انا هوى بالي بكار(ن) مشاعيف=سود(ن) تثير من الخوافي خوافي
سود(ن) غرابيب(ن) تلاد(ن) مواليف=يحتار من يختار بين السهافي
على الجمل وحده جميع التواصيف=مابين هذيه وذيك اختلافي
سناد وذهان الوجيه ومشاويف=الزين منها اقبال والا مقافي
الطول راهي والغوارب قفا سيف=جرد الرقاب وفاهق الني عافي
فطس الخشوم تقول مابه غضاريف=ولحي(ن) ذراع ومسبل الوجه ضافي
روس الرماح اذانها فوق وقّيف=ومن الجمل راس وجنوب وخفافي
فج النحور اوسع من الباب للضيف=وهلّ(ن) ورى هزع العراقيب وافي
حرشا وبر داج(ن) سواد الاطاريف=عزل العقيد اللي من البعد لافي
لا هبرة(ن) مليا ولا جنبها سخيف=صوغة جمال ورق زين(ن) يشافي
مامثلها سيقت ولا مثلها شيف= الا مع الفصام والا ابن شافي
سود الجبال الشامخات المقانيف=اللي جلاها الوبل والسبل صافي
ابل العرب وام الكرم والمعاريف=لاكثرت العوان والوقت جافي
لاطاولت شهب الليالي على الحيف=مزبان اهلها فالسنين العجافي
للضيف والجيران واصحابها ريف=لا خيّلت منها المطر جاك دافي
مراجل اللي يحتمون المواقيف=اهل البخت واهل السيوف الرهافي
يرخص لها كل التعب والتكاليف=اللي ثمنها راس قرم(ن) سنافي
انشد سهل يعطيك عنها تواصيف=اليا قصر عن جرد الارقاب قافي
الكسر له حكمه وشاعر وحرّيف=فرايده سبك الذهب بالمصافي
والناس فيها اصحاب نظره وعرّيف=ولا اقول انا عرفي عن الناس كافي