وش الحل الناقه ضربها الراعى
 

يالربع جزاكم الله خير عندى ناقه ضربها الراعى وهى محور وولدها صغير وصارت ما ترعى مع مع الابل بس تسرح الابل وهى تهرب لحالها وكل ما ردها الراعى تهرب صارت تخاف خوف غريب والحاجه الثانيه كنا نحلبها ولا تقول شى يوم ضربها الراعى ماعاد قدرنا نمسك جدرها وش الحل وش السواة تكفون يالربع كيف اهدى نفسيه الناقه لانه صارت نفسها شينه وشلون اردها لحالها الاول ؟ الى عندة علم لا يبخل علينا الله يخليكم

اكفخ الراعي وقل له لا يطالع فيها ولا يلمسها وحط الناقة المحور في شبك مع حوارها بشرط ان الشبك يكون مغطى بحيث ان الناقة ماتشوف أي مخلوق وخلها لين اسبوع حتى تهدى نفسيتها وادخل عليها ودارها مداراه اثناء حلبها وامارضت
وهدت فعليك بالعقال واما فاد فعليك بالقيد مع العقال حتى تعرفك وتعرف طيبك معها وباذن الله تهدى

الراعي اللي يضرب البل وشتبابه ياخوي البل كريمه ما هوب كفو يسرح فيها
وناقتك اجها لحالك وعطها الخبز وقردلها وان شاالله مده بسيطه وتركد

الاخ على العمارى الف على مرورك

الاخ محمد الله يجزيك خير وشكرا على مرورك بس الناقه صارت جفول والا احد يقرب جدرها

ويش تقصد بجدرها

جدرها يعني ديسها يا علي
واول ما تبدى براسها يا موسى لا طرحته بالخبز وقاردت معك ايام بعدها لمس ديسها على خفيف وحككلها والله يعينك

اطرد الراعي

اوافق اخوي هذال الراي
اقلعه عنها لا عاد تشوفه وبتهدى نوعا ما ولاهوب كفو يرعى في الابل الي يضربها وياليتك ضربته عز الله انها حلت

وثاني شي خلك انت معها لحد ماتهدى لاتتكل على الرعيان وقارد لها فترة وعطها خبز ونادها بسمها ولا تحلبها هالايام نهائيا

وباذن الله تعود لطبعها

مرحبا ياموسى ولو كل راعي يضرب البل يطرد مابقى احد منهم اهل الشغل وش يسوون مايقدرون يخلون اشغالهم ويرقبون الرعيان. الرعيان يضربون البل بس الخط الاحمر لايتعدونه ضرب الوجه . السؤال هل عندك خلفات غيرها؟؟ الخلفه تدور الخلفات واما الحلب حتى الناقة اللي تحالب الاسبوعين الاوله تستنكر الحلب الا ماقل منها والناقة تبي واحد ما يتقدم خطوه ويرجع ثلاث تك للخلفة مع الربط واحلب .