منتـديـات مــزايـن - ان زانت الدار ياعليان خلّك رتوووع

السلام عليكم ورحمة الله وبركاته
أيها الأخوة هذا صوت وصلني من الرجل الكفو والشاعر الجزل العذب سعد بن مناحي بن شفلوت والصوت موجه لزميل ٍ له في العمل يدعى شافي الأكلبي وبعد أن وصلني الصوت سألته هل رد شافي على هذا الصوت فأجابني بقوله لاوالله مارد فقلت له أبشر بالردود وأنتظرني ؟
وأضع أمام أعينكم الصوت والصدى بعد أن إستأذنته في طرحها

صوت سعد

ياشافي الأكلبي والطق جا في الربوع=عليك شكواي بعد الله يالاكلبي
الخاطر ادنى ماحسه وألا قلبي جزوع=واللي ماغر الذكي يمكن يغر الغبي
بنت المطر غيرت ممشى بعير الفروع=وأنا ودنياي صرنا مثل راس الضبي
امرين !! ياحالة قشرا ياحظ يروع=خلتني أنشد عن اصحاب الردى وش تبي
حتى لو اني حفيد مفرقين الجموع=وأرقابها تحت رجلي وتخسى وتهبي
لكن عيبي مجاملة الردي والدنوع=وحفظي قدر لحيتي من هرجها وشنبي
وهذا هو اللي جنيته من خساس الطبوع=كنها على راحتي تدفع فلوس تعبي
وأنا هالأشكال مأبغى أضمى عليها وأجوع=لاني لو أجوع وضمى ببلش امي وأبي
وان شفت كن الحشى لكت عليه الضلوع=شعمت ضوي لهاجوسي وجبت حطبي
وغنيت الالفين كيلو من بيوت السبوع=وعالجت ضيقه بضيقه والضروف تحبي
صارت وصرنا وصار السبت مثل الربوع=وأظن ماعاد غير الصبر يالاكلبي

ردودي على الصوت

يالله يالله يارب السجود الركوع=ياللي لغيرك وجاهك مانحنى منكبي
أدلني للقدا يارب مانتب منوع=للي لجاهك لجا ولحاجته يطلبي
لطيور فكري على الشاهق مكان ووقوع=تتبع مزون الحيا وتخايل الكوكبي
الوضح في حوض هاجوسي ورود ٍ شروع=ويالشاردة حوض هاجوسي عليه أحضبي
جتني على صوت من صوته لفاني يروع=يشكي وينخا زميله شافي الأكلبي
والأكلبي لا نخي جوك التغالب فزوع=كسب الجمايل لتغلب غاية المطلبي
لبيك ياصوت رجل في المواقف بتوع=صوت مع أهل الوفا والطيب ماهو غبي
يشكي من الحظ في الخوة سدوح ٍ جظوع=متكي ٍ ماحترك وإن قام يدبي دبي
إن تبغي الجاه جيت اللي يشب الشموع=اللي زها في الإدارة عالي المنصبي
رجل لفعل الجميلة ماذكر لي قطوع=راع الجمايل حفيد مهلهل التغلبي
وإن تبغي الراي ياكحيلان فأصغ السموع=وأعطيك رأيي وأنا من وقتي مجربي
الوقت ذا كل شي في نزول وطلوع=وكل من الناس له سلم وله مذهبي
أحد بدا في الطويل وسكته في طلوع=متجمّل في ربوعه والخوي وأجنبي
ودون الخوي موقفه ميقاف حر شلوع=ويقول دون الخوي والله لا أثني ركبي
وأحد ضعيف وخسيس ٍ مايسر الربوع=مع الخوي والجماعة خالي المزهبي
تلقاه من تحت صرّتها سروق ٍ رضوع=والمصلحة دون من حوله سباها سبي
إن زانت الدار ياعليان خلّك رتوع=وإن لحقها الوقت فأشمل ياجمل وأجنبي
الحر لا عاف من ديرة يطير ويزوع=والرزق عند الذي بالهدي ودا النبي