وش بلى الناقه؟؟؟
 

مساكم الله بالخير

فيه واحد من أخوياي اتصل علي ووصف لي بلى ناقه عنده

إنها قبل 3 أشهر وهي ماهي بخير يجيها مثل حالات عدم الاتزان وإنها تبرك وتتشنج لمدة 10 دقايق ويغيب نفسها فترة دقيقه حتى تقول إن الناقه ماتت وبعد 10 دقايق تقوم المهم هو كواها عن الطير براسها وخفت هالحاله لكن الحين عاودت عقب اكثر من شهر على نفس حالتها في التشنج لكن اخف من اول

أحد فيكم مرت عليه هالحاله وش هو المرض وهل له علاج؟؟؟؟؟

أول مره أسمع بهالحالة اخوي خالد

مار تبي علمي ..؟

خل خويك يقرا على الناقة ويرشها بالماء المقري فيه ..

مادام الدعوى فيها تشنج .

الله يجزاك بالخير ياطلال
وننتظر باقي الآخوان اللي مرت عليه مثل هالحاله ؟؟؟

عطها ابره الطير اللي قوتها خمس ميه فتامين ب ناسن اسمها لكن تحصلها عند بعض المحلات البيطريه بسعر 130 وابرتها تعطى عن طريق الوريد فقط غير الوريد ماتنفع لها 17 سنتيمتر كل يوم لمده 4 ايام وانشاء الله تسلم

الله العالم أن الناقة بها طير

وفيه علاج للطير .. بإذن الله راح ينفعها.

وسلامتك

الناقه على كلام الأخ / خالد تصحي من التشنج بعد عشر دقايق . ولا كأن جاها شي , لو هو طير كان تبتل على هالحال ولا تصحي ولا تتزن . لكن مثل ما قالك أخونا / طلال الروقي أقراء على الناقه . والله كريم

هذي كانت عند واحد من الجماعه نفس الحاله واخذت لهل سنين بعدين طابت من الله بدون اي علاج

ووالله ياخووي اول مرة تمر علي هالحاله لكن اتوقع علاجها اذا مخاب ضني الكوي
ولكن بستفسر لك وبرد لك خبر ولي عودة انشالله وشكراا

قد حصلت الحاله ذي عند واحد من الربع

ولافاد معها الا القرايه والماء المقري فيه

وعقبها سلمت


اسأل الله تعالى ان يشفيها

يابدر إذا أمكن تجيب لي اسم العلاج بالتمام ؟؟؟ ووين يباع ؟؟؟

الله لايحرمك الأجر إن شاءالله والأخوان

الحمدلله والصلاة والسلام على رسول الله وعلى آله وصحبه أجمعين هذا الكلام الصحيح وبيض الله وجهك

الله يجزاكم بالخير
بنجرب ابرة علاج الطير وراح أعطيكم المستجدات أول بأول على كلام الرجال غن لها الحين لأكثر من سنه على هالحاله كل شهر أو شهرين تجيها مره وحده ...

اخ خالد العلاج مااعرف اسمه بالظبط لكن هو فتامين ب قوه خمس ميه بتحصله انشاء الله في الجنادريه في بيطريه التويجري قله عطني علاج الطير تحصل مكتوب عليها 500 vitamin_ب وراح يقولك عطها باللحم عشره سانتي بس معليك منه عط الناقه 17 سانتي بالوريد كل يوم بنفس التوقيت ترى العلاج فعال وخطير لازم يمر اربع وعشرين ساعه ثم تعطيها الجرعه الثانيه وهكذا لمده اربع او خمس ايام

انصحك يا اخوي بالقريه الشرعيه .. لانه نفس الحاله كانت وياي ..

بس انا متاكد من اسبابها .. هاهاها .. اسبابها مر علي شايب وانا اقود الناقه للبعير .. وبقولك قصتها باختصار جدا .. الا وقف وقفه قدامي وقال كلمته .. ولا الناقه ما كملت والله شاهد علي دقايق ولا انها تترنح .. وتطيح .. ولا حسيت من الله توصل للشبك .. وتضربها حمى .. وبركت وطاحت طيحه قويه قلت انها ماتت ..

وتميت اقرا عليها المعوضات وارشها بماي ..

ولا راح عنها لين مريت على الشيايب وقلت له يرد الشهاده على وجهه .. ويذكر الله عليها .. ومسكين استحى رغم انه سنين جدي ...بس غاب وقتها المستحى لانه الموضوع فيه موت مخلوق وبسبب واحد ما حط في باله انها صايبها بعين

ولكن للاسف .. بعد كمن شهر .. كرمكم الله ضرب عندنا هديد " تيس" بعين .. فجر بطنه وقام كرمتوا البول يسري في جلده مسرا الدم في العروق ..

" الله يصلحه ويهديه "

بس على فكره انا الوالد كان يعطيها قهوه .. ونس كافيه .. وقامت تعق ياللي في بطنها من تبن الله يعزك قطع قطع ... ومن بعد ما رد الشايب عليها .. قامت والحمد لله بخير وعافيه