منتـديـات مــزايـن - حول مع العتبان سبعان وقروف***وبدو قحطان معيلين الطرادي

أنا هواي و شف بالي ياخـو نـوف=سـودٍ وبرهـا زايــدٍ بالـسـوادي

لاجيتها صدري مـن الهـم مكتـوف=كنـي بليـلٍ مـن ليـال العـيـادي

خـصً لياجاهـا هفاهيـف هفهـوف=وقـام السويبـع للمنـادي يـنـادي

لأ أمست ليا فيها حسوفه وحاسـوف=وليا أصبحت قامت تحـرا المقـادي

والبرد تونس له مع الصبح لاهـوف=وقام الجمل يزنـف ليـال الهـدادي

أول هداده فـي بكـارٍ لهـا شعـوف=ليا بركـت قـام يهجدهـا هجـادي

حرصً على المحدار لو جالي ظروف=لاشفتهـا قامـة تخبـط الـقـرادي

تم المحول ولا لنـا عنـه صـاروف=ثم قلت قم يافهيـد مـس الشـدادي

يـا ماحـلا لا قالواالبـرق مشيـوف=وجات العلـوم وكـل علـمٍ وكـادي

أول هماليل المطـر جالهـا ضيـوف=واستبشـرة منهـا ربـوع البـلادي

نونٍ يقود من أدهم المـزن مـردوف=لوامعـه مثـل السيـوف الحـدادي

سيله يخلي عالـي الحـزم منتـوف=ويفيض منه ليـا انحـدر كـل وادي

حول على الصمان مثنـاه وطـروف=وجيانـه اللـي ينبتـن الـعـرادي

وليا زهم عشبه وجـا فيـه نفنـوف=وقامت تلافت لـه وجيـه البـوادي

وعسوسهم قامت تلوف الوطى لـوف=تمعطـو بيـض الجيـوب الجـدادي

حول مع العتبـان سبعـان وقـروف=وبـدو قحطـان معيليـن الطـرادي

تخلعوا مع نجد طـوفٍ وراء طـوف=يمشون في مشهـات قطـم التـوادي

بدوٍ دبشهـم لازمـى كنـه اقنـوف=نـون تخالطبـه بيـاض وسـوادي

مثل الغيوم ليا زمتلك علـى الشـوف=ويشعف نظيرك كـل سـودً سنـادي

سودٍ عضام لحيهـا كنهـا اسيـوف=مـرق غواربهـا لحمهـا متـقـادي

تجـذب مناكبهـا بكيعـان وخفـوف=لا جنحبـت قامـت تحـذف الايـادي

هفو مع المشقر على جـال حنتـوف=يقدا لهم عـن تايـه الـدرب قـادي

ركبو نفـودٍ جالهـا صـدر وكتـوف=ثـم حولـو منهـا حـدورٍ قصـادي

مالو على عشبٍ فياضـه لهـا زوف=عموده البسبـاس وأرضـه جـلادي

خيامهـم لاشيـدت جالهـا أرفـوف=مثل الهضاب ليـا زمـت بالحمـادي

خذو لهم قامات والعفـش مجعـوف=جايـن لنيـران البـوادي رمــادي

لقو لهم مقبـل ومشهـاه وشفـوف=والـزود شفتـه بالمشاكيـر بـادي

وليا مضى خمسين ليل ولهـا طـوف=جاللضهور حجـوز مثـل الهـوادي

سحج الفطير الجنف جايلهـا دفـوف=واللي عليها حـال مـن قبـل زادي

ثلاثة أشهر وسم وأسماك وعطـوف=ومن عقبها توحي على الماء منـادي

ملـو ليـا جـا للطواليـع حافـوف=والبل قـزت قامـت تعـادا تعـادي

وأن كان قالو عالية نجـد مصيـوف=وأدناه من خشـم الينوفـي وغـادي

صيفً رهجله راس عبله وشفشـوف=أكبر نصيـه مـن فـروخ الكـدادي

تمزعو عجليـن والـدرب معـروف=متنحريـن مجـرهـدات الـريـادي

كلً على حـب المسانيـد مشعـوف=تزبـنـو دارن هـواهـا بــرادي

زهابهـم فـوق الحناتيـر ملفـوف=وقامو يبارون الدبـش يـوم قـادي

أناستن ماينتوصـف لهـا أوصـوف=يطرب لها شرس الرجـال الحيـادي

وأن كان شفت من الغطاريف غطروف=نجـلاً مخاذعهـا تمـت الـفـوادي

ليا عرضت منكب وعاتق وسرجـوف=والصدر والذرعـان والبطـن غـادي

وليا أقفت لاهي مغير سيقان وأردوف=هذيـك ياصنيتـان ناقـة شــدادي

ولاشافة اللي متبي لشوفتـه شـوف=راع العلـوم الخايعـه والفـسـادي

كنه على طـرد السمـارات مكلـوف=ليا شاف له ريغـه يجيـك متحـادي

وليا عتليت براس ضلعً لـه أقيـوف=عدل الكتـوف وزامـيً لـه ثنـادي

غنيت لو جالي عن الشعر صـادوف=وجـا للقصايـد بالمبـادي قـوادي

لو كان عاصفني من الهم عاصـوف=يقدح بكبـدي مثـل قـدح الزنـادي

دنيـاً محاسنهـا ملـذات وشفـوف=والا تـراهـا كلـهـا للـنـفـادي

عينت شيخانً تـذري عـن الخـوف=روس الرجـال منزحيـن المـعـادي

أهل الرماح اللي مضاريبها الجـوف=لبست عليهـم كـل عـذراً حـدادي

وتم الكلام وراس معنـاي مكشـوف=وعسا البـلاد بخيـر والجـو هـادي

وصلو عدد ماهب للصيف عاصـوف=علـى رسـولٍ مرسلـن للعـبـادي

الشاعر:سهل بن نايف الكسر المرشدي العتيبي