ماخليت شيء الا سويته تنظيف ونظفت وابر واعطيت وتقطيع وقطعت الصيد لكن ماكتب لها لقاح لكن واحد اشار علي وقال عطها ابرة الهيام الفرنسية وسبحان الله بعدها لقحت الناقه والحمدلله يقولون ان الهيام يكون في الناقه ويسبب لها عدم اللقاح ولك تحياتي

السلام عليكم
انا عندي ناقة هم مثلكم عيت تعشر العام اللي فات وهالسنة عشرت مع العلم اني قطعت عنها الصيد ونظفت رحمها العام اللي زل ، وطلع فيها ام غطيه بين الشعاري كنه لسان الطير يقطعونه مثل الصيد
وعشرت ابشركم ،والتوفيق من الله سبحانه وتعالى

لتكون الناقة مصطوحة ...........................

مع الاخوان