الولادة
 

مادام الناقه بكر فاحرص انك تحضر ولادتها
اذا طلع راس الحوار ويديه اعقلها وجر الحوار ولا تجره بقوه وحاول تكون مسكتك بعد الركب فاذا طاح الحوار وخر عنها وخلها تشم حوارها وتوقف عليه ولا خذت شوي امسحها واحلب منها واحجم الحوار وخلك حولها لين يقوم ويرضعها من كيفه وبعدين تسلك امورها ان شاء الله واطعمها قصب ولا تكثر عشان ما يكثر حليبها على الحوار ويوجعه في بطنه
ارجو اني قد افدتك والاخوان ما يقصرون

لانها البكر يمكن اذا شافت الحوار يتدلا منها ما تبرك وتجفل منه وبالتالي تنفره وتطلع عليك اكثر من بيع السوق ضيار وشغله
فانت تبركها ولا ولدت فك عنها العقال

مع الاخ حمد
اذا ما تبي تعقلها خلها وقت الولاده في شبك مستقل ما يكون وسيع

انا مع الشبك وضد العقال لانها يمكن تعثا بالعقال وتوهن ولاداعي لجر الحوار الا بعد مايطيح اسحبه قدامها واذا تسلت امسحها وارضع حوارها وان كان عندك نية حليب لازم تباشلرها من البدايه علشان تعود وتكون مباشرتك لها ماهو بالقوه بالمهاداه تحلب منها شوي وتوخر منها قبل تحرك وهكذا..

اخوي فارس ارحص انها تكون الحالها لن البل تغير نفس البكر ويمكن تنفر ولدها

فارس من اسئلتك يبين عليك جديد في ساحة الابل وانا خوك ومن غير زعل

الحجامه يعني ترضع الحوار بعد الولاده

اخيك ابوخالد

الاخ الخلاوي :
شكرا على التوضيح ، وانت صادق ، وانا كنت مكفي وقت طويل ، والظاهر اني باغبر شاربي بين الذيدان ـ وبزعجك بكثر الاسئلة ، فلا تقصر معي والسلام0

مع كلام الاخ علي آل مرعي

مع كلام الاخ علي بن مرعي

ومع شجاعتك اخوي فارس في طرح الاسئلة دون تردد

ومع رحابة صدر الاخوان في التجاوب وتقديم المفيد للمنتدى واعضائه

ربي يرزقك بالبكره الغاليه

وبالتوفيق

مع كلام علي بن مرعي
وبيض الله وجهك يا بومحمد هذا الكلام المضبوط