|
ثلاث مكائن كهرب ومحتار وش أخذ منهن ??????? السلام عليكم ورحمة الله وبركاته مشورتكم يا الربع اهل الخبر والاختصاص واهل التجربة لقيت ثلاث مكاين كهرباء كلها كاتم صوت ايهن احسن في الاستعمال والصيانة وقطع الغيار وايهن ارغب في البيع والشراء كلهن نظافتهن وحده تقريبا ولا سبق وان وظبن وشن نصيحتكم به والله انا محتار بينهن الاولى : جون ديرJOHN DEERE فرنسية موديل 2008 تبريد رديتر الثانية : دوتس DEUTZ المانيه موديل 2007 تبريد هواء الثالثة : ماكينة هندية عليها شعار رسمة الفلفل 2007 تبريد رديتر |
رد: ثلاث مكائن كهرب ومحتار وش أخذ منهن ??????? اقتباس:
وعليكم السلام ورحمة الله وبركاته هلا بك ياعبدالعزيز ومرحبا أن طعت شور أخوك وكانك في الرياض مر اهل الورش اللي في الصناعية في شارع سلمان وأسألهم عن الدعوى وأهم شي قطع الغيار ومكينة مالها قطع أو قطعها غالية أتركها ولو عطوك إياها هدية وأسال مجرب المكاين مشكلتها بعد مشتراها وعلى اني أميل للجون دير لكن قبل تشتري مر اللي قلت لك واسالهم ثم عاد تبيصر ترى الشور من المختص أخير من المجرب بعض الاحيان علما أن فيه مكينة تكد كد ما أظني غيرها يجي مثلها ومن واقع تجربه ووكيلها الجميح اسمها ايفكو (فيات) سابقا ولا أدري يجي منها كاتم الآن أو لا وان كان لقيت مكينة تسمى كوهلر أشتر وأنت مغمض ووكيلها جيد لكن أهم شي استشر أهل الورش تراهم أبخص في مشاكلها وغثاها وبعض الأحيان تشتري مكينة يارخصها ثم عقب فتره ماتلقى لها قطع غيار ثم تدخل في رح تعال هات جب تحياتي للجميع |
رد: ثلاث مكائن كهرب ومحتار وش أخذ منهن ??????? اخوي خالد جزاك الله خير وبيض الله وجهك ورحم الله والديك ما قصرت علمك غانم لعل احد الاخوان يفيدني ويوفر علي روحتن لشرق الرياض |
رد: ثلاث مكائن كهرب ومحتار وش أخذ منهن ??????? الاولى : جون ديرJOHN DEERE فرنسية موديل 2008 تبريد رديتر قطعها متوفره حسب ماسمعـت واستعمالها جيّـد .. ومرغوبـه .. الثانية : دوتس DEUTZ المانيه موديل 2007 تبريد هواء دوتس ألمانيـه .. ومعروفـه وممتازه جداً جداً وصبـاره .. .. وانت ماشاء الله عليك مرتبهاا لكن كانك في رايي اشتر ( دويتس ) الالمانيـه .. أو ( بيركنز ) الانجليزيـه .. |
رد: ثلاث مكائن كهرب ومحتار وش أخذ منهن ??????? جزاك الله خير اخوي مشعل وكانك تميل الى الالمانيه __________________ اللهم اشف فهد بن خالد أنت الشافي المعافي وألبسه ثوب الصحة والعافيه اللهم تقبل دعائنا يا ارحم الراحمين |
رد: ثلاث مكائن كهرب ومحتار وش أخذ منهن ??????? اخوي من تجربة في مكائن الكهرب هنالك نوعين من ناحية القوة والصبر وقلة الصيانة الاولى : افيكو ( فيات ) ايطالية الصنع وكيلها الجميح ،،،،،، أسأل كان تعرف احد من مراكز المجاهدين عنها ومدى صبرها .( اغلبها بدون كاتم ) الثانية: دنيو يابانية الصنع تجي كاتمة واقتصادية في صرف الديزل الاهم انك لا تشتري مكينة كيلواتها كثيرة لأن المكينة يجب ان تحمل ثلاث ارباع حملها كلي من كيلو وات يعني ( تحسب احتياجك من كيلو وات كهرب واضف عليها خمسة ) واخيراً ابعد عن مكائن ألي تبريدها هواء مثل دويتس ولستر ما تنفع في الصيف تولع نار وتخبط ماتعيش |
رد: ثلاث مكائن كهرب ومحتار وش أخذ منهن ??????? : دوتس DEUTZ المانيه موديل 2007 تبريد هواء انصحك فيها |
رد: ثلاث مكائن كهرب ومحتار وش أخذ منهن ??????? عندي مكينة دوتس لها عندي تقريباً 7 سنوات هذا إذا ما زاد ما نقصت في عدد السنوات ،، من يوم شريتها مستخدمه إلين قبل سنتيـن صاملة ولا تطلب منك غير الديزل والزيت وبعدين وضبتهاا نص توضيبه والصراحه قطع الغيار شوي غالي ووكيلهاا عندناا { بقشان الي هو وكيل كوماتسو } وكل القطع متوفرة ولكن ركب وأنسى أمرهاا ،، وحالياً شغاله 100% وهي تبريد هواء ولا عمري غطيتهاا الشمس والعج والغبار يلفح فيهاا ولازالت تكد ياربي لك الحمد ،، وسلامتك ،، |
رد: ثلاث مكائن كهرب ومحتار وش أخذ منهن ??????? الله يطول عماركم بيض الله وجيهكم |
رد: ثلاث مكائن كهرب ومحتار وش أخذ منهن ??????? السلام عليكم ورحمة الله وبركاته أخوي نصيحتي لك خذلك مكينه ماركه معروفه مثل ((كمنز)) او ((بيركنز)) لاتاخذ مكينه قطع غيارها مو متوفر او غالى بتتأذا فيها انا اخذت مكينة اونان بالكويت ومالقيت قطع غيار الا بالسعوديه عنااااا للدمام والشباب يفيدونك اكثر |
رد: ثلاث مكائن كهرب ومحتار وش أخذ منهن ??????? جزاك الله خير ماقصرت الف شكر اخوي عبدالرحمن |
| الساعة الآن 55 : 10 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |