|
حسب خبرتكم وش افضل انواع الوايتات ياخوان خاطري ادور لي وايت للابل ولكن محتار الانواع كثيرة والمواصفات اكثر...وكل راعي معرض يمدح سلعته..وعشان كذا حبيت اخذ شوركم من واقع تجربتكم في استخدام انواع الوايتات. وش افضل نوع اللي لين شريته ماعد انشد عن ميكانيكي ولا ورشة ...وش حدود اسعارها؟ وش اهم شيء اتأكد منه اذا بغيت اشتري؟ وهل المزادات الحكومية او الشركات تعتبر فرصة يتحينها الواحد والا ما تسوى العنوة؟ ون خبر لي احد منكم راعي معرض او شريطي جيد بخيص وراعي ذمه يدلني عليه الله لا يهينكم... وجزاكم الله كل خير... |
افضل الانواع المرسيدس سواء كان عايدي والا سكس والقديم افضل من الجديد من 78 لين 89 ومزاد الشركات انت وحظك |
مشكور اخوي سعيد جعلك تسلم والله يجزاك كل خير،، |
المرسيدس البوز البطيخه عايدي اوسقس ثم المان عايدي او سقس هاذي الموتر اللي تصبر وقطعها متوفرها وكلن يعرفلها واقيامها فيها |
الله لا يهينك اخوي ناصر...واضح ان الكفة تميل بجدارة باتجاه المرسدس...جعلكم تسلمون ياخوان... اقتباس:
|
خذلك مرسدس البي 8 روس 6 نمر |
وعليكم السلام ورحمة الله وبركاتة اخي الكريم تركي اذا تبي نصيحتي اخذ لك سقس من موديل 80 الى 84 العايدي ممتاز ولكن حنا نحب النفود والعايدي يبيلة سواق محترف لانة اذا غرز يالله يطلع . السقس عطية الله ان بغيتة في خط والا نفود وخذ سقس 24 ولا تاخذ 28 هذا من واقع تجربة 24 ددسن ويصبر والـ28 حساس وتذكر ترى النظافة اهم شي اهم شي لا يغرك الموديل هذا اللي عندي والله يوفقك |
اسمع كلام اخوك بدر العطاوي وما جاك عندي من غير قصور في الربع الباقين وترى المزادات فرصه من ناحية النظافه خصوصا الدفاع المدني |
اذا ابلك شوي لاتاخذ سقس لانه ثقيل اما العايدي خفيف ولايغثك لايرده لاطلعه ولا رمله اذا لاقاله سواق يده ورجله خفيفه معه |
بيض الله وجيهكم كل رجال باسمه الله لا يهينكم جميعا ويجعلها في موازين اعمالكم ...عز الله انكم نصحتوا والكفة واضحة بلا مقارنة للمرسدس والله يكتب الخيرة المباركة لنا ولكم ... |
الى الاخ الكريم بدر العطاوي والله انك كفيت ووفيت عز الله انك اصبت الهدف ونصيحتك اجزم انها طالعه من قلب محب ربي يحرمك عن النار اخوي تركي الله يدلك لكل خير ويطرحك في الوايت المبارك |
امين الله يرحم والدينك ولا يحرمك ياعبدالعزيز ومن يقراى من الدعوة والحمدلله على اني اصبت |
والله يا تركي ......... العطاوي عطاك العلم اللي ماوراه اللي تاقف عنده لكن وانا اخوك حسب راس مالك اسعار السكس موديل 80 اللى 85 تتراوح من 250 الى 300 يزود وينقص حسب النظافه العايدي 80الى 85 من 130 الى 220 حسب النظافه وانت حسب دراهمك اذا تقدرها خذ سقس واذا ما تقدر خذ عايدي واذا ما تقدر خذ عايدي اهم شئ مكينه وقير لاتا خذاللي مكينته23 خذ 24 وعادي التانكي مو مشكله راس ماله10الالف جديد بتلقى بـ110و120 100 والله يرزقك بس نصيحه اذا ما تقدر لا تشتري اصبر لين يفرجها ربك |
أرحب يا تركي ماعندي زود على كلام الأخوان المورسيدس البوز عادي والا سكس كلها نفس المواصفات لكن عليك بالسيارة التي على طبيعتها من الوكالة مافيها ترهيم ترى فيه سيارات موصله وهذه أحذر منها وعلى طاري السيارات عندي لك وايت بالمواصفات التالية 1- الموديل 79 2- جميع المتحركات شد الوكالة 3- له عندي خمسة وعشرون سنة 4- يسام بمائة وخمسون الف ريال والله يكتب لنا ولك الخير |
السلام عليكم اسمع ياطويل العمر الوايتات ماتسلم من الميكانيكي لاكن زي ما قالوا الربع خذلك مرسيدس عايدي نظيف علشان تسلم من الميكانيكي |
انا اشهد انه كفى ووفى وماقصروا الاخوان الباقين كل باسمه وجزاك الله كل خير اخوي عبدالعزيز على دعوتك ومشاركتك الله لا يهينك وجعل عمرك يطول.. اقتباس:
|
جعلك تسلم يا محمد و الله يجزاك كل خير...ابصبر ولا نيب حاط الا شي ما يوذيني بمشيئة الرحمن...والله يرزقنا واياك وكل مسلم... اقتباس:
|
جعل عمرك يطول يافهد ورحم الله والديك...ماقصرت الله لا يهينك ..وشراء الوايت اذا سمح الله امره دورتك الله يبارك لكم في حلالكم ومالكم... اقتباس:
|
جزاك الله خير يا سعود على النصح الطيب جعلك تسلم ... اقتباس:
|
ابن عمران لا نواك تشتري موتر دور على ابوشنب (سقس بوز سوبر 28 لطش موديل 81 82 83 ) وسلامتك يابن عمران |
الله يرحم والدينك وحق وواجب وماسوينا شي |
انا رايي مع اخوي بدر العطاوي اخذلك سكس يوم ودوووم |
السلام عليكم الاخوان فيهم البركه اخي خذ لك اما عايدي 24 ــــــــــ او سكس 28 ويكون مديلها من 79 حتى 84 وها يرجع حسب كثر ابلك وانتبه من الخياره لن ينكسر معك اثناء مقالب الوايت يمين ويسار مع النفود وانا ما استخدمت بس الشيبان عندنا يقلون كذا هذا ولكم تحيتي وتقديري |
| الساعة الآن 02 : 02 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |