اخوي نهير بارك الله فيك
للمغاتير طريقتين للتطبيع
الاولى يسمونها ابل الرحول
والثانية ابل مقهور
ابل الرحول تطبع على الرحول فقط
وابل المقهور تطبع على المقهور والمقهور = الحيران + الجمل + الرحول او الرحول والحيران
والبل تطبيعها على الرحول اما بالاكل او بالتجفيل
والثنتين مع بعض افضل
وابل المقهور تمسك حيرانها على الرحول بالمفلى وعند العزية تصك عليها بالشبك ماتفكها مع امهاتها ابد
وابل المقهور تطبع على المقهور زين بعد سنتين او ثلاث وابل المقهور افضل طبع
وابل الرحول طبعها دون شوي بس اوفر لك ماتبي الا راعي واحد
وابل المقهور لازم راعي وملحاق يعني 2
واذا الابل جديده ولفها على الرحول هذه السنة واذا تبي مقهور لازم من ولاد السنة الجاية تبدأ
من اول حوار تمسكة على الرحول واذا جاء اخوه يمشي على دربة
اما الان الحيران كبرت ويبيلها هجار وتعب
طبع الابل على الرحول بالطريقة التية
يركب الراعي على الرحول ويصيح لها ويدق اللبيد ويطعمها خبز
ثم سكر ويسحبها مسافات ويعقبها من خلف حزم او جبل ويصيح ويدق اللبيد بالنهار
ثم يسري بها بالليل اولا بالليالي المقمره ويصيح لها ويطعمها
ثم بالليالي المظلمة
والافضل يمسي معها بالخلاء ويخلي معه ملحاق وقت التدريب يتربص للبل بالطريق
اذا سرت ويجفلها حتى ترجع على الراعي
والراعي عند الرحول يهوبل ويوده للبل ويطعمها
وخل علفها كل يوم بمكان عشان ماتدله الا عن طريق الرحول
حط العلف بمكان وعلم الراعي يسحب الابل له
وكل يوم غير المكان والتوقيت
البل العصية اذا ماتطبعت اسر عليها واربط بذيلها كيس شعير
وجفل البل كلها واذا قامت خل الراعي يصيح لها ويوده
الناقة عند الخوف يطبع بقلبها كل شي تسمعه او تشوفة
طبعا افضل للتطبيع تكون بعيد عن الناس والعزب
ولاحولك حلال ابد
وبالتوفيق ان شاء الله |