يالربع ذبحنا القراد
 

السلام عليكم ورحمة الله وبركاته مساكم_صبحكم الله بالخير

يالربع وش علاج القردان أبي وصفه سحريه رشينا عليها سم وتجلس يومين إلا والقراد كما كان:mad:
أفيدونا جزاكم الله خير

وبيض الله وجيهكم على كل حال

مالك حل الا انك تغير المراااااااااااح

بيض الله وجهك أخوي خالد
بس خلنا نشوف الشباب يمكن عندهم طرق لتخفيفه من المحل

رشها بالجاره ورش المراح وان شاء الله يروح وان كان ما فيه فايده جدد المراح

اطلع من الحمض
وصدقني ماتشوف قراده

القراد موجود في كل محل

ولو ترش جاره بيخف ثم يرجع كما كان


..

خذ لك قار وإلبس دسوس وحط الإبل في مكان إصفية ضرسة بحيث ماتقدر تتمرغ فيه ويخرب طلاهاوتخليها أسبوع في ذا المكان أو يومين إن كان هناك مايكدرصفوك ثم إطلها زين وكثرعليها الطلا في دواخلها وقول طال عمرك ( إن كنت طال العيس فاطلى روسها *** ترى كثيرة الشحم بين ضروسها ) عشان تتحمس وتونس بها البل وأفضل وقت الطلا يكون في الصبح وبتحصل نتيجة الطلا وانه أحسن من الجارة وحتى شعرتها تتزين مع الوقت والسموحة في الإطالة لكنها عملية ناجعة 100% بإذن الله

تحياتي للجميع

يجب تكرار الرش وزيادة تركيز السم بالماء حيث القراد لايموت حتى
يمتص السم من دم الحيوان الا من بعض المبيدات اللتي تقتله بالملامسه
بعد فتره من الرش لتوفير الوقت والجهد رش البل كل اسبوع
وسوف يتناقص حتى ينتهي وهذي علة العزب المقيمه والشبوك

السلام عليكم فك دجاج في العزبه وانسى القردان للابد

كما قال اخونا محمد عليك بالدجاج فكه في العزبة ( هذي الاولى )

والقراد اللي في البل عليك بالبخاخ حق النامس والذباب ريد ( مجرب شخصيا ) ممتاز للغاية .. ( هذي الثانية )

والقراد اللي في المراح عليك بالجره المركزة يوميا لمدة أسبوع .. ( هذي الثالثة )

دجاج !!!!!!

معلومه جديده


لاهنتوا وتشكرون عليها

وبجربهــا

..

صدق من قال دجاج ؟؟؟؟؟


بس هل يعيش مع البل دجاج

يمكن تجفل البل من الدجاج .....

و يمكن يجي كلاب وقطاوه وثعاله وتاكلها ؟؟؟؟؟؟


طيب يمكن يفشلنا عند الضيوف اذا جو عند البل

بس والله حلوه فك دجاج مع البل ههههههه

هههههههههههههههههههه

صدقت

يالربع انا جيت رجال والله انه حاط الدجاج في شبك الابل وان الدجاج يمشي بين الابل ومن تحتها ولا تجفل منه الابل وسألته قال علشان القراد ويقول انه مفيد جدا للقراد......اذا كنت راعي شبك فالازم تغير الشبك دايم .....وترش الجره كل اسبوعين ولاترش الخلفات اللي تشرب من حليبها لان الجره تجيب امراض خطيره للانسان مثل السرطان اعاذنا الله واياكم والمسلمين واكتف بانك تفتش يوميا بيدك في نحورها وديودها واذا لقيت القراده اوالحلم لا تحذفها في المراح وحطها في مويه صحه ممتلئ اكثر من النص وسكرها .....واذا كان الابل فوق الخمسطعش ومعاها وايتن كفو فخلها تضرب صحاري وفيافي نجد وامتنع من الشبوك لانها دمااااار الابل .وتقبل تحيات اخووك يالحقباني ....