ليا ثورتها تبطي ماقامت ؟؟
 

فيه ناقتن عندي ليا ثورتها تأخذ شوي بعد عدة محاولات ثم تقوم تبي تقوم ولاتقدر وتحاول مره ثانيه وثالثه وتقوم بس تنتفض رجولها .. وهي أكلها طيب ونظرها زين وممشاها زين بس هاذي مشكلتها وانا والله خايف أنها الذيبه والله عندي علاج للذيبه مجرب يعلمني ؟؟ ولاهنتوا .

رد: ليا ثورتها تبطي ماقامت ؟؟
 

مرحبا يامطلق

ناقتك اللي فيها قلب عصب اذا حاولت تقوم تقول كنك معقل عراقيبها ولا مفقر لها تقوم بمقدمها وموخرها ما يساعدها الا بعد كم محاوله

رد: ليا ثورتها تبطي ماقامت ؟؟
 

ناقتك وش سنها ؟

رد: ليا ثورتها تبطي ماقامت ؟؟
 

راشد
فهد
بيض الله وجيهكم

وش الحل مع قلب العصب
مع الرغم انها مبطيه وهي على هالوضع تقريباً لها حول السنه

أما بالنسبه لسنها يافهد في أم رابع

رد: ليا ثورتها تبطي ماقامت ؟؟
 

اخوي مطلق الناقه مثل ماقالو الاخوان فيها ذيبه والذيبه

مالها علاج وترا كثر الغثه يجيب الذيبه

رد: ليا ثورتها تبطي ماقامت ؟؟
 

قلب العصب هل هو الذيبه

بعدين الناقه احيان تقوم مافيها شي واحيان يالله تقوم بعد كذا محاوله
وانا اعتقد ان ماهي ذيبه

رد: ليا ثورتها تبطي ماقامت ؟؟
 

قلب العصب في قومة الناقة من بركتها والذيبه لاجت تبرك

رد: ليا ثورتها تبطي ماقامت ؟؟
 

عليك باالعلاف المفيده وعملية التوازن بالاطعام مهمه بغض النظر عن الاعراض اللي بناقتك
وانا متاكد بعد الاطعمه المفيده والمتكامله راح تشوف الناقه غير

رد: ليا ثورتها تبطي ماقامت ؟؟
 

يا التميمي
المشكلة ماهي في الاعلاف امهاتها معها مافيها الا العافيه ابشرك
المشكلة اتوقع انها اعصاب والتهاب في مفاصل الناقة مالها دخل في علفها وطعامها
على العموم ماقصرت وبيض الله وجهك

رد: ليا ثورتها تبطي ماقامت ؟؟
 

يالربع وش سالفة توازن الاعلاف اللي طلعت هالايام وكل مرض تنسبونه لها التوازن ترانا من يومنا وهاذي اعلافنا لابلنا ولا فيها الا العافيه الا بعض الامراض المعروفه وانت يا خوي مطلق ناقتك فيها قلب عصب ومع الوقت يصير ذيبه ولالها علاج الا الحلبه تخفف منه شوي وعلى فكره التوازن فالاكل والبروتينات والنشويات الخ.... حنا يا ربعك هل البل ما نعرفه خل اباعرنا ههههههههه

رد: ليا ثورتها تبطي ماقامت ؟؟
 

شكراً يابو علي

الحين العلاج بالحلبة وشلون طريقته ؟؟؟