منتـديـات مــزايـن - لقاء مع الشاعر نايف بن عصاي العتيبي

السلام عليكم ورحمة الله وبركاته

الاخوه الاعزاء الكرام اسعد الله ايامكم بكل خير

لقائنا اليوم مع الشيخ الشاعر نايف بن عصاي العتيبي
اللذي كتب اسمه من قديم الزمان وحاضره بماء الذهب وحافظ على موروث الاجداد وتعلق قلبه بحب الابل وبكل علم طيب وغانم

استضافنا واحسن اكرامنا وضيافتنا وهذا غير مستغرب من ابناء قبيلة عتيبه الكرام
واعطانا من وقته من اجلكم اعزائي قراء ومتصفحين منتدى مزاين من اداره واعضاء وزوار

اتمنى ان يحوز اللقاء على رضاكم وان ينال استحسانكم

تستطيع أن ترى الصورة بحجمها الطبيعي بعد الضغط عليها

صوره في مجلس ابن عصاي

موقع مزاين : نحييك يابوخالد بين اخوانك رواد وزوار موقع مزاين

بن عصاي : الله يحييكم في محلكم وهذي والله الساعه المباركه يوم شرفتوا محلنا

موقع مزاين: ماهي الاذواد اللي قناها ابوخالد ..؟

بن عصاي: قنيت المجاهيم من عام 1398 هجري ثم بعتها قبل غزو الكويت باشهر قليله
ثم شريت الشعل واخذت معي فتره وبعتها على اخوي
ثم شريت صفر واخذت معي سنين وبعتها على الاخ نايف بن غاطي المطيري
وهو رجل مشهور حقق ارقام متقدمه في مزاين ام رقيبه
ثم شريت لي ذود وضح واخذت معي وقت ثم بعتها
والان كما تشاهد وضح منقيه من فضل ربي واكرمه

موقع مزاين: هل الابل سهل بيعها ومشتراها ام هناك معاناه و فرق حسب تجربتك الشخصيه..؟

ابن عصاي: اكيد فيه معاناه وفرق فالبيع سهل والمشترى صعب
حتى قديما كان المشترى فيه معاناه اما الان اذا انطلقت الابل من يد راعيها
فمن الصعب استعادتها

موقع مزاين: هل الناس في مشترى الابل انواع..؟

ابن عصاي: طبعا ...فالناس في مشتراهم ينقسمون الى ثلاث اثلاث
الثلث الاول صعب احد يطوله لانه راح مع اهل الدراهم لانها تجاره لهم
الثلث الثاني زين انك تقناه وهو وسط وفيه وناسه
الثلث الثالث هو اللي ماينفع وصرف الدراهم فيه خساره

موقع مزاين: هل المزاينات لها تاثير ايجابي على اهل الابل..؟

ابن عصاي :نعم فيها تاثير طيب ومفيد على الجميع لان كل حركه فيها بركه
واكاد اجزم ان 65% اغتنوا عفويا وصاروا اصحاب اموال
من فضل الله سبحانه اخرج من الابل خير وكلن لقا منها خير
من اول ...والله انك تصد عن الابل من شين حالها
واليوم من فضل الله ثم الدوله الله يحفظها في خير ونعمه

موقع مزاين: الان يابوخالد ودنا انتحدث عن منقيه الوضح والفحل المنتج اللي معها
وش اساس الفحل اللي مع الوضح..؟

صورة الفحل

ابن عصاي:الفحل اسمه مزيون وابوه الفاخر بعير بن قويزان اللي اخوه فاز بنوفا عام 24

موقع مزاين : وش اكبر انتاجه عندك ؟

صورة البكره

ابن عصاي :هذي بكره غاليه عليه وصل سومها سبعين الف

وعليه ايضا انتاج طيب من الابكار والقعدان

موقع مزاين: وايضا هنا عرض لصور بعض منقية ابن عصاي

موقع مزاين : يابوخالد عسى الله يطول في عمرك على الطاعه
ودنا نسألك بعد تجربتك الغنيه مع الابل
وش احب الاذواد اللي تفضلها وقريبه الى قلبك..؟

