يد الحواره إنطرقت ...!!!!
 

السلام عليكم ورحمة الله وبركاته ،،،

لدي حواره شتويه مابها الا الزين الله يستر عليها ، وقبل كم يوم إنطرقت أحدى إيدها بدون مقدمات ، مع العلم [نها لم تعقل ، لأنه اللي اعرفه إذا انعقلت تنطرق إيديها او حداهن ، والآن أبي منكم السبب والعلاج مشكورين .

الاسباب لها اكثر من سبب لكن انت تقول ماعقلتها
يمكن انك عازلها بشبك صغير وهي تبي امهاتها وتدور عالشبك من جهه وحده !!!
العلاج اللي انا خابره الكوي ولا اي واحد يكويها دور لك واحد خبره في الكوي ولا هوب يتطبب
فيه علاج عند الصيدليات بس ماعرف مفعوله
اتمنى اني خدمتك

السلام عليكم ورحمة الله
اخوي خالد
بنسبه الطرق او مايسمى بالين
اسبابه هو زود الشحم للحوار مع نقص الاملاح في ارض نفود
يسبب الطرق لامحاله
العلاج هو بالكي وذا انت فى الرياض ادلك على اللي يكويها
وانا عندي بكار نفس المشكله وكويتهاا والحين لقحات ولابها شي غير اثار الكيه

يمكن انك عازلها بشبك صغير ونطرقة

الطرق ليس له علاج لا كي ولا حبوب الا بمعجزة الهية.والطرق يجي عقب تعقيل او يمكن من الشبك نشبت ايدها في الليل وفكت عمرها او يمكن خمعت البكرة في حفرة او شمعه وقامت تشل ايدها . هناك عدة اسباب وخاصة الحيران والمفرد يكثر الطرق فيها بسرعة .والله كريم الله يسلم بكرتك .

السلام عليكم
اخوي خالد الحيران الي ماتمشي في ارض صلبه معرضه لتطرق اليدين وعلاجه سهل يسدح الحوار واربطه بحبل في يده من فوق قرص
الخف ويمسه رجل نشيط ويكوى برقم صغار في مفصل اليد من تحت وتكون الرقم من جميع الجهات وباذن الله يفكلها ربي

مرحبا هلال بنسبه لطرق اللي يسئل عنه الاخ خالد

ماهو الطرق اللي انت تقصد الطرق عندهم

هو الحرد اللي يصيب من عند الركبه

اللي يطلق على الناقه المصابه حرداء

الاخ خالد ولا يهونون الربع

الربع ما قصروا بيض الله وجيههم كل واحد جاب التجربه اللي مرت عليه

وانا عندي استفسار عن الحاله

هل هي حرده ولا تطراق

لان فيه فرق بينها

الحرده تجي من العقال على قولتك وتبين في المشي بحيث ترفع الحردا يدها اللي فيها حرده الى اعلا اكثر من الثانيه عند المشي

والتطراق تنثني الركبه للداخل اثناء المشي

فاذا كانت حرده يقولون فيه كي لها وانا لم تمر علي هذه الحاله ولكن لها علاج وهو كي دائري فوق الركبه وتحتها والله ينفع بالعلاج وتسلم اكثر الحالات

واذا كانت تطراق فانا مرت على في حوار وجاها لين في الفرسن من فوق الخف وجاها تطراق في الركب في يديها الثنتين

واخذت علاج من البيطري الابره الزرقاء في العضل وعطاني مضاد حيوي يوميا في الفم وعطاني ابره اخرى في العضل لمده خمس ايام يوم بعد يوم

وانا من عندي قيدتها وقصرت القيد خليته ازود من الشبر بقليل وخليتها في شبك يكفيها هي وامها بس وفي اقل من اسبوع شفت السلامه فيها والحمد لله ما مر اسبوع الا تقول ما فيها شي من فضل الله

ولكن خليت القيد فيها شهر واظن القيد من اقوي اسباب العلاج باذن الله لانه يخلي الحمل يتوزع على اليدين ولا يكون الحمل على يد وحده

وبكرتك بتسلم باذن الله وكان ما فيها شي

وانا ما كويت البكره وهالحين طيبه

والكي اخر العلاج

اسال الله ان يعافي بكرتك ويبارك فيها

السلام عليكم ورحمة الله وبركاته ،،،

أشكر جميع الأخوان اللي شاركوا بالموضوع وأفادونا بما مر عليهم من تجربه أو معرفه

بالنسبه لكلام أخي راشد اللي في الحواره حرده وليس طرق مثل ماتفضلت

و جزاكم الله خيرا جميعاً ,,,

مع كلام راشد العرق