صبحك بالخير ياسالم
أنا أجزم ان لو عندك بعير منتج ماراح اترد منه ياسالم لكن انت نقلت معاناة أهل الركاب الطيبة والي صحيح انهم متوذين أذية مايعلم فيها الا رب العالمين وفيه كلمة دارجة عند البدوان لابغيت تدعي على واحد قل جعل ياتيك فحل منتج وياتونك الناس سرى عليه
الحل ياسالم مابه حل مية بالمية ان رفعتها في شارب ون طمنتها في لحية الملامة جايتك جايتك ومرضي الناس كايد
لكن مايمنع من بعض الاحتياطات مثل الترتيب المناسب للسرى من ناحية البعير ووضرايبك وضرايب السرى يعني لازم ايكون لك ترتيب خاص فيك لايمكن لأحد انه ايتعدى عليك كائنا من كان وترتيب ايريح فيه البعير ولايمكن انه ايتغير محافظة على صحة البعير وترتيب ثالث للسرى مع الناس وهذا لابد انه ايكون بشكل متساوي حتى محد ياخذ حق أحد وهذي أنا معك راح تلقى فيها صعوبة شديدة في ترتيبها يعني بيجيك أبو ناقة وحدة وبيجيك الخوي وبيجيك ابن العم القريب والبعيد هذا من غير الطلبات وحبة خشم وحبة عين وهذي أمور محد ايصد عنها غصب على الرجال انه ايوجب لهذا ويداري خاطر هذا لكن الصبر زين ياسالم في الامور هذي
أما من ناحية من ناحية المنافسة فهذي وهايب من رب العالمين وكم من فحل مانتج عند اهله واللي هم لقو عليه جاتهم أندر البل هذي ارزاق ونصيب من رب العالمين سبحانه ايقسمها بين خلقه
وهذي ساقية ماينرد منها وأجر عند الله سبحانه والمسلم ايدور الاجر وين ماكان يمكن يدعيلك واحد من اللي ضربوا على بعيرك وتستجاب دعوته لك ولك فايز بالثنتين من جهن الضراب ومن جهن الدعوه الطيبة
أما من ناحية طبع البعير فهذي لابد انه يكون راع البعير موجود وينشد راع الناقة اللي يبي ايضربها عن الناقة وعلومها أو راعي جيد ايعرف للبل والسبب بعض الناس الله ايهديهم ايجيب المصعد واللي توها والد واللي مابعد يسرت وغيرها وغيرها
والعين ياسالم حق واللي الله كاتبه بياتي لكن الواحد ايتحرص ويتحصن بالمعوذات ويحصن حلاله من اعيون المقرد بالقرايه والادعية الصحيحة وغسال الفناجيل وغيرها
وفي الختام أرجو ياسالم إني افدتك لأني شفت بعيني وسمعت بذني كلام بعض الناس عن أهل الركاب الطيبة وسنعهم هذا ايسب وهذا يمدح وكلن يذكر ماواجه لكن ما أقول الا الله ايعين أهل الركاب الطيبة على ماجاهم
عذرا للإطالة والسلام عليكم |