|
عاجل ياهل الخبره بالضراب واللقاح السلام عليكم ورحمة الله وبركاته يالربع انا شريت لي ناقه على انها لقحه وراعيها شرط لقاحها والناقه طيبه وعدله بالحيل ومن يوم شريتها وهي تشاول وتبول اذا عرضتها على الفحل واليوم اضربت ناقه وبعد ماقام الفحل قرب من الناقه اللي اشتريتها على انها لقحه وشمها وقامت تشاول وحاول يطرحها وهجت حتى طرحها بالقوه واضربها وهي ترغي وضافه ذيلها وتبول سوئلي هل الناقه لقحه والالا مع العلم ان الفحل سنه رباع وانا اتصلت على راعيها اللي شريت منه يقول انها لقحه على الشرط ياليت تفيدوني في هالموضوع مع العلم اني ماعطيته قيمتها كامله وشكرا |
وعليكم السلام ورحمة الله وبركاته ياخوي عطا الله مهو كل ناقه تشاول لقحه بعض الابل تشاول من الخوف الله العالم ان ناقتك حايل لا نك تقول ان البعير كرفها وسنها(طردها) والبعير اعرف ويميز بين اللقحه والحايل ولاضربها الا هي حايل وهذا الي اعرفه والاخوان يفيدونك وهم اعرف مني |
نادر العتيبي;200221وعليكم السلام ورحمة الله وبركاته ياخوي عطا الله مهو كل ناقه تشاول لقحه بعض الابل تشاول من الخوف الله العالم ان ناقتك حايل لا نك تقول ان البعير كرفها وسنها(طردها) والبعير اعرف ويميز بين اللقحه والحايل ولاضربها الا هي حايل وهذا الي اعرفه والاخوان يفيدونك وهم اعرف مني انا مع راي اخوي نادر وحسب كلام الشيبان ان الفحل يكشف الناقه الحايل من اللقحه |
أخي يمكن الناقة معشش لأن المعشش تشاول لان الناقة المعشر ما ترغي ولا تبرك |
اخوي عطاالله عندي ناقه نفس حالة ناقتك تعشر وتوزر ويطرحها البعير والناقه انا شاريها يوم كشفنا عليها طلعت الناقه حايل وادخلنا عليها فيها وسخ |
الأخوه نادر وبدرومتعب وذياب اشكركم على ارائكم والنا شاك في وضع الناقه من يوم شريتها وراعيها شرط لقاحها واخبرته بفعل الجمل وقال بان بعض الفحول فيها سطاره لاهاجت ما تميزاحيانا بالرغم ان الفحل اضربها اكثر من مره اليوم والضاهر اني ابقطع الشك باليقين ومابعد الجمل برهان وجملي ماهو صغير سن وما تستوي قيمة اللقحه والحايل |
وعليكم السلام ورحمة الله وبركاته أخوي عطاالله إن كان ناقتك توها لاقح (معشر) ترى بعض الركاب يضرب الناقة على ريح العشار وإن شاء الله يفيدونك الاخوان الي ابخس مني |
ناقتك معشش |
الأخوه راشد وحمدان يعطيكم العافيه وانا ماطرحت ها الموضوع الا لأبرى ذمتي والتاكد من اهل الخبره والأستفاده من طرح الموضوع للنقاش والأخذ بصوت الأغلبيه |
ما قصروا الاخوان و الناقه حايل فقط والدليل ترغي حط لها ست تحاميل بالرحم ولكن ادخلها 15 ال عشرين سانتي ومن باجر ضربها تحمامل تنظيف |
السلام عليكم ورحمه الله وبركاته اعرض ناقتك علا بعير معيد ترا بعض البعارين يغشم ويضرب حتا المدني واللقحه حتا لحمتها تبين وباالتوفيق |
والله تحيرت مادري البعيربه سطاره والا الناقه معشش |
مرحبا أخوي عطاالله .. المعروف بأن البعير ما يضرب الناقة اللقحة ولكن حتى ما تظلم نفسك ولا تظلم الرجال اللي شريت الناقة منه أعرض الناقة على فحل ثاني غير فحلك ودور لك فحل سديس وما فوق حتى تقطع الشك باليقين . ولكم تقديري .. أبوعبدالرحمن |
مع اخوي احمد الفلاح في رايه لانه ومن خلال تجربتي عند جار لي فحل طرد ورى ناقة لي وهي لقحه ويالله انا فكيناها منه |
يا اخوانى ان قد اضربلى قعود لقحه |
والله انه حيرني اضرب ناقه مجسر قبلها بعشر دقايق ومن يوم شافها مطرفه عن البل كرفها لين بركها بالقوه حتى انه جرحها بانيبه جروح شديده واضربها ثم كرفها مره ثانيه واضربها ويالله افتكينها منه وعقب اضرابه طرفة عن البل وتطيرة واشوفها ماهي بشوفتها الأوله |
اقتباس:
أخي حتى لو أفترضنا أن الفحل جاهل ويضرب سطر .... الناقة لا يمكن ترغـــــــــــــــــــــي |
اقتباس:
أخي نواف حتى نستفيد ياليت توضح الطريقة بالتفصيل وهل تحتاج طبيب بيطري ولا بدون وشكراً لك |
الاخ / عطالله سلام من الله عليك وعلى الاخوان الموضوع ذوو شقين : 1-ممكن ان البعير مقرع من الضراب السنه الي طافت او كان عنده نوقات بسيطه ولذلك يضرب حتى المعاشير خاصه الي فاول عشارها. 2-ممكن الناقه معشش وفيها وصخ وتشوول على طول وتوزر . )))))) والحل يا عزيزي تعرضها على فحول اخرى وانا افضل انك تعرضها على الفحل الي هي معشر عليه ويتبين لك عشارها من غيره . ))))) واقرب الظن والله اعلم ناقتك معشر ولا ما كان رغت على البعير . وما شالله يا عطالله وش البعير الي هايج الحين انت من هل الجنوب ؟؟؟؟ او البعير كافووت ما تهيا كفته ولا تعتمد عليه في اخذ القرار لان همته زايده |
الأخوه اشكركم على مشارتكم وحياك الله اخوي ذيب بن علي وانا من اهل تبوك والفحول الطيبه عندنا اضربوها من اول سهيل وابشرك اضربنا تقريبا نصف البل والفحل انا شاريه بالصيف وهذا اولا اضراب له عندي والله اني شكيت في وضع البعير وادخلت عليه امس ناقه لقحه (متلي) وهو بالقيد والمدور قلت ابا اختبره وبغا يعضها ويطرحها ورديته عنها والفحل سنه رباع بس اتوقع انه مهدود في بل قليله او ماهد العام الله اعلم |
اقتباس:
السلام عليكم السلام على الجميع ورحمة الله وبركاته أخوي بعض الفحول إذا أبطت من الظراب ما توفر شي من البل حيل ولا لقاح وهذا حدث عند بعض الأخوان أما عن رغي الناقة أنا أقول لك رغي الناقة ليس بدليل على عدم القاح وهذا من واقع تجربة وليس مجرد كلام. أما شوري عليك خل الدكتور يعس لك رحم الناقة عن طريق ........... أكرمكم الله و يعطيك إن شاء الله تعالى العلم إلي إن شاء الله يسر خاطرك. أخوك / أبو عبداللطيف |
مرحبا اخوي عبالرحمن فعلا الرغى ماهو دليل على عدم لقاح |
القحه في الوضع الطبيعي ماترغي بس اذا شليتها بالونش او نوبها البعير مثلا لا بللله تررررررررررغي |
اقتباس:
|
اقتباس:
لو افترضنا ان الناقة لقحة وعس رحمها الدكتور هل فيه ضرر على ولدها الي بطنها |
