|
البل استفسار السلام عليكم ورحمة الله وبركاته صبحكم الله بالخير جميع اخواني انا اجهل في البل كثير ولا فيها عيب الانسان يتعلم وابي اعرف وش مسميات البل من الحوار ليا الهرش . والمنايح وشهي والمقنوي هل يقصد بها للبدوي القنّاي والعشاير وشهي مفردها المعشر واللقحه ؟؟ ياليت تعلموني لاني ودي اشتري لي ابل ( دراهمه ما عاد يدري وين يوديها ) وش الزين فيها : المجاهيم والا المغاتير وسلامتكم |
اقتباس:
اقتباس:
يالله حيه ترحيبه شمر وشلونك ياعمار القحطاني وابشر بالاجابه مسميات الابل حوار ومخلول ومفرود ولقي وحق وجذع وثني ورباع وسديس وتام وبعده هرش او فاطر والمنايح الابل قليله العدد المعده للحليب والمقنوي هي ابل اهل الباديه لغرض الانتاج او الولع نعم يقصد ماقلت والعشاير هلي الخلفات اللتي ولدها تعدي ثلاث شهور ومفردها عشراء واللقحه مايحتاج اذا الدراهم مبلشتك ازهل وضعهن اصرفهن لك هههههههههههه وكل لون من الابل فيه زين ووميزات تقديري |
هههههه الله يحييك ويبقيك ونعم فيك وفي شمر قبيلة عزيزة علي جداً وبيض الله وجهك على المعلومات وجعل الدراهم فداك يالغالي نسيت اقولك الحشو وش معناها بعد وبالنسبه للمسميات كم يعني حوار سنه ومخلول سنتين ومفرود ثلاث وهكذا والا كيف ؟ |
يامرحبا ترحيبت بني رشيد(عبس) ياعمار ياصبي قحطان وخوي الشمري ماقصر بالجابه وانا اضيف له لتوضيح فقط الحوار واليا تم سنه صار مفرود واليا تم سنتين صار حق(ياقاله عند البعض شايف اخوه)واليا تم3سنين صار لقي والياتم4سنين صار جذع واليا تم5 سنين صار رباع واليا تم 6 صار سديس وبعده هرش اما الحشو هو جمع حاشي وهو الحوار وسلامتك اي استفسار حنا جاهزين وابشر بالجواب اليا سألت ولاتردد بالسؤال انشد وزهل الجواب ولاهم مقصرين الاخوان اللي بالمنتداء اما بالوان اانا من ناحيتي افضل المغاتير احسن طبع ولاكن المجاهيم اكثر حليب |
محيميد تبقا يا ابو مرحبا ونعم بك ونعم في رشيد كلها وبيض الله وجهك على الاجوبه الشافيه وحمستني للمغاتير |
مرحبا بعمار يالله حيه وحي ملافيه الاخوان ماقصروا بيض وجيههم وعشهم ودخن لهم الملفى ياراع الكار والطويلة والبل كلها خير وكلن له ميزة لكن لا تشتري وانا ودي لك الخير إلا من بعد ما تتعلم الاساسيات في البل مثل ما تفضلت باسئلتك عن المسميات ورايي تاخذ لك زوعات للحراج ووقت ما يحرجون على البل وبتعرف أقيامها لان لو غامرت بشي ما تعرفه فعز الله تندم إنك طبيت بالبل وهذا بالبل وغيرها فمن خلال وقفتك وقت ما يحرجون بتعرف أسعار الخلفات والعشاير وغيرها وبتعرف أقيام المقنوي وأقيام المقاصيب وهلم جرا أتمنى لك التوفيق يا عمار والله يسمح دربك |
عالي الله يبيقيك ويحييك يالغالي بيض الله وجهك على النصيحة ووجيه الاخوان . شاكر لك |
| الساعة الآن 13 : 02 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |