|
هااااااااام للاهل المجاهيم خاصه.........؟؟لزوم الدخول... السلام عليكم ورحمة الله وبركاته.................. كيف حالكميا هل المزاين..... انا عندي سوال وهو لاهل المجاهيم خاصه..؟ويمكن يدخلون فيه اهل المغاتير............... السوال:؟ هل ولد الناقه الزرقاء زرقاء مجاهيم يفحل ؟؟؟ (( يعني يفهق فحل)) وخصوص لصارت امه طيبه بالشكل والساس.........والقعود بعدطيب شكله ولونه مجهم وابوه فحل طيب......... يعني القعود فحل وابوه فحل بس الام زرقاء وطيبه ها وش تقولون.......ياهل المجاهيم؟؟ راشد العرق..ابن صلبوخ...ابن هدفه.... الجربوعي..راشد....مبارك...وباقي الاخوان الاماحضرني اسماهم.... لحد يبخل بشوره.......... اخوكم سعد الهاجري |
ارحب ياسعد ابا اختصرها عليك ولي عوده للموضوع فيه فحل منتج سنه ثني وهدو الجماعه ابوه مكيسيران ومه زرقاء المنيه وضربت عليه خيرة ابلي وانتاجه مايبي كلام والثاني لقي جده عسران ومه حمراء مجاهيم والثالث سديس ابوه بعير بدن الصخابره ومه زرقاء ابوها اشقح ومها مجهم ومايمنع في وجهت نظري اذا سار الفحل ابوه طيب وامه طيبه وان كان لونها زرقاء ولاكن الافضل ان يكون امه وابه مجاهيم ويكفي ان مهيلة الزرقاء حوارة صالح بن لشول الجابر في مزاين الهادي ابن زايد اخذت الاول في شوط الضيوف وكذلك مشهور الغنيه عن التعريف لزميل العزيز محمد ابن هدفه ومعى ذلك الزرق لايمكن ان تجد منها رعيه كامله هذا ما احبت ان اشارك به وكما ذكرت لي عوده على الموضوع ان شاء الله |
ارحب يابن عبيد ابي ارد على الموضوع اذاكان القعود طالع على ابوه بمعنى جاذبه ابوه مجهم هذا زين اما اذاجذبته امه يعني طلع ازرق في وجهت نضري موهب زين بس مايمنع انه فحل وشكله زين بس ودك الفحل يكون مجهم ازين علشان الانتاج يجي مجهم ومثل ماقال اخوي راشد اذاكان الابو مجهم والام مجهم يطلع انتاج مجهم وهذي وجهت نضر وكل واحد له وجهت نضر يعطيك العافيه على هاذا الموضوع وبيض الله وجهك ولاهنت |
البعير يفحل بغض النظر عن لونه الشكل والاصل هي الركيزه الاساسيه للتفحيل |
ارحب يابن عبيد باختصار اذا كان اساس مجهم فلا مانع جميع الوان المجاهيم فحلوعيالها فيهاء الحمر والصفر و الزرق وسود مثلها مثل المغاتير ـــــــــــــــــــــــــــ الشعل والشقح والصفر فحلها واحد وجيب هاذي وجيب هاذي |
وعليكم السلام ورحمة الله وبركاته انا مانا بفاهقه فحل ولا انا بمضرب بولد زرقاء ولوان بعض الزرق من ساس ابل اصلها مافيه كلام مثل الزرقاء اللي راشد المري اضرب بولدها زرقا من اصل ابل المره وانتاج ولدها شفته ولافيه كلام مجهم وانتاجه ماجا فيه ازرق الا اذا في الطريق شي لكن انا طاق من اللي قلب لونها من لون اماتها لا يجي في مراحي والعرق دساس وانا في حساسيه من الزرق ولو نرجع للماضي القريب وقت ابائنا لقينا الزقاء عندهم ارخص حلالهم ولا تلقا في مراح الرجال من الزرق الابنت ناقته الغاليه ورث ابيه وجده اللي كسرت واضربها بركبي ابله ذال عليها من الحيال وجات ببكره ولا خلاه غلا امها يبيعها ولو انها جات بقعود باعه قدام يفرد واضربها كسوب ولكن عقب المزاينات ماعاد فكروا في اللون وصار تركيزهم على الشكل والقيمه واللي يجيب القيمه الغاليه والناموس في المزاينات هو الغالي وهو ابرك الحلال وهم من هذه الناحيه على حق انا عطيتك وجهة نظري واللي انا كان سويت ولكن ما انا بلايم اللي بيهد ولد الزرقاء اللي لونه زين وانتاجه فاخر هذا رأيي وننتظر راي باقي الربع |
