القلب يآبو بدر .. زادت جراحه=والهمّ:طير .. وقلب صاحبك:ملواح

يآبو بدر ضاقت عليّ المساحه=فكري غدا للضيق والهمّ مفتاح!

تعبت أدوّر لي مع الوقت .. راحه=وأليا بغيت الصدق:ما والله أرتاح !!

.. ألاّ بسجّة خاطري وانشراحه=وبعْدي عن اللي قْدرهم بالردى فاح

وأن قلت: أخذ لك بالمصايف سياحه!=في ديرةً مابين تاجر .. وفلاّح!

آقول قلبي سجّته وأرتياحه=في ديرةً مازارها كلّ سوّاح

حطّيت لي وسط النفود (استراحه)=أبرى لذودي .. دام برق الحيا .. لاح

واطلق سبوق الهمّ .. واكسر جناحه!=وأعيش وقتي بالسعاده والأفراح

مع خوّة أهل المعرفه .. والرجاحه=الكلّ منهم للصعيبات .. نطّاح

..هذي علومي لابغيت الصراحه=واقبل تحيّاتي ياكسّاب الأمداح