القعود مايقوم
 

السلام عليكم ورحمة الله وبركاته
يالربع عندي قعود عمره شهرين ونصف له خمس ايام مايقوم حتى لو نرفعه يطيح مايرتكي على ايديه ,
كنت عازله عن امه في شبك صغير وطلعته قبل خمس ايام من شبكه مشيه ماهو متوازن يروح يمين و يسار ,
ثم تدرج للأسوى يمشي كم متر ثم يطيح والحين مايقوم نهائي ,
جبتله البيطري وعطاه زي المغذي في رقبته مع زيت في فمه ومافي نتيجه ثم عطيته ابرة مضاد ومفاصل في اللحم وفيتامينات في فمه ومافي فايده علما انه يشرب وياكل ويذرق طبيعي ( الله يكرمكم )
غسلته بالجره وكويته لاكن مانفع ...

وجزيتم خيرا..........

يالربع وش السواه ؟؟؟؟؟

فتش القعود يمكن فية حبنان اللي اهو الحلم الصغير

واذا لقيتة غسلة بجرة صبح وليل

وشلون حرارة القعود ؟؟؟

الظاهر انها ماهي بطبيعية

الله يجزاكم خير على المرور .
الحوار جبتله البيطري وقال فيه حراره وعطاه علاج بس مانفع .
وش اسم علاج الطير لاهنتم واعراضه ؟
واحد قالي فيه الطرق وش رايكم يربع وش اعراض الطرق ؟

مااتوقع إنه طير دام إنه ياكل ويشرب طبيعي يمكن فعلاً فيه طرق ( لين) بالمفاصل تاكد فيها شيء ؟؟؟

فيتامين ه او e selenium مع b1

ان كان حرارة ابي اعلمك بس تراني ماجربتة اللي جربة واحدا

من العيال والحمدلله يقول خمس حبات فيفادول تحطها في علبة الماء ابو نص

وتعبي الماء اين حد الورقة من تحت وترج العلبة لين الحبوب تذوب

ثم طال عمرك تعطي القعود على جرعات ماهو تصبة في بطنة كلة لا

تعطية جرعة ثم جرعة ثم جرعة وخل القعود يتطعمة

وشف وش يصير ورد علينا

والله يوفقك ويعقل عليك

مساء الخير .......
الحوار الله يعوض بخير مات .
لاكن وش رايكم في الايام هاذي كم الساعه اشمل الخلفات وكم الساعه افكها اذا كان عمر الحوار ثلاث شهور ؟

الله يعوضك خير يانايف
وبعدين وانا اخوك شفلك بيطري فاهم ( من غير شر على حلالك وعساك ماتحتاجه ابد )
انا قبل ثلاث اسنين صار لي مثل هالحاله في حواره أخذت ثمانيه ايام ماتقوم وان امها سبحان الله تجي فوقها وتفوحج وترضعها وماخليت عنها شي في العلاجات الشعبيه وآخرتها جبت لي بيطري وعطاها ابره في الوريد وقال نص ساعه اوساعه وتقوم والله ماكملنا ربع ساعه إلا وهي قايمه بأمرالله والحمدلله
وفي البدايه والنهايه كل شي بيد الله سبحانه ،، وحنا نفعل بالاسباب .
وأذا احتجت اي شي استفسارات او اسئله عن حاله اوعلاج عندك اخونا عيد المنصوري ومن غير اقصور في باقي الاخوان تراه فاهم ومايقصر الله يجزاه خير

أما بالنسبه لسؤالك عن تشميل الخلفات
مثل ماتخبر حنا الحين في عز القيض وماودك ان الحوار يرضع في الحر
شمل الخلفات من الساعه 10 او 11 الصباح وفكهن لعيالهن من بعد العصر
الله يوفقنا وياك ومن يقرأ .

الله يعطيك العافيه ياعادل ويبارك في حلالك .
وش رايك من افضل بيطري في الجنادريه عسانا مانحتاجه .....

عندك طال عمرك صيدلية الصحراء بيطري اسمه زكريا 0503181404
وفيه واحد في صيدلية الفحول الظاهر ان اسمه محمود

الله لايحرمك الاجر ياعادل لاهنت .....

معوض خير وجعلة فدوة لراسك

تسلم يابدر ومشكور على المرور .