راع الوفاء .. والطيب .. والله ما انساه = حتّى ولو قفّى .. وشدّت رحاله !

لو عن صديقه عمد قفّت .. مطاياه = مانيب عن فرقاه .. سالي .. وداله

الصاحب اللي هاجس الشعر .. لولاه = ماعنّ هاجوس القصيد .. وعناله

ولافاح صدر الشاعر .. وتاهت ارياه = ولاصبّ فنجال العتب .. وارتكاله!

القلب / من بعْده يعدّد خطاياه = والشعر من فرقاه .. مشغول باله!

وين القصيد اللي بيوته .. مبنّاه = على الوفاء .. والمعرفه .. والجزاله

صارت بيوت الشعر عقبه .. مطوّاه! = ورشا المعاني قطّعَته المحاله

وانا .. وفكري .. والقصايد .. فقدناه = وضميري اللي رفقته .. راس ماله !

وياقوّ صبر الخافق اللي ظلمناه =أنا ظلمته .. والصديق اعتزى له

انا ظلمته .. يوم عقلي تولاّه ! = وهو صار ضدّه لين ماشان حاله

غنّى على ليلاه .. والموت .. ليلاه= ومن ضيقته غنّى .. ولحدً طراله

ألاّ أنت ياللي دون سبّه .. فقدناه = مدري صدودك عمد .. وألاّ جهاله !