|
مشوره من اهل الخبرة السلام عليكم ورحمة الله وبركاته ونشكر الاخوة القائمين على هذا المنتدى ولي بعض الاستفسارات التي ربما بعض الاخوة في هذا المنتدى يفيدني بها 1- اذا كنت ابحث عن الابل المجاهيم ( طبعا )ابل ماهي من المزين يعني عدد فقط فقط اريد فيها اذا هي خلفات كثر الحليب وهشاشة الديد والسن صغير من لديه خبرة كم تسوى الابل من المواصفات المطلوبه واي الاسواق افضل في البحث عنها اسواق الرياض ام اسواق الاحساء |
من لديه الخبرة بمعرفة اسعار المجاهيم اللي ماهي من المزايين يعني جل وصغر سن بالنسبه للحيل اما الخلفات نفس الشي مجاهيم ماهي من المزايين فقط الشرط فيها جل وصغر سن وكثرة حليب وهشاشة ديد تكفون طلب من يعرف اسعارها بحدود كم |
هلا بالاخ محمد الزبيدي اعتقد اخي ان سوق الاحساء سيكون المناسب لطلبك أما الأسعار فهي متفاوتة وتختلف من ناقة لاخرى ولكنها لن تتعدى مبلغ العشرة آلاف ريال تقريبا هذا توقعي والله اعلم ومن لديه معلومة لا يبخل على اخونا الزبيدي تحيااااااااتي للجميع |
الله يعطيك العافيه اخوي خالد السبيعي |
ارحب يامحمد ومرحبابك طال عمرك اما عن سوالك فمثل ماقال الاخ خالد فسوق الاحساء افضل الاسواق من ناحية المناح ..!! اما عن اسعاره فهي تتراوح من 10.000 الى 15.000 وعلى حسب السن والهدايه وبالتوفيق اخوك .. فهد |
نعم سوق الاحساء هو سوق المجاهيم وسعرها مختلف حول كونها هديه ولا لا وكونها خلفه يتخلف سعرها بحسب حوارها اذا كان قعود او بكره هذا ولكن المتوسط لها 10 الاف ريال |
جزاكم الله خير وما قصرتم |
الأخ محمد الزبيدي السلام عليكم ورحمة الله وبركاته الأخوان ماقصروا أعلاه أما بالنسبة للأسواق فهي متقاربة في الأسعار وعليك بالسوق القريب من إقامتك ((الرياض))أو ((الأحساء)) أما بالنسبة للأسعار فتختلف بختلاف مالك الناقة فإذا حصلتها مع صاحبها الأصلي ((جالبها)) للسوق ومحتاج حصلت سعرها مناسب أما إذا كانت مع الشريطي أكيد بتكون أغلى من الأولى وكذلك سن الناقة وجمالها وجمال حوارها وهدايتها ونظف ديدها وسلامته من الخباش وطيب حالها ((سمين أو ضعيف))وسلامتها من جميع العذاريب من بديه وحلل وقلب عصب وغيرها هذه الأمور التي تقيم بها الناقة فالأسواق . ولرغبة الزبائن وكثرتهم دور كبير في رفع سعر السلعه أما بالنسبة للأسعار فتتراوح من تسعة آلاف ريال إلى خمسة عشر الف ريال تختلف بختلاف وجود وعدم وجود الراغبين في هذه الناقة وكذلك وجود وعدم وجود الشروط المطلوبة فيها وسلامتها من العيوب. وتقبل تحيات أخوك فهد القحطاني |
الأمر هين والله المجاهيم عطايا الله للي يبي الحليب صدق وأسعارها حسب طلبك مابين 8000 و12000 وطبعا أضف إلى ذلك هل هي عجور أو لا أو طبعها زين ولا شين وهل هي مسوح وتختلف الأقيام حسب المواصفات السابقة |
الاخ العزيز محمد الزبيدي كانك تريد منايح فهذا افضل وقت لان هذا وقت رخص الحلال الناقه الهديه الغزير قيمتها في المراح 6000 ال10000 وفي السوق زد عليها الف والا الفين ومثل ماقالوا الاخوان سوق الاحساء افضل سوق |
| الساعة الآن 11 : 02 PM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |