استشارة ورأي الجميع- - عندي فحل منتج من الدرجة الأولى وبمنع الناس منه منعاً باتاً

المشاركة الأصلية كتبت بواسطة عبدالمحسن المقاطي

السلام عليكم ورحمة الله وبركاته

اخوي سالم موضوع جميل للنقاش واشكرك على مقدمته الذكيه تدل على شخص ذو عقليه كبيره
انا مراح اجاوب على الاسئلة المطروحه ولكن بحاول الدخول في صلب الموضوع بشكل مباشر
من وجهة نظري لايجوز منع البعير عن المسلمين فهذا وهبه من الله عز وجل ويجب
على صاحب البعير السماح به للمسلمين لما في ذلك من فائده ولكن يجب احترام صاحب الفحل وتقديره
وبشكل اوضح ماتضغط على صاحب البعير وطلبه فوق طاقته
مثل ما انت تبي البعير فما بالك بمالك البعير وربعه واخوانه وجماعته لهم حق فيه ايضاً فهو ملكهم
ولاهو حق تظلم بعيرك وتضره بالضراب انا اعرف اثنين من ملاك الفحول الطيبه وكلها اسنانها ثنايا وفيهم ذيبه ( هزه قويه ) ياخذ على الناقه ساعه على مايبرك فوقها
وهذي بداعي ان صاحب الفحل يقول خل المسلمين تضرب على الفحل مانيب راد احد
هنا صحيح انت مارديت احد ولكنك كسبت اثم البعير ومضرته الي حصلت
له وهذي بهيمه وفي ذمتك راح تسأل عنها يوم القيامه
قبل فتره بسيطه اتكلم مع شخص من اهل الفحول في المنطقه ولديه قعود من سلالة وحيدان الله يبارك فيه يقول العام الماضي رجل ساق على هالبعير 15 ناقه في يوم واحد يبي يضربها كلها ولا اضهرها لين البعير اضرب منها 9
وبعدها جوه اهل الحلال وقالوله انت وين محلك ووين عزبتك قال في هالموقع قريب منكم قالوله ليش ماتجيب كل يوم ناقتين وتضرب لين اتعاشر ابلك كلها ماعندنا مشكله ولكن مانبي نضر الفحل
هل يعقل هذا الكلام 15 من رجل واحد ولما شاف القعود يضرب مارحمه ( جلد مهوب جلدك جره على الشوك )انزين واذا كان الفحل مضرب في امهاته قبل يجيه هالرجال انا اشوف انه خطأ من راعي البعير قبل الرجل هذا الي ساق ضرايبه

والي يحاول ينسق مع الرعيان ويعطيهم مبالغ ويسروون له البعير في الليل للي مشغول عن بعيره
والي اذا اضرب ولقحت ناقته وجابت لها حوار زين نسبه لغير بعيرك اما قال على بعير عنده او على بعير واحد من ربعه يعني بعيرنا انتج وهذا انتاجه عندنا في المراح
والي يسوق للفحل عدد هائل في يوم واحد يبيه يضربها كلها والي يسوق ناقته مهيب ميسر ويعطرها والي يبرك ناقته لقعود غشيم وهي مهيب ميسر
ولا يخلي القعود يضربها بس علشان البعير الي عندك لياشم ريحة البعير الثاني فيها يطير فيها
انا بديت في موضوعي بصاحب البعير وقلت مايجوز انه يمنعه ومن ثما تطرقت للي يبي الضراب وتطرقت للبعض منهم وليس كلهم فمنهم الرجل الخيير الي يدعون له المسلمين بالتوفيق
حبيت اتطرق لبعض الخداع الي يسوونها اهل الحلال الي يبون الضراب لمحاولة تدارك ذلك لما فيها ضرر على البعير ولتعم الفائده لان الموضوع طرح للفائده مثل ما استفدت انا من طرح الاخوان هنا
اما الحل المناسب فهو لاضرر ولا ضرار

هد بعيرك في امهاته لين يوسم فيها واليا تعاشرت منها 10 ولا حوله فكة للمسلمين وعينك عليه بعيرك وغالي عليك وانتبه له ماحد راحم احد ترى انكانك تبي تفكه وانت منت حوله ترى اثمه مراح يجنبك في ذمتك

ولاحد نافعك لامن بعيرك تعب سولك سراء في النهار والطريقه المناسبه الي تريحك وخله لين يضرب في النهار اربع او خمس ورده لامهاته ولا اربطه وفي الليل خله للي يبي يعرض له ناقه ولا للي شاد

وحدد ثلاث ولا اربع ايام في الاسبوع او خمسه على حسب كثر الي عندك وخل الايام الباقي و خل الايام الباقيه لك ولحلالك او تعطيها لمن يعز عليك

وتسلم ياسالم واسمحولي على الاطاله

المشاركة الأصلية كتبت بواسطة بندر العفيش

تبي الأجر والعلم الطيب بين الرياجيل لا ترد احد وأكيد لها ضريبه وهي ان بعض ابلك بتقعد حايله وبترهق الفحل وتبا تنحشر انت وبلك والناس تبى العيشه من بعضها

وذا تبي على ماقلت عدم الإزعاج انت حر في مالك

اعرف واحد اذا جاء وقت الهداد شد من ديرته 150 كيلو يقول تعبت من الناس
والصراحه فيها شوي تعب على صاحب الفحل المنتج وخاصه من بعض الناس الي يجيب له انياق ويحجرها بشبك عند راعي البل وكل صبح مصبح الفحل قبل راعيه انا اشوفها قلت حياء المفروض يبعد عن الرجال شوي وذا شاف له فرصه يجيب نياقه
والبعض يخلط البل مع بعضها وطرد ماتطرد

وشكرآ اخوي محمد علي طرحك لهذا الموضوع

وادري انه مو انت المعني بهذا الموضع

الأح بندر العفيش

حياك الله وأشكرك على ردك وتوجيهاتك الموفقة والحقيقة ولا أخفي عليك المسألة لاتعنيني وأنما تعني الكثير وبعضهم أرى أسمه ضمن المنتدى وهذا هو منهجه وسياسته يمنع البعير دون حياء ولا رجاء فيما عند الله ويمنع الماعون وهذا ترفضه الفطرة السليمة وشيم الرجال الأوفياء الذين يحافظون على سمعتهم الطيبة لان من يمنع البعير بالتأكيد سيجد من الكلام الكثير وترى وجهه دون حياء.

وهناك طرق سهلة تطرق لها الكثير من الإخوة جزاهم الله خير وسوف ارد على كل منهم على حده أن شاء الله حول الطرق المناسبة لوضع آلية وتنظيم يتناسب مع الأخريين( الملقية) ويتناسب مع البعير ومن يأتي إليه من أجل الضراب .

فبعد أرى كثير الإخوة ليس هناك عذر لمن يمنع البعير وأنا شخصياً أرى منع البعير ردى من صاحبه وقلة حياء ولن يوفقه الله كغيره ممن يمنع البعير ولم يتوفق في بعيره سوى سوء الانتاج او بموت البعير وما دفعني لكتابة هذا الموضوع هو ان هناك الكثير ممن يمنع البعير وهو معنا بهذا الموقع وأراه ينتقد الناس في أمورهم ولا ينظر إلى نفسه في منع البعير والردى وقلة الحياء التي يستمتع بها دون خجل أو احترام لرجال الذين يأتون إليه من كل مكان ويرفض دون حياء ولا يبالي في سمعته عند الرجال الطيبين ولا يعلم أنه سوف يحتاج الرجال فيما بعد وهذا اعتبره عار على من يمنع البعير وأقول من هذا المنبر لمن يمنع البعير( الماعون) سود الله وجهك يامن تمنع البعير وأسال الله أن يجعلك تحتاج إلى الرجال وأن لايبارك لك في بعيرك اللهم آمين.

وأشكر جزيل الشكر على ردك وأسلوبك الرائع

وقريباً ارد على بقية الإخوة كل بما أدلى بدلوه

السلام عليكم ورحمه الله وبركاته
اخوني اول انا رديت قبل هذا الرد بس
اخوني فيه شي مهم جدا وهو قول بعض الاخون انهو لا يجوز منع البعير وهذا قول غير صحيح
لا يجوز بشرط ان لايكون بعير غيره موجود في المنطقه ولا يشترط انهو زين وكل محل يوجد بعير
ومن يقول لا يجوز افتاء بغير علم .. حبيت انصح اخوني بعدم افتاء الا بعلم
الله يوفق الجميع

اشهد بالله انه خسران الى يمنع الناس عن فحل منتج


فى واحد اعرفه معرفه شخصيه ...والله انها صحيح قصتـــه

اول فحل شراه انتج عنده وكان يمنع الناس صاب الفحل عين وارتفعت خصاه ولا عاد يضرب

وكلــه عذره لجوه الناس قال بشوف انتاج بعيري

وان طلبوه قال اشترو من القعدان

والثانى مات عنده ولا حتى انتج منه

والثالث جاله صيت فوق الخيال والكل يتناقل اسمه

من منع الناس عنه صابته عين والله معاد يدري راعيه

اهو مسند ولا حادر من المرض الى جا راعيــه

الحســد راعيــه ردي والبخل للضعوف

البعير ان منعه راعيه عن الناس صدقنى بيخسر

نصيحـــه ان كنت تبي تنصفها

......... شد بعيد ولا جايك الا الى ماهو صاد عنك ...........

