|
افضل بدايه السلام عليكم ورحمة الله وبركاته اخواني اعضاء المنتدى الكرام هذي اول مشاركه حقيقيه لي في المنتدى واتمنى انك تفيدوني بسراحه انا توني جاي الرياض وخلاوي من غير شر صار دوامي هنا وودي احطلي نياق ولاكن الاسعار جدا غاليه للي في بالي ففكرت اني اشري بكار اللي اعمارهن على شهر وشهرين وانا وحضي بس يكونن بنات فحل كفو وام زينه وبالنسبه للوقت انا ماعندي اي مشكله اصبر فا ابي منكم محاسن الراي اللي طرالي ومساوئه ولكم جزيل الشكر |
رد: افضل بدايه حياك الله في المنتدى لابد أنك تحدد وجهتك أولاً هل أنت قناي أو تبي تدور العيشه يعني تبيع وتشري ، إذا كنت قناي فحدد لك لون تحبه وتشوف أنك تبي تقنيه ، ثمن تنق لك شخص من ذا المنتدى المبارك وكلمه بالتلفون أحسن لك وسير عليه في مكانه وشف تجاربه والرياجيل مهوب مقصرين معك وشف لك شخص ثاني وثالث إلين تتسع عندك الرؤية ثمن تقرر بعدها . |
رد: افضل بدايه الله يبيقيك اخوي سلمان انا قناي طال عمرك اما اللون فالوضح ولاكن وين القاهن هذا السؤال المهم |
رد: افضل بدايه زين مانويـت .. واللـه يحقق مافي بـالــك .. وحتى الحيران اللي عند اهلها وعلى فحول معروفه اغلا بكثير من اللي في السـوق .... ان كنت قناي .. أول شي دور القعود الكفو الخيار واللي اصله معروف .. واشره .. ولو غلي .. تراه مايخسر .. ولقط عليه من البكار المفاريد الوضح والحقايق المتوسطه اللي وجيهها مقبوله وألوانها طيبه .. وموجوده في الاسواق .. وحتى اللي طامعً في بكرته ومتشدد فيها في مراحها لاجابها في السوق طااااح مافي راســـــه .. وسوق المنتدى تراه طيّب وفيه شيً يصلح لك .. وحنا في خدمتك بالمشوره وكل ماتطلب .. وانا اعرف لك رجالً في الرياض شروا من يقرأ هالكلمات .. ورجالً نظره موقف .. ومشراه طيّب .. ويمكن تلقى عنده مطلوبك .. وهو احد مراقبيـن هذا المنتدى الشامخ .. .. .. .. تقديري |
رد: افضل بدايه يا مرضي ليش التعب تشتري حواره وتحتريها 4 سنين لين تضرب دور لك بكار وضح مواجيه ولا تكثر 6او 7 ثم ودهاء لفحل معروف وما تدرري لو الله رزقك ببكار تبيعه على400 والله يرزقك يا مرضي من واسع فضله |
رد: افضل بدايه الله يرزقك من واسع فضله ودور الضرايب ورح لاهل الركاب المنتجه |
رد: افضل بدايه الله يجزاكم خير اخوي مشعل الشويش جزاك الله خير وبيض وجهك وكثر من امثالك مانستغني عن خدماتك انت وشرواك اخوي سلطان الدلبحي الله يبيض وجهك لاكن طمعتي طال عمرك في شي الزين بامه وابوه وهو للحين بين مخطي ومصيب اشوف حضي اخوي علي الدعجاني الله يبيض وجهك ويرزقنا حنا وجميع المسلمين |
رد: افضل بدايه السلام عليكم اخوي مرضي اولاً عليك الاطلاع والمعرفه قبل اقتنائها طبعاً اذا ماكانت عندك خلفيه عنها وحاول تشوفلك احد من معارفك ورح يمه بأستمرار واطلع البداوه تبي من يقدم لها من وقت ومال وانت بأذن الله كفؤ وبعدين اشتر لك كم ناقه مثل ماقالو لك الاخوان اذا قررت اقتنائها 5 او 6 وتكون متوجهات وضرب لك على بعير طيب منتج وعسى الله يرزقك بالانتاج الي يسرك والسنه الثانيه اشتر كثرهم وضرب وبكذا يكون عندك ذود |
رد: افضل بدايه الف شكر لك اخوي عبد المحسن المقاطي عزالله وفيتو وكفيتو انت والاخوان الله يبيض وجيهكم جميع |
| الساعة الآن 28 : 09 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |