الأخ العزيز عبدالرحمن
صبحك الله بالخير
أضم صوتي إلى صوتك
بالنسبة لي طبقت هالكلام من فترة طويله ولكن واجهتني بعض العقبات .. وخصوصاً من ناحية الحوار.
أخي العزيز
الحوار الناهي .. مغامرة كبيرة
ممكن تنجح وممكن لا
خصوصاً إن هل البل اللي يبيعون الحيران
ما يبيعونه وهم عارفين إنه فحل ومزيون وإن باعوه
راح يبيعونه بغالي.
مع العلم بأني شريت قعودين هالسنه من أبل طيبه وغاليه
ويعلم الله إني شريتهم بغالي وهم حيران على شهرين.. وهي مغامرة وأسأل الله التوفيق.
عندي وجهة نظر قد تكون مقاربه ولوجهة نظرك.
بما أن شراء الحوار .. ممكن يكون غالي ومغامرة كبيرة ممكن تنجح وممكن لا.
أنا أشوف إن بقيمة الحوار الطيب تقدر تحطها بناقة طيبه بالإضافة إلى إبلك اللي شريتها ولنفرض على أنها تكون وسط
ودور لك على فحل ( هرش ) يكون طيب ومن سلاله معروفه ومنتج وتأخذه وانت عارف إنه منتج وشايف إنتاجه ومتأكد منه .. وإن شاء الله ما راح تلقاه غالي.. وإن كان غالي ما يهم. أقلها راح أضرب به إذا جاء وقت الضراب ولا أنتظر 4 سنين لين يكبر الحوار.
ضرب عليه وكل ما لقيت لك ناقه زينه وسعرها في حدود المعقول أشترها ونوخها للفحل اللي عندك
وبإذن الله راح تنتج من هالفحل إنتاج طيب وفي حدود الـ 4 إلى 6 سنوات
بتزين إبلك وأنت كل ما قدرت خلال سنوات الإنتاج
أعمل غربله في أبلك .. وقت البيع وأرتفاع السوق .. طلع اللي ما تبيه والفطر الكبار
وأصبر إلى مثل هالأوقات ورح طال عمرك سوق الحساء ولا الخرج وبتعين الزين وبسعر رخيص جداً.
وترا السوق هاليومين في الحساء خصوصاً طايح
والناقه اللي بـ 40 و 35 بتلقاها بـ 18 و 20.
أسأل الله أن يوفقنا جميعاً ويرزقنا من واسع فضله.
اللهم آمين __________________ اللهم إني ظلمت نفسي ظلماً كثيرا ولا يغفر الذنوب إلا انت فاغفر لي مغفرة من عندك وارحمني انك انت الغفور الرحيم |