|
إلى براسك يااسمح الوجه حبة فتحمل مايجيك من القطلة ولا تزعل مرحبا ياعزاز هذا الموضوع وضعته على الفحول المتعاركة وعندي سوال : وش لون يفرع الراعي فحوله ؟ جواب كل راعي . أكيد العصا . طيب مادام العصا وسيلة مهمة عندي سوال : وش هي العصا اللي ماتخون ولا يجزعها قو الطق ؟ الشقب / وهذا العود صامل والى كسرته نشقت منه مشموم طيب ومناشيه بالجبال والشعبان وتنوشه البل وتحرص عليه ويستقطرونه العرين والطرفا / عودها قوي ومناشي الشجرة بالوديان القرظ / شجرة طيبة و اغلب مناشيها بالشعبان وعودها من أصمل عيدان الشجر وهي من مراعي البل وزهرها يجبل في توالي الصيف ونواصف الخريف وثميرها يقال عليه ســــــــــنـــــــــف الشوحط والشاحط / يستعصى به ويستحطب منه ويستقطرونه والغالب في مناشيه على فروع الجبال واحسنه اللي يكون بالحقو النشم : صميلة عود والعرب لا امدحوا قالوا ( فلان نشمي ) يشبهونه بذي الشجرة لعودها الطيب والجيد النبعة / عودها بالحيل صمل وأكاد اجزم ان أجود العصي منها السراء ثم السلم والسمر بهذا اكتفي واللي عنده زود نحييه على الزود ومشكورين |
عليك طال عمرك بالعجراء عز الله مهيب خاينه ولا جازعة والله يكفينا الشر وللامانة اغلب الاشجار الي قلتها نسمع بها ولا نعرفها لعدم توفرها بمناطقنا ويعطيك العافية يالعامري تحياتي |
وانا جارك ياوافي الله يكفينا من الشر ويلبسنا العافية والله يسلمك ولاهنت يابو مليح |
لاهنت ياعالي على المعلومات اللي ذكرتها واغلب الشجر اللي ذكرته ما يتوفر في نجد اتحفتنا بمعلومات جديده والى الامام |
اقتباس:
ولا انت ياخوي مانع وبارك الله فيك تحياتي لمرورك |
بيض الله وجهك ولا هنت على المعلومات القيمه . |
اقتباس:
ووجهك أبيض ياولد وايل ماقصرت على المرور والتعليق وشراتك يقلط له السمينة وينفل حجاجه |
سلام عليكم فيه طريقه ثانيه البازين!!!!! اخذ طاسه فيها بانزين ورشها على وجه البعير وعلى خشمه والله يكفينا الشر |
لاهنت على الموضوع |
أيضاً هناك شجر الشوم .. ومنه أجود أنواع العصي في نجد . شكراً لصاحب الموضوع . |
اقتباس:
وعليكم السلام ورحمة الله وبركاته حياك يابو حزام وما قصرت على الفايدة الطيبة بس خوفي يطب البانزين على عينه ثم يخلف الله على عينه ونصير مثل ما قالوا بغينا نكحله فأعميناه لكن أكيد ما قلتها إلا وأنت مجرب ومتحاشين البانزين عن عينه وراع الفحول أكيد ما تفارق العصا من يده لكن العصي تفرق منها الزين ومنها الشين ورايك وراي كل طيب شرواك إن راع الركاب يجود عصاه وتكون عصاه شبه العتلة قوية حيل ويكون طولها مناسب عشان لا قدر الله صارت هيه بين الفحول إلا وهو جاهز ويودبها ومن هذا المنطلق كتبت الموضوع عن العصي والطرق في التفريع بين الفحول واجدة ومنها إللي ذكرت وهو البانزين أشكرك على المشاركة والفايدة القيمة والله يبارك بعمرك يا محمد |
اقتباس:
|
اقتباس:
وماقصرت على المرور والإضافة الطيبة والله يبارك فيك |
بيض الله وجهك على المعلوماات والموضوع الراائع اذكر مره تهااوش فحلناا مع فحل ثااني وبرك علييه فحلنااا وبغااا يذبحه والله انه مااقاام لين خلينا عرنوونه عجيين اللي هو خشمه ضربنااه بالعصا والعجراا ماانفع وااخر شي بحدييييييده لين قااام واخذ بالشبك حوول 3 شهوور وهو وجعاان وبعدين طااب وللله الحمد لاهنت وااسف على الاطاااااله والشطحه شووي ههه |
ما من شطحة يالغالي إلا بيض الله وجهك على السالفة والحمدلله جات العاقبة سالمة وله الشكر على معافاة بعيركم وتسلم ياابن صنيتان ولا هنت على المرور الطيب والله يبارك فيك |
| الساعة الآن 54 : 11 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |