نقاش حول الفحول
 

ج 1 : اول انتاج الفحل باول هداده لايحكم على انتاجه . بعض الفحول يكون اول انتاجهن دون , وصغار الحجم .
ومن الخطا الحكم عليه من اول بطنه , احكم عليه من ثاني بطنة
.
ج 2 : لم اسمع ان القعود اللقي يضرب , المعروف ان ان البعير مايهدر ولايهيج الا اذا اجذع .

ج3 : الافضل انك تهد البعير من اول ظهور سهيل حتى وان لم يهيج , خله طلق مع البل , وافضل وقت للضراب هو وقت ظهور سهيل , حتى تولد البل في سهيل الي بعده ويمدي الحيران تكبر قبل اشتداد البرد .

ج4 : مثل ماقلت , القعود مخلف العهود , ماتقدر تحكم عليه انه بيزين ولا بيشين , الدعوة توافيق .

ج5 : حسبت مافهمت من سؤالك ان ماتقدر تحكم على الانتاج هل هو قعدان ولا بكار , مثل ماقلتلك الدعوة توافيق

ج6 : اذا انتاج القعود باول هداده زين , اهده فالبل كلها .


اتمنى ان اكون قد جاوبت على الاسئلة على قد فهمي للاسئلة

وعلى قد خبرتي فالبل .

اخوكم : طراد العتيبي

نقا ش مفيد لكن السؤال هل الفحل منحه 00اي ممكن ينتج عندك ولاينتج عندى طبعاً الانتاج الطيب

حياك الله يابومعيض على الموضوع المميز وبالنسبه لسؤالك يافيصل اقول نعم وهذي حظوظ ووهايب من الله.

لا هنت ياطراد على الرد

ولا هانو الاخوان على التعليق واتمنى اني اسمع رد الكل على هذا الموضع

وحياكم الله

س1- هل انتاج الفحل من اول جوله يحكم على انتاجه ؟
مالك لوا وانا آخوك بعض الركاب يجيك إنتاجها دون في البدايه وعقبها يبدا يزين
ويجيك إنتاجه على مايقولون ( إكه ) ومنها ركاب معروفه وفيه ركاب إنتاجها دون ويبقى دون .

س2- هل ياثر ا ذا اضرب البعير وهو لقي ؟
بعض الركاب إذا هديته وهو لقي يهجره الضراب (يبقى على شكله الحالي وعلى جرمه يعني العمر)
وبعض الركاب العكس والافضل إنك تهده وهو جذع.

س3- اي وقت الافضل بالنسبه لهد البعير في هالسنه ؟
إذا اروح البعير سعد هده يعني إذا طلع سهيل وإذ عاد البعير بطين جدا خله ينجرد وهده
على شان ما ينفتق.

س4- هل تتوقع ان القعود الي سبالته مهي زود وعمره لقي على وشك يجذع تزين سبالته بزود مع العمر ؟
يقولون الشيبان إن زين البعير يكتمل إلين يوصل للثني ويزين إنتاجه اكثر لما يوصل للرباع
ولاهي بكل الركاب.

س5- هل يتوقع انتاج طيب من فحل ساسه طيب وابل زيان على انهم كلهم بكار والقعود اول مره ينهد ؟
علم الغيب عند الله سبحانه وتعالى.

س6- اذا بتحكم على انتاج قعود اول هداد له بتهده بكم من البل ؟
اهده فالبل كلها.
هذه وجهة نظري وبعض من الخبره والراي راي الله ثم راي المطاليق
اخوك حسين الوايلي

حسين كفا ووفا ولاهوب قصور فى الربع

أخواني متى طلوع سهيل بالتاريخ
وفقكم الله

طلوع سهيل تاريخ 24-8 ميلادي.

مشكووووور أخي علي ال مرعي

حفظك الله

دائماً نسمع ان الفحل في اول جوله له يجي انتاجه دون شوي ولا يبين

س1- هل انتاج الفحل من اول جوله يحكم على انتاجه

ج_ الاانتاج توفيق من اللة وعطيك دليل فحل زايد بن هجرس اضرب جذع ونتاجة كفو
_وحصلت واجد ان فحل يضرب ناقة وتجيب بكرة كفو ويرجع يضرب نفس الناقة وتجيب بكرة عادية

س2- هل ياثر ا ذا اضرب البعير وهو لقي ؟
ج_في الغالب يوئثر الضراب في سن لقي على عمر القعود

س3- اي وقت الافضل بالنسبه لهد البعير في هالسنه ؟
ج_اذا عصب بطنه وطلب الناقة عشان ماينبعج

س4- هل تتوقع ان القعود الي سبالته مهي زود وعمره لقي على وشك يجذع تزين سبالته بزود مع العمر ؟
ج_الفحل يتغير شكلة في مراحل عمره ويتوقف اذا شق نابة

من اكثر ما سمعنا ان البكر انتاجها مهو زود ولا يبين انتاج الفحل
س5- هل يتوقع انتاج طيب من فحل ساسه طيب وابل زيان على انهم كلهم بكار والقعود اول مره ينهد ؟
ج_الناقة البكر في اغلب الحالات تنقد على انتاجها والسبب يكون بطنها صغير وتلحض ولادها او بنتها كل مافية صغير
طبعن لكل قاعدة شواذ

س6- اذا بتحكم على انتاج قعود اول هداد له بتهده بكم من البل ؟
ج_ هنا التوفيق من اللة ثم حضك
1_يمكن تهدةبناقة واحدة ونتاجة يكون من النوادر
2يمكن تهدة في 50 ناقة ويكون انتاجة كلة في هل فصلة وسط
(اغلب الفحول المنتجة يجيب في البرق بكرة او بكرتين من النوادر وجزء طيب وجزء وسط وجزء ردي)

وكل هاذا يرجع على التوفيق من اللة

وشكرك على الموضوع

لاهنتو يالربع

واشكر جميع الاخوان

الي عطونا من خبرتهم

مشكور على الموضوع الطيب
والاخوان ما قصروا وما خلو شي

انا معك اخوي عناد

كلامك سليم ومقنع

لاهنتو يالربع على المرور العطر

واشكر من تجاوب معنا وادلى بدلوه في هذا الموضوع