منتـديـات مــزايـن - والله إنه مايزيح الهم عنّي

لعيون الأخ القدير / عيد المنصوري

الذي طلبها مني

والله إنه مايزيح الهم عنـّي=كود ذكر الله وفجوج الوسيعة
لامشيت أرض الخلا همومي نسنـّي=فطرة بقلبي من المولى طبيعة
كل مادكّت هواجيسي وجنـّي=أحتديت النفس في رحب الطبيعة
الخلا عشق ٍ لقلبي مايونـّي=والله إنه بهجة الروح وربيعه
خص لا أنشا نو والرعّاد حنـّي=وأنهمر وبله وفيّض كل قيعة
ودرجت كل المسايل وأمتلنـّي=سيلها غطى العثامير الرفيعة
وأنبتت من كل لون وكل فنـّي=والعسوس بالأجهزه لجّت تذيعه
بشروا بنبت ٍ به الدار أكتسنّي=والخباري من الروا دايم نقيعة
بكل فج يجيك للمخضار بنـّي=ريحته تشفيك يالنفس الوجيعة
والرعايا لبعضها ماخالطنـّي=في وسيع الرزق سمحات ٍ شبيعة
في ديار ٍ من حفاها ماشكنّي=زين شوف أذواد خلق الله رتيعة
فحولها من عقب فدرتها عصبنّي=الجمل تسمع وهو نايد قضيعه
هدرته كنها الرعد لا جلجلنّي=وتسمع لنابه على نابه وقيعة
ماحلا لاجا العصير وروحني=تستجيب لصوت راعيها سريعة
لاجذبها الصوت صوبه درهمنـّي=المحبة بينها وبينه شنيعة
لاتلافت في المراح وحضّرني=من حداها للمطاعم ماتطيعه
والحويّر حن لأمه وأرزمنــّي=من سخاف الشول وسممها وسيعة
أبرزت له وأرزمت ثم أعطفنـّي=صبّت أربعها كما العين الدميعة
والجنب قبل الحلايب بركنـّي=خادرة من شبعة النبت النفيعة
زانت الشبّة ونجر الكيف دنـّي=كيف روس قروم ماترضى الهزيعة
والمنارة شبّها اللي مايمنـّي=نفسه لخدمة هل المجلس مطيعة
وأجتمع كل أبلج ٍ من فوق ظنـّي=الراوابع فووق وألسنهم بريعة
هرجة الهرّاج منهم يبهجنـّي=الهروج أعذب من العين النبيعة
ماخلطهم كل خبل وكل قنـّي=صفوة رجال ٍ من أصحاب الطليعة
الذبايح للضيوف إيفطحنـّي=من خيار الجلب يشرون القريعة
الدراهم في الجميلة ماتحنـّي=يشترون المدح من ناس ٍ تبيعة
جعل يفداهم من العربان هنـّي=الذي نفسه على الهزلة دنيعة
النعارة وسط رأسه ماجثنـّي=خالف دروب المراجل والشريعة
يالبيب الروح هاك العلم عنـّي=راعي النمّات حذرا لاتطيعه
مع دروب الطيب رجله مامشنـّي=في العرب ياجعل شكله للقطيعة
والختام أرض الخلا غصب ٍ خذنـّي=حبّها له في الحشا حصون ٍ منيعة
والمطايا في هواهن ولعنّي=وارثه من بوي ماجاني بديعة
درّة الشايب بعشق البل غذنّي=جعل منزاله بجنّات رفيعة
وأبدع القيفان وألحن وأغنـّي=والهضاب الشامخة صوتي تريعة
لادعيت الشرد والندر لفنـّي=ماآخذ إلا وضحه الردم القريعة
منهجي بيّن ولي سلمي وفنّي=آخذ جداده ولا ألد لرجيعه