ابن عصاي : الحقيقه ان الصفر هي اللي مازال حبها في قلبي والسبب لان طبعها
فالممشى طيب لان اذا مشيت ماتهتم بحيث اذا جاء وسط النهار شفت
ممشى ماهو مثل اللي في اول النهار

موقع مزاين: طيب يابوخالد مادام جبنا طاري الصفر اكيد لها في قصيدك نصيب
ومنتدى مزاين كله شوق لقراءة ابيات من قصيدك

ابن عصاي: ابشروا بالخير ...........يوم من الايام وجدنا موقع زين للابل
وكان الوقت متاخر فامرت الراعي وهو رشيدي من السودان
بان يطلق المقهور حتى انتغانم المكان ونستفيد من الوقت
فقلت..............

اطلق المقهور واركب يالرشيدي =خلهن يشرحن صدورهنه
زين ميلتهن يم موقعن جديدي= موقعن نظيف ويرغبنه
معليهن لو انه ابعيدي = تلهنه يالحبيب وياصلنه
عزبن تمشي على طق الليبيدي =عايزاتن وصوفهن واطبوعهنه
ان بغيت اقول يزهن القصيدي =وان مشى راعي الرحول يلاخسنه

موقع مزاين: صح السانك يابوخالد

ابن عصاي: صح ابدنك

موقع مزاين: هل من كلمه اخيره تود توجيهها الى ابنائك من رواد وزوار موقع مزاين

ابن عصاي : اشكرك ياأحمد العضيله واشكر اخوانك القائميين على هذا الموقع الطيب
اللي يضم نخبه طيبه من ابناء القبائل اللي اجتمعوا لله سبحانه ثم للعلوم الغانمه
واشكركم على تعبكم لتصوير اهل الاذواد ومقامكم فيها وراعي المقام الطيب
يشكر راعيه ...لاهنت ياأحمد ولاهانوا منتدى مزاين

موقع مزاين: لا شكر على واجب وتعبنا منسي دام قابلناك ووصلنا محلك
وعندي طلب اخير اريد ان اختم هذا اللقاء بقصيده قريبه الى قلب
الشاعر نايف بن عصاي العتيبي

ابن عصاي :

يامل قلبٍ من الهوجاس يلفي = كما يلف الهوى عشبٍ يبس عوده
حسابه اقفا وهو عنه المطر كفي= وطار الورق وأقرشن النود بعضوده
من هم دنياً مغير ندفها دفي = يبحلبها الرجل لو يجيب مجهوده
أركضبها مير ماصارت على شفي = والكبد منها ليا برقت ملهوده
دنياً تخلي ثقيل العقل يختفي = لاصار يفهم بنقص الوقت من زوده
احدٍ تهفه مع الحزم النحا هفي = وأحدٍ تسهله المخراج والعوده
مليت منها وعنها خاطري عفي = حيث ان الأيام فيها شبه محدوده
صيور الإنسان مهما حاش متوفي = ويرجع لما قدمه قدام معبوده
الرابح اللي ليامن الكفن ضفي = يلقى مساعيه عند الرب محموده
في ماقفٍ كل ماسويت ماخفي = تبرز فعايلك بين يديك مجروده

موقع مزاين: صح السانك يابن عصاي

اخواني الاعزاء رواد وزوار موقع منتديات مزاين ارجو ان يحوز هذا اللقاء
على رضاكم وان ينال استحسانكم وان يديم علينا وعليكم دينه وامنه وامانه
شكر خاص لضيفنا العزيز الشاعر نايف بن عصاي العتيبي
والشكر موصول لرائد هذا المنتدى حمد السحيمي والاخ الفاضل مسعود العماري
كما لا انسى باقي اخواني الاداريين ومشرفين واعضاء

تقبلوا تحية اخوكم ومحبكم فالله : أحمد بن عوض بن فضوا العضيله المطيري