وجدي وجود مخلص الديـن بالديـن=يبغى الوفاء وأصبح مـدان ٍ زيـاده
أبا أتمنى وأرفع الصـوت صوتيـن=لـو التمنـي نقـص مـدري نقـاده
الله علـى شرشـوح ذود ٍ ملاويـن=أنا أشهـد إنـه رغبتـي والسعـاده
هزع ٍ عراقيبـه ودعـج العرانيـن=رثـم ٍ مناعفهـا بيـاض وســواده
روس الوبر مثل الحلق نص دورين=وخدودها صورة مصاحـف عبـاده
وشعافهـا دور ٍ عليـهـا زمانـيـن=ورقابها تزهـى الجـرس والقـلاده
وبعيرها عنه أشكـل البـدو داريـن=معامقـه تحسـب ويحسـب هـداده
أدعج حرش لهاف برص البراجيـن=لحيه ورى الشبريـن شيـرٍ زيـاده
مانسـبـوه مسمنـيـن الطلايـيـن=ولاطب جـدر العيـر يهبـد قـراده
أقصـى مداهيلـه حثـاث ودغانيـن=وأدنـاه مابيـن الجبـل والحـمـاده
ومصيافه الطارف شمالـي حضنيـن=ومشاربه حد السهـل مـن سـواده
مع سرب زعجولٍ ليا أوحى الغياطين=تلافتـن عجـلات مامـن ركــاده
هن الفخر عزوة طـوال الذراعيـن=كم واحـدٍ ينسـى الحيـاة وجـواده
من دونهن تسلـم خـزاة الشياطيـن=لا لحـق راعيهـن صعيـبٍ عنـاده
يدجر مثل قطنان يوم أقسـم الديـن=علـى عقيـد القـوم شيـخ القيـاده
مثله وغيره فـي القبائـل شجيعيـن=في الشرق الأوسط داخله واِمتـداده
فيهم دجر مسلـط زعيـم الرباعيـن=دومـة مهـذب شالهـا فـي فـواده
عدو الدجر من دون شول ٍ ملاويـن=عـز الأميـر اللـي قديـم ٍ شـداده
ماهيب مثـل مدلبسـات الرعاميـن=زهـادة ٍ يابينـهـا مــن زهــاده
حدب الظهـور ويابسـات القحانيـن=اللـي نفسهـا لـون روح الجـراده
نفس ٍ ضعيفة مـن منـول وذلحيـن=كار العجوز اللـي عليهـا صمـاده
ماعاد أصدق مـادح الشـاه مسكيـن=طماعة الحصنـي وشـوك الكـداده
ألا ليـا قـال إقلطـوا يالمحيـيـن=وقـدم مفطحهـا سـواة الـوسـاده
ماغيرها شـيءٍ بعـده مـن الزيـن=لافتحت الصفحة شرحـت الأفـاده
تندى المناخر والمواطـي سكاكيـن=والخشم كنك داعسـه فـي رمـاده
بغيت أجي شاوي وأجاور هل الضين=وأثـر الغنـم ماغيرهـم وقــراده
تمـت بـجـاه الله رب المصلـيـن=اللي لـه التقـوى وحسـن العبـاده

الموضوع الأصلي: قصيدة في البل || الكاتب: منير البقمي || المصدر: منتديات مزاين

المصدر: منتـديـات مــزايـن