أنا شف بالي شوف وضحاً تتل الـذود = طفـوحٍ نظرهـا والمغاتيـر تتلاهـا
ليا روّحت وألاّ مع الصبح يوم تقـود = تبـي عشبـةٍ متعهّدتهـا بمفـلاهـا
ورى قعدةٍ سودا تتل الحبـال السـود = من الولف خطـرٍ بالقوائـم توطاهـا
لها برثعة خشمٍ خنف والسبال بـزود = ولها سيف لحيٍ زايدٍ عـن حلاياهـا
توارد ملامحها سهيفٍ عريض خـدود = تفوق الوصوف وملح ربي تغرشاهـا
عليها انتلاله جـل خلاّقهـا المعبـود = ياسبحان ربٍ بأحسن الوصف سواها
كبيرة مقاشر راس ودقاقـة العنقـود = ترافـع مقادمهـا تهـازع مقفاهـا
وروس الأذاني للأباهر تقـول سـدود = وطول ارقبتها ميـزةٍ مـن مزاياهـا
وسيعة نحر ماودك يشوفها المقـرود = ولاشافهـا راع النظـر ماتعـدّاهـا
شديد الوضاح مدعّجه زينها مشهـود = تزيد الشريطيه علـى ريـح طرياهـا
دواير وبرها في محيط السنام عقـود = عقودٍ من اللولو على الجنب محلاهـا
سنادٍ من الغارب على غاية المقصود = شناحٍ تموح الأرض مع زين ممشاها
قصيرة فقاره عمرها من اللحم مجرود = تحلف إنها حائل وهي فـأول لقاهـا
طويلٍ عريضٍ جنبها مشيهـا بسنـود = عريضٍ قصيرٍ ذيلهـا ويـن تلقاهـا
تفاهق سنامٍ فوق حجبانهـا مشـدود = عراقيبها عقـلاء تصاغـر بماطاهـا
عليها الحلق من بينهن مطرقٍ ممدود = ولاعمرها رِدت على غيـر مشهاهـا
ولدها ورى المليون يشرا وهو مفرود = وأبوهـا دفن فقر الأجاويـد وأغنـاهـا