عندي ثنتين شريتهن حيل مع جملة ابل وهن ازين اللي شريتهن وفيهن المشاول وما خليت عنها جبت لها دكاتره بيطره وشعبيين و ماش فايده ومن حبي لوحده منهن رحت للمصلخ وطلبت رحم فاطر وشرحته كامل وعرفت اجزاء الرحم الكلام كله ماهو على قربة الرحم اللي يغسلونها الدكاتر الكلام على قراين الناقه وهي اللي فيها اللقاح والقراين تختلف من ناقه لناقه ويلتوي اقصاه احيانا بعد ولادة الناقه وتحيل بعدها وتدس عليها وتشوفها ما فيها شي بس العقده با اخرها وهي مثل الماصوره يدخل اصبعين فيها والا اصبع احيانا والعقده سبب المشاول وهذي لقيت لها بعد سنتين تجارب وابشرك لقحن الثنتين وانتجن لا زم تطرح الناقه على جنبها الايمن وتدخل على الحافظه اليسرى وتلقاها مرتخيه وتجرها بشويش تكفا تراها ان عسرتها شديت على العقده زود واعميتها جب الرحم كله بشويش بعد ما تطرحه ويلين ثم اسحب القرينه ابتتعب يدك واجد لكن ان لقيتها جرها من وراها كنك تفسخ شراب كرمت وافركها وعصرها بشويش وغرقها زيت وتلين وابيطلع دم ووسخ كرمت ورجعها كنك معدل الشراب للداخل دف با اصابعك واسدحها يسار وادخل على اليمنى ونفس العمليه 0
والشي الثاني اللي يخليها تشاول وهو ابسط من العقده وهو ما يسمى علاقة بول البعير وعدم اتمام عملية اللقاح ويحتاج الى غرف من الناقه وتنظيف القربه وبعدها تحتاج الى ابرة جسره ثلاث مرات كل اسبوعين وهي بمثابة تنظيم وتنشيط جسرة الناقه لانها متعطله فتره ولا تضربها الفتره هذي انتبه الا بعد الابره الثالثه با اسبوعين عطها ابره رابعه وبعدها بثلاث ايام فك البعير عليها
ولا تطرحها له
اما الناقه اللي حايل ولا تشاول عندي طريقه وسهله وبتستغربون وان شالله تدعون لي وشيباني اذا استعصت مره بعد ادخالك وكشف الدكتور والتنظيف اطرحها على جنبها الايمن (الايمن )ودور بعير عليمي جذع وخلها يضربها وانتم سادحينها 0 اللهم انفع بها واجعل اجرها لي ولوالديني 0 اعتذر عن الاطاله |