الاخ عطاالله السلام عليكم ورحمة الله وبركاته يبدو ان الجميع ادلى بدلوه في هذا الموضوع واحب ان اللخص لك الحاله والحل : اولا ) انت لم تذكر لنا عمر اللقاح اي الناقه لقحه بكم شهر تقريبا؟ فان كانت من فوق الشهر السادس فالقاح يكون بين وظاهر في شكل المطيه ولا يحتاج لخبير في ذلك ثانيا ) الناقه المعشر ما يقربها اي بعير سواء قعود والا هرش وانما في بعض الحالات تجد بعض النياق يبرك للبعير طوعا وليس اكراها يعني ما يبركها البعير هي تبرك له ويضربها ولا ترغي وهذا لا يؤثر على لقاحها ثالثا ) الناقه اللي شايله بعش تجدها تشاول وتوزر ولكنها تنحاش من البعير وترغي في الغالب ولو ان الرغي ليس دليل كافي رابعا ) بالامكان ان تعرف اذا الناقه لقحه ام لا من بعض المؤشرات الخارجيه في جسم الناقه : - الناقه المعشر جلدها مرتخي بينما الحايل مشدود - الناقه المعشر تكون مقارديه و هديه وليست شرود كا الحايل - من عين الناقه (النظرات والبريق) تعرف اذا معشر والا لا وهذه تعرفها بالممارسه - وبرة الناقه الحايل تختلف عن اللقحه حيث الحايل وبرتها اكثر نظارة وبريق - سنام الحايل وتركيبة الشحوم يختلف عن اللقحه حيث الشحوم في الحايل تبداء بالنزول على الاجناب مع الوقت خامسا ) لقطع الشك باليقين بامكان البيطري او حتى انت ان تعرف اذا الناقه في بطنها حوار والا لا والطريقه تم ذكرها فيما سبق وهي ادخال اليد حتى الكوع في مدمن الناقه والتحسس براحة اليد بهدوء الى الاسفل فان كان هناك حوار سوف تلمسه بيدك وهو عادتا مايكون اعضائه الصلبه وهذه طريقة امنه ولا تصعد بالناقه ولكن عليك بالرفق وعدم الاستعجال او عسر الناقه سادسا ) ان كان هناك حوار فالحمد لله وان لم يكن هناك شيء فطريقة التنظيف هي كا التالي : - تنظيف عنق الرحم عن طريق ادخال اليد في حياء الناقه واخراج جميع ما بها من اوساخ - غسيل عنق الرحم بمحلول ملح فسيولوجي تجده بالصيدليه مرتين على الاقل - بعد ذلك اعطائها كورس مضاد حيوي لمدة اربع ايام لتطهير منطقة عنق الرحم وافضل ما استخدمت شخصيا هو نوع اسمه (جنتابريم) فهو فعال وبقوه للمنطقه التناسليه سابعا ) انتظر بعد ذلك لين تيسر الناقه واضربها والله الرزاق وتقبلوا تحياتي |
اقتباس:
|
- ا ومن عين الناقه (النظرات والبريق) تعرف اذا معشر والا لا تعرفها بالممارسه الاخ الغالي ابوعبدالعزيز شرح وافي وكافي وبيض الله وجهك ناتجه عن خبره واحتكاك لكن شدني هذي الفقرة من كلامك من عين الناقه اذا فيه توضيح اكثر فلا تبخل علينا واشكرك ,,,,, |
اقتباس:
|
اقتباس:
|
| الساعة الآن 11 : 08 AM بتوقيت مسقط |
Powered by vBulletin® Copyright ©2000 - 2025, Jelsoft Enterprises Ltd. Designed & TranZ By Almuhajir حماية ارشفة اشهار مؤسسة دعم فنى
جميع المشاركات المكتوبة تعبّر عن وجهة نظر كاتبها ... ولا تعبّر عن وجهة نظر إدارة المنتدى |