|
اطلب الشور من أهل النظر والخبره في المجاهيم السلام عليكم ورحمة الله وبركاته... اشكر ادارة المنتدى والمشرفين وكذلك الاعضاء على نجاح وتميز هذا المنتدى اللذي يخدم البدوي عند ابله او مدور البيع او الشراء او الباحث عن امور الابل كافه.. . انا ياطوال العمار ابي اجمع لي ذود. ورغبتي في المجاهيم. لاكن ويش تشيرون علي. آخذ لي ظرايب طيبه الى اقبل هداد الفحول وادور الفحل الطيب ولا آخذ ابل جمل طيبها يشيل رديها ولا وش الشور. ..تعرفون الواحد يبغى ابل تستاهل التعب والمصروف. .. ومثلكم خابر ومشكورين |
رد: اطلب الشور من أهل النظر والخبره في المجاهيم الاوله الله يحييك ويعينك على جمع المراجل لان البل مرجله وتعيبه وتعرفك على الرجال شرواك اما ان كانك بتجمع لك ذود غوالي فاول ما تبدي الفحل اللي محدد مردد هم عاد اجمع عليه كل عشرا طيبه وبكر مطيرة المنام والبكار اللي مراق ارقابهاوفاطر تعجبك نهار الورد |
رد: اطلب الشور من أهل النظر والخبره في المجاهيم مرحبا اخوي حماد الا أخذ الخلفه الطيبه اللي شايف حوارها وشايف ديدها هو سلم من العيوب وش كثر لبنها ومنها ضروبة طيبه وقت الهداد |
رد: اطلب الشور من أهل النظر والخبره في المجاهيم الاخوان سعد الذويب ومحمد ابو عدوه شوركم طيب والله لايخلينا منكم وشاكر لكم على المرور..... وننتظر باقي مشاركات الاخوان. .. ورايكم يهم جميع من يرغب في اقتناء الابل الطيبه واعتبره موضوع مميز ومتجدد لمن يهمه الامر.. |
رد: اطلب الشور من أهل النظر والخبره في المجاهيم اخوي عبدالمجيد ان شاء الله اتصل عليك في اقرب فرصه... ولاهنت |
رد: اطلب الشور من أهل النظر والخبره في المجاهيم بعد التحية اشتر العشاير اللي مشيوف ولدها وحليبها ودور ام ثاني وام ثالث |
رد: اطلب الشور من أهل النظر والخبره في المجاهيم جمع بكار من حقة وطالع واللي تفل حجاجك لاشفتها وتنق على راحتك لين تكون ذودك بنفسك والزين اللي تبية ولاتستعجل وعليك بالحراج وانحش عن الشبوك والمراح لان الحراج مايجي الا محدود على البيع والبكار ماتعلف واجد اما بالنسبة للفحل اهل الخير واجد ومسبلين فحولهم بالملايين ومعروف انتاجها ، اما لاشريت قعود يمكن ينتج ويمكن ماينتج خل عنك الفاطر والخلفة لانك بعد فترة بتبيعها وان ماقدرت تبيعها بتقول يامن شرا له من حلالة علة الله يعينك وانتبة ترى الغش موجود والحلف على الكذب موجود لكن الخير واجد وآخر نصيحة ترى المجاهيم ثقيلة في السوق ماعاد انها مثل اول عليك بالمغاتير نصيحة |
رد: اطلب الشور من أهل النظر والخبره في المجاهيم بعد التحيـة ..،، اذا عقدت الراي ونويت اما اشتر ابل جمل زينها يشيل رديها وبتطلع عليك الزين فيها بقيمه رخيصه وتريحك من المراويح واسملها وخل نقوتها عندك واستعن بالله قبل كل شيء . اما اذا كنت رجال الدراهم واجد لا والله حول على كل طيب واشتر عيون ابله وروح عشان لما تشتري وحده وحده بتكون سعرها غاليها عشانك بتتنقى .. هذي وجهة نظري والله يوفقك لما فيه خير .. |
رد: اطلب الشور من أهل النظر والخبره في المجاهيم السلام عليكم اخوي كلنا كنا مثلك وتعلمنا ونظحك علينا وتعزورنا بس الحمد لله تعلمنا نصيحتي لك اول شي الراعي اللي بعرف للبل علا كفالتك ولا جيبه عندي اعلمه لك وسنعه لين يصير علامه وبعدين الابل اشتر من مراح واحد اقل شي بداوة والفحل ابشربه لا تشتري اسنعك اذا انت في الشرقية وترا في سوق الدمام شبك فيه ابل منوت القاني ولاهي غوالي حول 12 بكره مصاغير ولقاح علا فحل طيب ولا خاويتك للحراج في الحساء ومالك الا طيبت الخاطر 0596005522 |
رد: اطلب الشور من أهل النظر والخبره في المجاهيم اول ماتشري البعير والوايت ثم عاد جمع خلفه ولقحه البكار ﻻتشريهن |
رد: اطلب الشور من أهل النظر والخبره في المجاهيم لاشريت تفريد بيغلا عليك السعر .. رايي اشتر ذود مجاهيم ويكون من منبع المجاهيم وعموقه طيبه ومن ثم اسمل منه وعدل واضف له صدر مع الصدر وبكذا تختصر مسافة سنين .. ! مع ضرورة وجود فحل طيب مع الذود .. ولابد ان ماتعتمد على فحل واحد لازم تعنى للفحول اللي تستاهل اتمنى لك التوفيق |
رد: اطلب الشور من أهل النظر والخبره في المجاهيم لاهنتوا يالربع على المرور والنصايح الطيبه ولا عدمناكم... |
رد: اطلب الشور من أهل النظر والخبره في المجاهيم مساء الخير الخير أدري أن رأئي بزعل بعض الزملاء .... الرأي فكر وفكر وفكر " ريح بالك وش لك والعناء والتعب وراح يجي يوم وتقول يا من شرى له من حلاله تعب ومطارد وحاله " وأنت صاحب القرار . . |
رد: اطلب الشور من أهل النظر والخبره في المجاهيم يامرحبا يالشرافي اذا كان المقصد ابل وعزبه ونسه فأشتر مابدالك واذا المقصد ابل طيبه بداوه وانتاج فأشتر الطيب والافضل تشتري عشاير وتتعب عند الفحول الطيبه والسنه اللي بعدها تشتري خلفات عشان ماتشتري دفعه وحده والله يوفقك لما يحب ويرضى |
رد: اطلب الشور من أهل النظر والخبره في المجاهيم نصيحه لاتنشب نفسك |
| الساعة الآن 33 : 10 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |