|
لاتبخلون علينا برايكم السلام عليكم ورحمة الله وبركاته : عندي استفسارين واتمنى منكم التكرم باخبارنا بتجاربكم لعل الله ينفع بها كل من اطلع على هذا الموضوع الاستفسار الاول : عندي خلفه ديوسها مشحمه من يومها لقحه ولاتسلم من المشاكل مره وريم ومره خروج دم وهذا انا ورها بالعلاج ديسها مشحم بشكل كبير لدرجه انها اذا درهمت يتلاطخ يمين ويسار وتسمع صفقه في جنوبها من بعيد وش الحل مع هالشحم اللي في ديسها اللي عذبها وشوه شكلها .. وهل من الممكن استخدام كريمات ازالة الشحوم اللي يستخدمونها الناس . واحد من الشباب يقول عطها شاهي اخضر :mwalat17: الاستفسار الثاني : عندي ناقه لقحه في نحرها خراج وبعد لقاحها قبل اربعه اشهر زاد الخراج وطلع له اطراف وزاد حجمه ورحت اليوم لبيطري مصري (عاد المصري ابو السبع شغلات) قال انا افتح الخراج وانظفه قلت المنطقه في النحر وهذي منطقه حساسه قال مفيش مشكله ايش افضل حل للتخلص من هذا الخراج اللي بدا يكبر ويشوه شكل الناقه . الله يجزاكم بالخير ولايريكم مكروه والسلام ختام |
رد: لاتبخلون علينا برايكم ارحب يافهد يمكن من الرطوبه اللي انتم فيها هي السبب:mwalat7: لا يوجد حل غير انك تشملها بالمسراح وتبهلها في الشبك واذا هو عايب ولا يستفاد منه ومسبب لها مضاعفات يستئصل الاستفسار الثاني هذي ناجمه وفي روايه اخرى يسمى خراج وهو بالاصل يسمى ناجمه لاضرر ولايحتاج تدخل جراحي الا في حالات الالتهابات الحاده وسببها بعض الاعلاف من الحبوب اتمنى اني افدتك يااخي فهد تقبل مروري |
رد: لاتبخلون علينا برايكم شرفني مرورك يامحمد اما بالنسبه لتشحيم الديس فهو من قبل تجي الناقه للساحل والديس ماهو عايب , نحلبه وطيب مافيه شي لكن بين فتره وفتره يورم ومرات يخرج دم واذا عالجته يومين ثلاثه يرجع طبيعي لكن المشكله بكبر حجمه حتى وهي لقحه , ونا ابغا احل المشكله قبل الضراب القادم ان الله احيانا اما بخصوص الخراج او الناجمه فهو في الناقه من شريتها ولا تغير ومن لقحت الناقه ونا الاحظ حجمه زاد بشكل ملحوظ |
رد: لاتبخلون علينا برايكم أما المشكله الأولى : فهذا خلقه والله اعلم كانه شحم.. ويمكن ديد الناقه نازل شوي من كثرة البطح والهجيج , اما المشكله الثانيه : فهذي الذبحه ولا لها علاج نهائياً .. وان قربتها أو تطببت فيها احتمال تكبر وتكبر لين تقضي على المطيه لكن اتركهاا والله ينجيها سبحانه , بعضعها يبطي ويندمل ويضعف .. وبعضها العكس |
رد: لاتبخلون علينا برايكم مرحبا يافهد بنسبه لديد الناقه هاذا طبيعي بعض الابل هذا سر في اماتها عليك بشماله اما الثانيه عليك بلخوا جوا وانا اخوك وان بغيت تفصيل اكثر هذا رقمي ٠٠٩٦٥٦٦٨٥٦٨٦٧/ابو حمد |
رد: لاتبخلون علينا برايكم بسم الله الرحمن الرحيم صباح الخير يا فهــــــد حبيت اشاركم ورد على حسب خبرتي المتواضعه : اما في الحاله الاولى :- الناقه الخلفه الي صفنها تعبان عليك بتنظيف الصفن مرتين في اليوم لمده اسبوع واعزل عنها الحوار وغرزها . اما الحالة الثانية :- الناقة اللقحه الي في نحرها داريه داوم على اعطائها الثوم في لقوم مع استعمال كريم الدوالي لترطيب وتليين الداريه وبعدها عصرها وتنظيفها . |
