ياخوان من علة ترضع نفسها والا ماش خلاف

السلام عليكم

ياخوان عندي خلفة بكر وبعض المرات مااشملها وحوارها معزول بالشبك واخليها تضرب فجاج الارض وتضوي مع البل واليوم شايفها ترضع نفسها والناقة سلم

هذي الناقة وضعها طبيعي والا فيها علة ومشكورين على تعاونكم ما تعدمون الطيب

وعليكم السلام

من ناحية وضعها طبيعي نعم طبيعي طال عمرك

شملها فترة وتنسى هالطبع

وعسى الله يبارك لك فيها

طمنت قلبي ياوافي جعلك ومن خلفوك بالجنة ويبارك فيك وفي ابلك

واليوم شايفها ترضع نفسها والناقة سلم

هذي الناقة وضعها طبيعي والا فيها علة

فهمونا وش الطبخه ؟؟؟ لاتشرهون علي ترى مافهمت وشلون ترضع نفسها؟

مرحبا ياخالد

خلفة باهل والى تحينت ترضع نفسها من الوشال ولكن سبحان الله ماتعطف روحها وهذا اللي حصل معي و عقب سواتها بروحها قمت اشملها

والى ظهر السبب بطل العجب لكن السبب خافي ومتعجب منها وعساها مع الشمالة تكب الطبع ذا وانا كنت اخمن ان عندها نقص حدى العناصر وعشان كذا تبي تعوض ذا النقص بالحليب اللي ترضعه

واشكرك جزيل الشكر ياخالد

فهمونا وش الطبخه ؟؟؟ لاتشرهون علي ترى مافهمت وشلون ترضع نفسها؟

الناقة ترضع ديسها يا خالد

الناقة ترضع ديسها يا خالد

كن السالفة مشفرة وانا ما دري ياراع المجاهيم

شف ولد روق راع المغاتير حل شفرتها يطولي بعمره وعمرك

ويعطيك العافية ياطلال

تبدأ الناقة بهذا الطبع مع بداية الولادة
ثم تستمر عليه وتعود عليه

بسبب العناصر والأملاح الناقصة
الحل الشمالة المتينة كما ذكر الأخوة

أشكرك ياعزيز والله يعزك ويسعدك

وماقصرت على زود البيان

رد: ياخوان من علة ترضع نفسها والا ماش خلاف

الله يبارك فيها الشماله

رد: ياخوان من علة ترضع نفسها والا ماش خلاف

هههههههه وضعها طبيعي
زين انك شفتها بعينك
وعرفت علتها
واحد اعرفة عندة نفس مشكلتك بس ماشافوا الناقة وهي ترضع نفسها وكل ماطلعوا ولدها ماتدر وان درت ماملت ربع الطاسه والناقة خابرينها بها حليب المهم شافها السوداني بالليل صدفة وعرفوا علتها
دواها الشماله شملها مضبوط