منتـديـات مــزايـن - سقنا العشاير في ضحى ثاني العيـد***ماعد ابه مقعاد والعشـب قـد فـاح

سقنا العشاير في ضحى ثاني العيـد=ماعد ابه مقعاد والعشـب قـد فـاح

سقت الجمل واخذت من خفه القيـد=وقامة توالا جرد الارقـاب طفـاح

قامت تهوم البيـد وتصخـر البيـد=ذرعنهـا للبيـد جـاذب ومـيـاح

قات تهوش الارض عري العجاريـد=تقول يشعفها على المشـي صيـاح

نبـي نسـوق مخـازرات المفاريـد=كبار الضهور مشجعت كل مصلاح

كبار المثانـي والغـوارب مسانيـد=وساع المناكب والعضيدات شطـاح

قفرن مثـل لـون الـدلال البغاديـد=ذهان الوجيه اذانهـا كنهـا ارمـاح

وضهورها مثـل الرجاجيـل قعيـد=وذيالهـا فـوق العراقيـب لـفـاح

صعكن عريبات المناسـب واتاليـد=ماجمعوهـا بالتجايـر والاربــاح

كسبـن لهلنـا بالنمـش والعباريـد=الي ثار عج الخيـل والـدم سبـاح

نرعى بها مـع نجـد دار الاجاويـد=ونتبع هواها بين مضـوا ومـرواح

من جاضع المشقوق جذبت بتشديـد=من لايعرف الدار نعطي له ايضـاح

اول معشـى عنـد قصـر البويليـد=بطراف شرثه بين وادي وصحصاح

وثاني معشى من وراء نفي والحيـد=وادي الرشى تاطاه مع وقت الاصباح

تبي تعدا السـرك وهيـه عراجيـد=حتى تحـول بيـن لينـه والاسيـاح

ليامن عشب الوسـم جالـه عناقيـد=نرعاه ببواشـن عليهـا النعـش لاح

ثلاثـت اشهـر ربعـة دون تحديـد=لين الوبر طير من الزود ثـم طـاح

والي كتالت المرباع راحـة ملاهيـد=قامـت تناقـر للهبايـب والاريـاح

والي زاف نبت الصيف جتله مسانيد=ماعاد تقبل مرتـع النفـد ياصـاح

مس الشداد وحـط عزبتـك يافهيـد=على البعير وخل ممشـاك مسـراح

طول لها الشده تراهـا تبـى بعيـد=لاتضوي الاوقـت مهجـاد ومـراح

سودً تقول غيوم مع جرهـد الريـد=لافيه لاصفـرا ولا فيـه مضيـاح

تبـي ديرهـا والعـرب والمواريـد=الي غشاها وابـل الصيـف بجنـاح

ماحدر المشقـوق واجنـب بتحديـد=الى النعيم وخشم جـذوان وصيـاح

دارن مسس وبجالها يرتـع الصيـد=ومدهال خلفـات وعشايـر وطيـاح

الشاعر:سهل بن نايف الكسر المرشدي العتيبي