نفخ الرحم بالهوا
 

السلام عليكم


عندي ناقه تيسر وحالها زينه لكنها حايل من سنتين ومن عادتها اذا هدينا الفحل تطلع من البل ولاتقرب للفحل ابد ابد

يالله نحدها عليه عشان يضربها نظفت رحمها وما خليت ابره ما جربتها حتى التثبيت جربته ما نفع

حتى الصيد قطعته لكن ابي اعرف كرها للفحل

وفيه رجال قالي جرب نفخ الرحم يعني احط لي لين اوصله داخل الرحم وانفخ لين تحس الناقه كنها لقحه يقول خل الفحل يضربها

بس ما جربت لان الناقه غاليه بالحيل عندي وثمنها غالي بالحيل ابي سؤال اذا احد جرب طريقه النفخ يفيدنا الله يجزاه خير

أول مره أسمع بالطريقه هذي

مشكور على المرور وننتظر اذا فيه احد جرب الطريه هذي

اللي نعرفه ان رحم الناقه حساس جداً ....

واول مره نسمع عن هذه الطريقه ..


نصيحيتي لاتجربها ..

يا ولد ليس كل مايقال صحيح ورحم الناقه من السهل ان يفتقه الهوا لانه حساس وناقتك جرب تطردها بالموتر كيلو وردها للعزبه وخل الفحل يضربها على طوول وبعدها اكوها على عجمة الحيا تلقاها في شخرها اكوها بعد الضراب
اما نفخة الهوا بتذبحها لان الحركة ذي يسوونها هل الخيل وبعض الخيل تموت منها واذكر لك واحد انعكمت ناقه كبيرة عنده وحط في مدمنها ماء بضغط الهووز وجلست ساعه وماتت على طوول ان كانك ترجي لقاحها فاتركها من ذي الحركه والسلام ,,,,,,,,,,,,,,,,,,,,,,,,,

السلام عليكم النفخ يكون بطريقه خفيفه انك ادخل لي صغير في بطن كفك عشان ما يجرح الناقه وتنفخ بثمك مرتين او ثلاث ولا يضرها ابد بس لا تستعمل منفاخ او طرمبه هوا وسلامتك

عليك بوصية اخوك ذيب وابعد عن غيرها اذا تبي ناقتك

كلام الرمزاني سليم النفخ خفيف عن طريق الفم ودايم يسوونه اذا الحافضه متسكره وهاذا الي يخلي الناقه تهاب الفحل
لاكن فيه طرق بديله اطرد الناقه لين تفحم وضربها البعير مباشره وخنقها بحبل خلال ضراب البعير لها اما النفخ يبيلهه واحد عنده
خبره في الادخال

الف شكر لكل من مر وعلق لكن اذا فيه احد مجرب يفيدنا

اخوكم عبدالعزيز المطيري

الى الان انتظر الاخوان اذا فيه احد مجرب الطريقه هذي

مساكم الله بالخير
الاخ عبدالعزيز
بعد التحيه :
النفخ طال عمرك طريقه مجربه عند هل البل كلهم وطريقه قديمه وفوايدها مضمونه بعد الله
وانا مجربها شخصيا اكثر من ثلاثين مره وابشرك 95 % نجحت وتعشر الحيل عقبه .
والطريقه طال عمرك خذ ( لي ) طوله نصف متر تقريباً وفتحته طال عمرك تكون مثل فتحة دبة الماء الصغيره ابو ريال او اصغر شوي منها
وعلبة ملح ساسا ..
و
1/عقل الناقه طال عمرك وفقر لها .
2/ ادخل يدك في رحم الناقه وتعسس على حلقها ان كانت الحلق مضيقها الشحم حاول توسعها بس ارفق بها بأصبعين وحاول توسع على هونك
ثم ثلاث اصابع حتى تحس ان الحلقه توسعت معك .
3/ بعد توسيع حلقها طلع يدك منها ودخلها مره ثانيه حتى تلمس الحلقه ان كانك تحس انها مرتفعه فوق حاول تضغطها وتنزلها تحت بس ارفق بها
لان مني البعير اذا كانت الحلقه مرتفعه بينزل من رحمها ماهو بمستقر .يعني نزلها حتى تحس ان يدك تدخل سيده ما تطلع فوق .
4/ امسك اللّي وحطه في بطن ايدك ودخله على هوووووونك لا توجع الناقه ودخله طال عمرك حتى يبقى منه عشرين سانتي برى اقل شوي او اكثر على حسب جرم الناقه وعرض جنبها
وبعدين صب داخل اللّي تقريباً اللي يملا كفك ملح وبعدين صب عليه ماء حتى يمتلي وبعدين جر نفس وانفخ حتى يروح كله داخل رحمها وكررها مرتين او ثلاث مرات .
5/ طلع اللّي منها وافتشها ان كان فيها وذم ( زوايد ) قطعها بالموس وانتبه لا تقطع واجد وبعدين حط في يدك ملح وافركه علىيها من شان يطيبها .
6/ يومين او ثلاث ايام وفك البعير على الناقه .

وانشاء الله تعالى بواقع تجربتي انها تلقح على طول باذن الله .
اتمنى اني افدتك .

الاخ علي بن محمد الصقور بيض الله وجهك ومشكور على الشرح

بس مافيه خطر على الناقه؟

ما رديت يابو محمد

ومالنا غنى عن

الدكتور عيد المنصوري

ننتظر اجابته علميا

معارض للطريقه هاذي واعتقد استخدام المضادات الحيويه وابرة اليسره تغني
حيث تحتاج هذه الطريقه لخبره طويله ويمكن ان يؤدي الملح الى التهاب الرحم

الرحم رقيق ومنطقة حساسة جدا واستخدام الملح قد يجففه ويسبب له تهتكات

والملح بشكل عام مضر في المناطق الرقيقة

وعندي استفسار من الاخ : عيد عن نوع ابرة التيسير المستخدمة

ودمتم سالمين