رد: لاتبخلون علينا برايكم شرفتونا بمروركم والله يجزاكم خير وننتظر المزيد من تجارب الاعضاء |
رد: لاتبخلون علينا برايكم ألله يجزاك خير على تسليط الضوء على هذا الموضوع اللي منتشر ومخسر ومزعج مخسر لانه يعيب الناقه ويكلف علاج بدون فائده. اعتقد ان السبب واحد الا وهو الخراج سواء كان ضاهر مثل ما ذكرت في الحاله الثانيه او غير ضاهر في الحاله الاولى. الحاله الاولى الله يعينك غسل وشمل واذا زاد اعط مضاد بنسلين او ثوم و يمكن يوقف فتره ويرجع. اما الثانيه بسيط اتركه حتى ينفتح من نفسه ثم اعصره عصر خفيف وحط عليه عسل وانشاء الله يختفي للابد والله اعلم |
رد: لاتبخلون علينا برايكم الاخ فهد بالنسبه للحاله الاولى مالك الا الشماله مثل ما تفضلوا الاخوان وهذي خلقت الله وتراك اذا ما شملتها وضيقت الشماله عليها بيزيد حجمه أكثر لكن الوريم المتكرر وخروج الدم يدل ان فيه مشكله بالديد ومشاكل الديد كثيره ولو صورت الحاله خدمت موضوعك وممكن تستخدم معاها ابره الهيام الفرنسية للوقائية وبنسلين 20مل لمدة 4 ايام اذا طلع منه دم مع غسل الديد بماء بارد وملح وانا اعتقد ان سبب ورم الديد وخروج الدم عدم استخدامك للشماله . اما بالنسبة للحاله الثانية لا تستخدم معاها اي عملية جراحية خلك على المرهم الاسود لما تلين ويطلع لها راس وتنفضخ من حالها بعدين تستخدم طريقة تنظيف الخراج المعروفه. |
رد: لاتبخلون علينا برايكم حياكم الله وشرفني مروركم وصدقت يابندر الناقه الاولى مبهلها لبنتها لي مده طويله اما بخصوص الناقه الثانيه اللي فيها خراج ياليت توضح ايش هو المرهم الاسود |
رد: لاتبخلون علينا برايكم مساكم الله بالخير الناقه الاولى اغسل ديدها الصبح بما بارد ونضفها من اللبن اما الثانيه فهي الناقه ماتجي لك يوم الا هي محتكه وفاجرته وعلمنا عنهن |
رد: لاتبخلون علينا برايكم اخوي مثل ما قالو الاخوان بس انا مجرب الناجمه الي بالنحر هذي علاجها المرهم الي غطاه احمر والعلبه لونها ابيض مايحضرني اسمها امرخها بشكل كامل ومن برا الجرح فالوبر الي بالاطراف وموجوده سعرها اما 35 او 45 ريال ولون المرهم بني غامق كنه اسود وريحته كنها فكس والناقه ان كانها اعشرا ذالسنه فضف ديدها بالشماله فوق شد عليه وباذن الله يروح الشحم وبالتوفيق |
رد: لاتبخلون علينا برايكم بيض الله وجيهكم |
رد: لاتبخلون علينا برايكم اما الحاله الاولى : فبعض البل درتها اصلا كبيره وحليبها احيان يزيد ويضيق عليها ويورم الديد في هذي الحاله لاتعلفها برسيم ابد ولا مكعب خل علفها شعير ورودس والا تبن ورش الديد بالماء البارد كل صبح واذا حليبها زايد عن ولدها لازم ينضف الديد الصبح والمساء وتشمل فالمسراح وتبهل على ولدها اذا روحت اما الثانيه فيمكن من العلف لكن ماهو مشكله واذا حبيت تتخلص منه ماعليك الا الربط عليه بضاغط بلاستيكي (مطاط) وكل ما صغر زيد الشد عليه لين يعزل عن نحر الناقه ويطيح من حاله لان الدم مارح ياصله مع زيادة الضغط ومرور الزمن هذا من واقع تجربه وفائده لك وللاخوان |
| الساعة الآن 17 : 11 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |