|
شوال مستمر على مدار السنه اخوانى الاعزاء اعضاء وزوار هذا الصرح الشامخ ممن لديهم الخبره والتجربه فى مشاكل لقاح الابل السلام عليكم ورحمة الله وبركاته عندي ناقه امرها حيرنى شريتها العام الماضى من سودانى على اساس انها لها ثلاث شهور معشر والناقه يوم اشريها تشول شول قوى وتفشح وتوزر وترفع راسها فوق حتى البعير اذا ضيق عليها ماترغى ابد وتسوى نفس الطريقه وهى ناقه فاطر ومزيونه بالحيل لكن بعد مرور 6 شهور كشف عليها الدكتور وطلعت ماهى لقحه ولا شى كذبه ويقول رحمها نظيف وعندها تحوصل على المبايض وهذا يخليها دايم تشول وكانها معشر عطاها ابره فى الوريد وبعد 10 ايام ابرة تنظيف مبايض وبعد 5 ايام ابرة جسره ولا تغير شى بعده قال الدكتور ما فيها حيله وهى على هالحال سنه كامله وش رايكم ياجماعه فى هالناقه واللى عنده لها طب سواء شعبى او بيطرى لا يبخل عليناالله يجزاه خير ويرحم والديه عن النار ناسف على الاطاله ونرجو ان تعم الفائده الجميع وهذا وتقبلوا تحيات اخوكم سعد العريفي |
السلام عليكم ورحمة الله وبركاته ياخوي سعد هل الطبيب دس على الناقة ولا غسلها بلي؟ اذا كان غسلها بلي فجب لها بصير يدس عليها واذا جاء وقت الضراب ,اضربها بفحل هرش قد القح وان شاء الله بتلقح هذا من واقع تجربةوشكرا |
الاخ العزيز هادى الجابرى الله ليهينك ولا اخلا ولا اعدم منك ولا من شورك والدكتور ادخل عليها وسوى لها غسيل وحط حبوب والدكتور له خبره جيده عند اهل الابل لكن كيف اضرب الناقه وهى مازالت تشول ولا فيها جسره حتى بعد ابرة الجسره وهل ممكن تجسر وهي تشول وهل ممكن اعقلها وخلي البعير يضربها وهي بالشكل هذا حتى لو نجبرها علي البعير تتوقع بيجيب معها نتيجه ولا نستغني عن راى باقى الجماعه والله يرحم والديك اخوي جابر عن النار ويا ليت تنورني اكثر وترد علي تساؤلاتي لاهنت |
مرحب ومسهلا اخوي سعد الغش صار بكل شي لاذمه ولاضمير حتى الحايل يغشونها على انها لقحه وتشاول مشاول لقاح حتى البعير مايبيها وطريقة الغش يتدولها العماله الاجنبيه! وهي عباره عن تمرها معبوطه وبوسطها وبرة الناقه ويرميها في رحم الناقه وبعدها تشاول مشاول لقحه الحل : اذا جاء وقت هباب البعارين ولابقى الا القليل من الشهرين وفيها شف لك بصير ينظفها ويقطع عنها وسقها للبعير الطيب ان كنت بالرياض الرشيدي اللي انا اتعمل معاه موجود ممكن ادلك عليه ونشوف باقي الاعضاء واراهم |
اخوى محمد الوهبى التميمى مرحبا والله ومسهلا رايك طيب بالحيل ولاهى غريبه منك الفزعه ولا من كل النشاما المتواجدين معنا الدكتور يقول رحمها نظيف والمشكله فى المشاول كيف يروح من الناقه الحاله ياجماعه غريبه ومن عنده طب شعبى او بيطرى يبطل هالمشاول يفزع الله يجزاه خير اخوى محمد اذا كان السودانى اللى تعامل معه عنده حل للمشكله سواء تنشده اوتدلنى عليه الله يجعلها في موازين اعمالك ويرحم والديك عن النار وانا مامن بعد عن الرياض في القويعيه وتقبل خالص شكرى الجزيل |
الاخ سعد انا كانت عندي ناقه نفس ناقتك بالظبط وجبتلها دكاتره وجبتلها ناس فاهمه ودسو عليها ونظفو وقطعو وماكو شي ماسويته لها وسنتين مافيه بعير ماضربها ولاكو فايده شف وانا اخوك انت تقول الناقه فاطر شف حلمات ديدها كانهن وانا اخوك صغار ترى الناقه ماعمرها ولدت يعني عقيم لاتعب نفسك وتخسر عليها انا بعتها قصاب عسى الله يرزقك باحسن منها |
السلام عليكم ورحمه الله انا كانت عندي ناقه نفس الحاله بعد بس ناقتي كانت لها ولدتين ومن بعدها تقريبا 4 سنوات ما القحت ضربناها مره وصارت اتشول شوال اللقحه ومرت عليها سنه وخواتها ولدن وهي بعدها وطوفت اكثر من سنه وبعدين جبتلها الدكتور ودخل عليها ونظفها نظافه طيبه وطلع منها اشياء اول مره اشوفها وحطلها حبوب تقريبا 10 حبات وابرتين مضاد حيوي ومن بعد اسبوعين ضربتها وبفضل الله لقحت وصملت وجابت بكره لله الحمد والمنه ولد عمي عنده نفس الحاله ناقه منتجه وسبوق وطوفت 3 سنين ما تلقح اتشول والبعير ما يبيها ونظفها تقريبا 4 مرات كل شهر مره ومن بعدها دور بعير صارله سنين ما ضرب وفكها وياه في نفس الشبك شهر كامل وقام البعير يضربها يوميا بروحه ومن بعدها لله الحمد والمنه القحت والحيم مدني من 6 شهور تقريبا |
بعض البل تشول خوف من الناس ومن الفحول إذا كانت أرحام الناقة نظيفة فأعطها إبرة يسره للتأكد من يسرتها وخامس يوم بركها للفحل وراح تلقح بشوالها بحول الله وقوته تحياااااااااااااتي |
الله يعينك علينا وعلى اقتراحاتنا اتوقع انك بتضيع بيننا ولانت بداري اي شور بتطبقه وهذا حقيقة اجتهاد من الاخوان الله يعطيهم العافية وكلن حسب التجربة اللي مرت عليه وانا باضيف شي ايضا من واقع تجربة بعد التأكد من عدم وجود التهاب في بطن الناقة عطها ابرة اليسرة Estrumate بالاسم لانها مناسبة جدا لمثل هذه الحالة بجرعة 5 سم وبعد 11 يوم اعد نفس الجرعة وبعد 3 ايام اعرضها على البعير اذا وقف مشاولها اضربها واذا استمرت على المشاول فاظنها عقرت والامل ضعيف في لقاحها |
مرحبا بك ولاعليك زود يالخالدي اخوي سعد رقم الدكتور الشعبي 0501167244 ابو سالم الرشيدي الموقع سوق الابل الجنادريه وانا في رايي اخوي سعد مشاول الابل ينقسم لاربع اسباب السبب الاول هو القاح الحقيقي السبب الثاني خوف الناقه من الفحل والخوف بشكل عام السبب الثالث وجود اشياء في رحم الناقه من اوساخ من كثرت الضراب او غيرها السبب الرابع فتحت الرحم مقفله بالكامل وهذا عيب خلقي سبحان الله وكلها تشاول ولايعرف يفرقها لها الا البخيص وانا ارجح السبب الثالث حتى لو الدكتور اللي جبته شافها وقال نظيف رحمها نصيحتي لك اخوي سعد بعد رمضان بفتره شف لك الدكتور الشعبي وخله ينظف ويقطع واضربها بعدها بااسبوع من عملية التنظيف واحسب لها وكرر عملية الضراب مره ثانيه وغير الفحل بالمره الثانيه ان كتب لك فيها خير بتلقح ولا الله يخلف عليك باطيب منها واسف على الاطاله وباقي الاخوان يفيدونا وهم اعلم خبره مني |
بيض الله وجهك اخوى محمد االتميمى بياض يشع مع كل ريع وابيض من الشاش وبيض الله وجيه الجماعه اللى شاركونا الراى وعطونا مشورتهم واخص كل من الاخ مبارك المرى الاخ صدام اليامى الاخ سعيد الخاطرى الاخ مبارك العازمى الاخ هادى الجابرى لاهنتوا يالربع والله انكم ما قصرتوا ولكم جزيل الشكر اخوى محمد شورك وهداية الله يالطيب اخذت رقم الدكتور وبطلعه بعد رمضان ونشوف وش يقول ابو سالم وراح انشاء الله اوافيكم بالنتائج اذا فيها تطور ولا اخلا ولا اعدم منكم جميعا |
الله يوفقك وبيض الله وجيه الربع |
أنا عندي لك طريقه جربها منت خسران دام رحمها نظيف مايحتاج تنظف عنها أهم شيء يكون بوقت الهداد تشوف لك فحل هااايج ويكون قد القح ثاني شيء تطرح الناقه وتعطيها ترامسين 25 ملم وإبرة الهيام الفرنسيه بعدها بأسبوع أعرضها على البعير وشف وضعها إذا شفت إن البعير ييكرفها وهو يبي يضربها وهي مازالت تشاول اطرح الناقه وقطع عنها الصيد الزوايد اللحميه بطرف حياها حاجه بسيطه ثم هد البعير عليها وخليه يضربها ثم حط ملح لاقام البعير بحياها وبأذن الله تبشرنا بلقاحها ملحوظه حاول تحط الناقه بشبك لحالها كل هذي المدة وكل يومين أو ثلاثه أدخل البعير عليها وشف الوضع واعمل ماقلت لك عليه ا |
اخوى عيد المنصورى الله لا يهينك على المرور الطيب لكن انت ما ادليت بدولك فى هذا الموضوع وانت ماشاء الله عليك من اصحاب الخبره والتجربه وما نستغنى عن رايك ومشورتك الله يرحم والديك عن النار وانا فى انتظار الرد ولك جزيل الشكر |
الاخ خالد الحجى لاهنت وبيض الله وجهك وما قصرت والطريقه راح احطها فى الحسبان والناقه هاذى بتطبب فيها وجرب اشوار الجماعه ان لقحت ولا ماضرها الجمل والله يكتب اللى فيه الخير وللك منى جزيل الشكر |
| الساعة الآن 10 : 10 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |