|
سوق الخرج يااهل الخرج الله يمسي، يصبح الجميع بالخير ابي معلومات عن سوق الخرج متى حراجهم وأي يوم الافضل وكذالك ابي موقعه بالضبط واشكر الجميع على سرعة تجاوبهم |
رد: سوق الخرج يااهل الخرج [مرحبا اخوي محمد سوق الخرج يوم الاثنين الساعه (2 ظهرا ) للقصب والخميس الساعه (6 صباحا )للمقاني وموقعه جنوب الخرج على طريق الثليماء ولا اشير عليك بسوق الخرج لانه سوق يحتضر قبل الموت واغلبيه اللي فيه مطففين ونجاشين لا ضمير ولا ذمه اذا انت صاحب مجاهيم عليك بسوق الحساء يوم الخميس من كل اسبوع |
رد: سوق الخرج يااهل الخرج يا اخ محمد : اذا انت بتجلب فاعطاك العلم عيد العوني واذا انت شراي فعز الله سوق طيب للي بيشري .. لكن تردد عليه اكثر مره ولا تشرق الشمس الا انت في السوق والله يرزقك يا طيب الفال |
رد: سوق الخرج يااهل الخرج اقتباس:
وحقيقه على قربه لمدينة الرياض ماقد وصلته من قبل ويوم الخميس لي زياره بإذن الله لسوق الخرج والله يكفينا شر المطففين والنجش وسوق الاحساء مافيه شك من افضل الاسواق للمجاهيم وسبق وصلته الله لا يهينك على المعلومه والنصيحة |
رد: سوق الخرج يااهل الخرج اقتباس:
يعطيك العافيه وتسلم على المعلومه وأنا بروح شاري وصلاة الفجر عندهم بمشئة الله |
رد: سوق الخرج يااهل الخرج ما ازيد على اخواني كما تفضلو كلام صحيح سوق الخرج للشاري وليس للبائع لكن الخميس يوم جيد يجي فيه بيعات مستغربة من اهل الخرج ومن اهل السوق تجي بيعات ب 44 و 30والسوق للشاري لكن سوق الخلفات طيب للبايع وكانك تدور شي معين نناصي الخرج قلي طلبك وبشوف لك وفقنا الله وياك |
رد: سوق الخرج يااهل الخرج تعقيبا على كلام اخوي صالح اي رجل عنده نظر ومعرفه في الحلال لا يستغرب القيمه الطيبه في الناقه الطيبه في السوق سواء في سوق الخرج او غيره من الاسواق لكن المستغرب لما يحرج على ناقه عاديه واصحابها خمسه اشخاص (قطه) اربعه منهم يزودون فيها والخامس موقفها لين تاصل قيمه اكبر بكثير من قيمتها الحقيقيه وتباع على رجل على نياته ولا يعرف بخبث ولا نيه هؤلاء الاشخاص وتجلب ناقه اطيب منها بكثير ولا تاصل نصف قيمه الاوله والجواب لان ليس فيها نجش ولا كذب واسف على الاطاله لكن هذا الواقع والحاصل في سوق الخرج ولكم تحياتي |
رد: سوق الخرج يااهل الخرج ماقصرت اخوي عيد على المداخلات المفيده والله يكفينا تطفيفهم ونجشهم |
رد: سوق الخرج يااهل الخرج فيه شخص من اقاربي يشتري ويبيع بنفس السوق والرجل سمعته طيبه بالسوق وراعي نظر والكل يعرفه بالسوق حسب علمي وعنده ابل يمكن تلقا طلبك عنده ويريحك من العنا دق على جوالي وعطني طلبك ونا اتواصل مع الرجل وارد لك ومال نبغا من ورا هالفعل الا الدعاء جوالي 0551101112 فيصل |
رد: سوق الخرج يااهل الخرج اذا كان الشخص الذي اشار اليه الاخ فهد العضياني في سوق الخرج هو (بندر بن سقيان ) فنعم الرجل للامانه ولديه ابل مجاهيم وصاحب نظر وقد اشتريت منه عندما كنت مدمن مجاهيم لكن الله عافاني وتبت ولله الحمد والله يوفقه هو من خاف الله في البيع والشراء وابتعد عن الكذب والغش |
رد: سوق الخرج يااهل الخرج اي بالله يا اخ عيد هو بندر سقيان وبيض الله وجهه فعله طيب في القريب والبعيد |
| الساعة الآن 43 : 10 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |