افيدونا ياهل الخبره لاهنتوا

مساء الخير على الجميع

عندي ناقه تشتكي على مايبدو من كتفها
وإليا مشت لافتن رقبتا على جنب شوي وكن فيها شد في الكتف او اسفل الرقبه

وعلمت الدكتور فيها وقال هذي يمكن عندها احتكاك في عضمة الكتف وعطيتها ابر وصفها الدكتور
لمدة اربع ايام وبعدها كنها تشافت .. لكن بعد اسبوع رجعت لها نفس المشكله ؟؟!!!

اللي قد مرت عليه الحاله او يعرف وشهي مشكلتها يفزع لنا بالعلاج ...


تقديري ...

رد: افيدونا ياهل الخبره لاهنتوا

الله يشفيها لك بيفيدونك القروم

رد: افيدونا ياهل الخبره لاهنتوا

مرحبا يابو مشعل تفحص العين اليسرى كانها تلف رقبتها يمين والعكس صحيح .

رد: افيدونا ياهل الخبره لاهنتوا

لاهنتوا على المرور

وعيونها سلم يامحمد ابشرك

جبت لها مداوي وكواها عن القصر وأمورها في تحسن ...

رد: افيدونا ياهل الخبره لاهنتوا

لاهنتوا على المرور

وعيونها سلم يامحمد ابشرك

جبت لها مداوي وكواها عن القصر وأمورها في تحسن ...

الاخ فهد مشعل الحمد لله على شفاء ناقتك ونتمنى منك شرح تجربتك مع هذا المرض (اسبابه واعراضه وعلاجه) لتعم الفائدة وليكن في النهايه مرجع
لجميع أعضاء وزوار هذا المنتدى .

رد: افيدونا ياهل الخبره لاهنتوا

ابشر يابندر ..

بالنسبه لأسباب المرض : على كلام اللي كوى لي الناقه أن هالمرض اسمه قصر وهو شبيه بالرقاب .. وهو مجهول الاسباب ويجي بعض النياق أما من التحميل أو طيحة الناقه على رقبتها ..... أما أسباب ماأصاب الناقه عندي فأنا أعتقد أنه جاها بعد ماضربها الصبي عندي أبره في الرقبه ويمكن يكون أصاب العصب .. والله أعلم.

أما أعراضه : فهي كما شرحتها في بداية الموضوع.

وعلاجه .. هو كوي ثلاث أو اربع مطارق في قصرة الناقه (اسفل الرقبه) ..

أتمنى أكون أفدت .. واتمنى السلامه للجميع ...

رد: افيدونا ياهل الخبره لاهنتوا

لا هنت يا فـــهــد
بيض الله وجهك وجزاك الله الف خير