شد بعيد ولا جايك الا الى ماهو صاد عنك..

اشكر اخوي على اضافة الموضوع ..
انا سمعت يا اخوان ان ابن جلمود كان يقول للي بيضربون عنده ((خلوا ابلي تعاشر وبعدين تعالوا)) انا طبعا ما ادري عن صحة الكلام بس يحاول الرجال يستنع اموره ويرتب السرا بس اهم شي ان البعير يضرب في امهاته انا اعرف احد اهل الفحول المنتجه ان بعيره ماعاد يضرب امهاته وصاير ماكنها امهاته ...بس الحل الوحيد اذا انك ماتبي الناس تتشره عليك ياطويل العمر سنع شبكك وحمل حيضانك ياطويل العمر وشد بعيد ااذا عندك مقدره ...وهذا اللي عندي ومشكورين

رقم الفتوى (11079) موضوع الفتوى النهى عن بيع عسب الفحل السؤال : س: ما حكم منع إطراق الفحل وحلب المواشي لمن يحتاج إليها والحمل عليها في سبيل الله؟ الاجابـــة : ثبت أن النبي صلى الله عليه وسلم نهى عن عسب الفحل أي بيع ضرابه، بأن يقول لا أدعه يلقح غنمك أو إبلك إلا بعشرة مثلا، لأنه غير معلوم، وهو يرجع إلى شهوته، وكذا لا يجوز منعه من النزوان على الأنثي إذا وجدت، ولو لغير مالكه فإنه إضرار به وحرمان لصاحب الأنثي، وأما حلب المواشي فصاحبها أحق بها ولا يجوز الإضرار بها بترك اللبن في ضروعها، وقد رخص للمسافر أن يحلب الماشية في المرعى إذا لم يوجد معها أحد واحتاج للبنها ولم يضر ولدها، وأما الحمل عليها فلا يجوز إلا إذا احتيج إليها في الجهاد أو كانت موقوفة على المجاهدين.

عبد الله بن عبد الرحمن الجبرين

احببت مشاركة اخواني الاعزاء في هذا الشهر الكريم في هذا المنتدى المبارك وانقل لهم فتوى شيخنا العلامه الجبرين رحمه الله واسكنه فسيح جناته في هذا الموضوع الذي يناقشه الاخوان , هذا والله الموفق @@@

الله يعينك ويوفقك يارب

من لايحصل بأول العمر طوله \\ فهو عاجزن عنها الي صار شايب
ومن خاب في أول صباه من الثنا \\ فهو لازمن في تالي العمر خايب

وذا الي اقدر اقوووله وتقبل تحياااتي
والجمااعه غنييين يرجااااال ..........

اقراء سورة الماعون

تقبل مروري

ياراعي البعير : ترى منت بحاجة من يقديك ـ البعير بعيرك ويظهر من كلامك ان مالك نيه [اتسبّله] وتبي تدري ويش العرب بيقولون عنك ـ والحكي على مايقولون [قصيرة نفاعه] اما رجال تبغى الاجر والجميل ولا ترد [المجوّله] ولا تعذّرت وعييت ، وهذا حلالك وانت حر فيه ... لكن احسب حسابك ان السنت العرب بتغدي في جنبك مثل المناشير ، وفيها سلامتك وعفاك00

أنا مع فكرة تقنين الضراب بحيث لا يتعدى 3 ساعات يوميا
والله اعلم

السلام عليكم ورحمة الله وبركاته

الربع ماقصرو في الرد على الموضوع وانا احب ازيد

على هذا الموضوع ببيت شعر

لحبيب العازمي في محاوره مع سعود الزعبي

الطيب اللي تطيب الناس من طيبه +++++++ ولا الدري لو خدم ربعه يفشلها

المشاركة الأصلية كتبت بواسطة سالم ال محمد

استشارة ورأي الجميع- - عندي فحل منتج من الدرجة الأولى وبمنع الناس منه منعاً باتاً ولن أسمح لأي شخص يضرب به نهائي


والأسباب كا التالي:

1- ما أريد أحد يزعجني في وقت الضراب
2- اريد ابلي تلقح على بعيري وبدون مضايقات ولا ازعاج
3- لا اريد أحد ينافسني في المستقبل بإنتاج بعيري على أبل اطيب من أبلي
4- ما أريد اتعب بعيري على حلال الناس وتتعب عراقيبه ويضعف اضرابه
5- يمكن يشين طبع العبير بسبب الملقية اللي مايحنون البعير همهم لقاح وبس


السؤال الأول هل علي أثم في هذا الشئ وهل فيه دليل شرعي يثبت ذلك

السؤال الثاني هل يلحقني ملام الرجال وتشوفون لهم حق يسبوني في المجالس وأستحق هذا الشئ لاني منعت الناس من الضراب على بعيري اللي هو ملكي

السؤال الثالث ماهو الحل في نظركم وهل هناك طرق ترونها مناسبة افتك من خلالها من اللسنة وعيون الرياجيل واتجاوز الاثم إذا كان فيه أثم!!!

في أنتظار أرائكم واستشاراتكم وبكل مصداقية وإنصاح

اولا الله لا يهينك على الموضوع
وثانيا الرجال اللي فيه خير يتعب حاله وماله يبي قولة ونعم الى جاء ذكره في المجالس ويبي يرفع سمعة حمولته كلها باللي يقدر مهما كان متعب ومكلف
والبعير المنتج الطيب هو الان من اقوى اسباب اختبار معدن الرجال ويبين الرجال وشهو من لحيه اما ونعم على كل لسان ولا لحقه الحكي في المجالس ولا حتى يقدر ابن عمه القريب يرد على اللي يسب الا بدوار العذار الغير مقنعه او محاولة تغيير الموضوع او القيام من المجلس

البعير الطيب وحده من ثنتين اما نعمه ولا نقمه

1/ نعمه للرجال اللي فيه خير والله معطيه سعة الصدر وحب العلوم الطيبه ومقابل الرجال اللي فيهم خير وراسه مطنوخ يحب المدح نوماس وجماله ومكسب معرفة للرجال الطيبين اللي بيجونه عشان البعير

وعلى قول الشاعر

راسي يحب المدح فأنه قناده = ماني بخاطي واحد منه قناع

2/ونقمه على الرخمه اللي ماهمه مدح ولا مذمه ويحسب انه غني من العالم دايم ولا احد يعرفه الا عقب ما جاء عنده بعير طيب وبين رداه وكل ماشاف له ضيف اول ما يطري عليه انه جاي يبي بعيره وهذا عزتي لربعه القريب اللي فيهم خير من الاحراج ومن محاتاة السمعه اللي لحقها الكلام عقب بعير رفيقهم الردي

وانت ياسالم من اللي البعير الطيب نعمة عليهم

انا عندي بعير منتج وهم يضايقون الواحد
بس طلع لبعيري شهره

عافاك الله ياراعي الموضوع...
الموضوع أشبع على قولتهم طرحاً سواء في منتدانا أو في غيره من المنتديات المختصة أو في مجالس اهل الابل ولكن اللي لاحظته في هذا الطرح شيئين:
ـ الأول طلب رأي الدين في هذا الموضوع وهذا هو المفترض يعني انت يا صاحب الفعل سواء كان منع البعير أو أي فعل غيره اعرض فعلك على الشرع وتأمل هل فعلك موافق أم مخالف لشرع رب العالمين سبحانه ورأي الشرع يؤخذ من العلماء الثقات وليس وجهة نظر يبديها أي شخص , وبعدها افعل ما بدا لك ولا تلتفت للخلف وتأكد بأن رضى الناس غاية لاتدرك ومن مدحك لشيء ذمك لفقده وأنا هنا لا أؤيد ولا اعارض انما أقول ارجع لشرع رب العالمين وخذ ماتجده فيه بشرط أن لا تأخذ االفتوى إلا من اهلها .

ـ الأمر الآخر أني لاحظت أن الاخوان المعارضين للمنع يذكرون في طرحهم معاناة صاحب الفحل ونوعيات بعض أهل الضرايب ويضعون ترتيبات معينة لتنظيم الضراب وهذا يدل على ان فيه تغير في وجهات النظر حول هذا الموضوع وأن فيه تفهم لأحوال الناس وظروفهم بينما لو طرح هذا الموضوع قبل خمس سنوات أو اكثرلرأيت التشنيع في حق صاحب البعير الذي يمنع عن بعيره ووصفه بصفات تخرجه عن محيط الرجوله بغض النظرعن اسباب منعه وهذا التغير الحاصل في الموقف بسبب بسيط وهو أن الناس عرفت أن الموضع تعدى كونه( بول بعير) إلى مسألة الضرر .

وأنا رأيي الخاص أن من يمنع بعيره بدون سبب مقنع ووجيه وبدون أن يقع عليه ضرر فهو قد جمع صفتي البخل والحسد , وأما من هو معذور في منعه فعليه أن يعتذر للناس بأسلوب محترم ويبين لهم اسباب منعه .