اللون الازرق في الابل لون طارئ وليس اصليا والدليل انك ماتجد ذود من الزرق غالبا ولد الزرقاء على ابوه الا ماندر ان كانت امه زرقا مجاهيم ولونه على ابوه ففحله ولا خوف باذن الله |
السلام عليكم رحمة الله وبركاته والله يبيض وجيهكم جميع على المعلومات الطيبه اللي اغلى من الذهب واللي يستفيد منها راعي البل وغيره؟ وانا طرت علي فكرة الموضوع وقلت انزله علشان تعم الفايده للجميع..؟ ونشوف كلن ورايه...؟ وكلن عرفنا رايه اما بنبسه لي بفحله لصار الابو طيب وشكله طيب (( بغض النظر عن لون امه (( لان الام عيبه على ماقيل)) ودمتم جميع |
السلام عليكم ورحمة الله وبركاته اخوي سعد ما يهم لون الام اذا كانت ما جذبت ولدها في اللون فهناك فحل مجهم وامه زرقاء او حمراء لكن اللون مجهم فهذا ماعليه اما الحاله الثانيه وهي الحاله اللي تتحدث عنها اذا جذبت الناقه الملونه ولدها هل تهده في المجاهيم 00 انا ارى والله اعلم اذا كان لون الفحل مهوب مجهم بمعنى ان امه جذبته في اللون فهذا في الغالب الاعم بيجيب ابل مثل لونه فاذا انت تبي مثل لونه فهده والا لا تهده وانت تبيه يجيب لون ابوه واسرار ابوه صحيح انه يقال هد من البل اسرارها لكن المقصود الطيب والردى اما اللون فهو ما تراه امامك وقد ياتي بمجاهيم ولكنهن قلايل 0000 وهناك قاعده عندي على الاقل وانا سامعها من من هو اكبر مني سن وهي اذا الفحل جا شبهه لابوه جاب اسرار ابوه واذا شبهه لامه جاب اسرار امه والمقصود هنا الشبه في اللون الواحد والمقصود انه في الغالب الاعم يجيب اسرار من يشبه له لكن المقصود في الاغلبيه وقد ياتي باسراره من هنا وهنا ولكنه يكثر من الاسرار اللي جذبته في الشبه هذا والله اعلم ولكم وافر تحياتي |
عندي ملاحظه انت لاحظ يا أخ سعد اذا ابو الناقه الزرقا اللي تقول مجهم فأنت فحله ولا تهاب انشالله لان الاصل يعود وشكراً |
مرحبا ياسعد ان كان القعود امه ساسها وشكلها طيب وابو فحل طيب افهقه واذا اضرب لاتكثر منه اول سنه اضرب ثلاث اربع وان كثرت ست الين اتولد حيرانه انكانها ازاين فهده وكانها ماتسوى بيع الفحل والله يكتب اللي فيه الخير وانا اقول ان شاء الله انه بينتج والله يوفقك ويعطيك خيره ويكفيك شره اخوك : جابر ال حذقين |
لاهنت يا جابر والله يبض وجهك والله يجزاك خير |
السلام عليكم قصدك اللون بيجيب وحده ثنتين قصدك الزين السر الطيب والشكل والمثل يقول اضرب بالبعير وتحل والسلام ختام |
الاخ بو عبيد انا اقول من المعلوم عند الجميع ان الزرق ناتجه من تهجين لونين مختلفه حتى لو قيل انها ساسها زرق فالنهايه اللون ناتج عن تهجين وهو ماهوب عيب لان التهجين مثل ماله مساوء فله محاسن وكم زرقاء وحمراء مجاهيم اتكون اغلى ابل راعيها عنده وش ظنك ولدها ماينهد ! واشكرك على اثارتك للسؤال واحجزلي رقم عند القعود الى اضرب |
اذا كان ساسه طيب من ابوه وامه واللي جذبه ابوه افهقه وهده مثل ماقالو الاخوان ولكن لاتكثر عليه الضرايب حتى تشوف انتاجه. وان جاء عليه ملاوين لاتنسى ان العرق دساس. |
| الساعة الآن 39 : 11 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |