الحياه , سراب

تدور الليال , وتبعد اصحابنا الوافين= هذا حال دنيانا / وهذي ليالينا !
عسى الله يلم الشمل ويقرّب الغالين = بعد رحلةً من غير ساحل ولامينا !
ظروف الزمان وزحمته , تبعد الحيّين = زرعنا وفانا / بس خابت مساعيناا
تعبنا نعيش أحلام , ونواصل الجافين = نعادي محبينا / ونغلي معاديناا !
تعبناا ! نعيش الشك , والظن , والتخمين = تعبنا من احداث الليالي وعانينا !
سراب الحياه , وزحمة الناس بين , وبين ! = واحاديث يرويها الزمن عن : معانينا !
عن/ السيف والنخله / عن الماء وبيت الطين = عن دموعنا / عن شوقنا / عن أمانينا !
عن / اغلا طموحً صار عنّا من المقفين = نسى ماحصل , وانكر مع الوقت ماضينا ,
بعض ذكريات / وطيب ذات / وغلا قلبين = طواها الزمان , وحزن الايام يطوينا !
يقولون , والعهده على ذمّة الراوين = وانا اقول مدري فالزمن ويش تالينا ؟!
نوايا البشر ( كرّاس ) واْقلوبهم ( تلوين ) = وعسى من نوايانا بياضً لاسامينا ,
عسى أيّامنا : فرحه , وبهجه , وقرّة عين = وعسى الحظ يكتبنا ولاعاد يمحينا !
وعسانا على طيب / ومكارم / ونصح / ودين = وعسى الله من فضله وتقواه يغنينا

الموضوع الأصلي: سراب الحياه وزحمة الناس ..) للتواصل || الكاتب: مشعل الشويش || المصدر: منتديات مزاين

المصدر: منتـديـات مــزايـن