لعل هالليله تعدي على خير = من واحدٍ جر الحكي وابتلانا
خبلٍ يسولف دون منطق وتبرير = يالله من ظلم العباد تحمانا
مايدري انه يكبر ان قال يامطير =مير ان مدحنا بطيب والا هجانا
حنا مطير الله خلقنا مشاهـــيــــر=من جدنا الاول اليااخر نمانـــــــا
عشان هذا ماولد بينا صغيــــــر= ماينجبن الا المطنخ نســـــانــــا
رضيعنا اشرس من كليب والزير = وكبيرنا له بالمجـــــره مـــكـــانـــا
كلام جاهلنا كنوز ودنانيــــــــــر = وكلام عاقلنا عقــــود وضــمانــــا
حنا ترانا غير وفعالنا وغيـــــر = طلنا على كل الطوال ورقانا
حنا الكرام الطيبين المسافيــــر=عن ساقط العالم نكرم لحــــــانا
الصادقين الصاملين المناعير = حنا لميلات الزمان ارتكانا
يوم الضعوف يحسبون الماخسير= بعنا بسوق الطيبه وشتـــــرانــــا
لنا مع الامجاد ورد ومصادير = وما تمطر الا بالمكارم سمــــــانــا
نمشي بشرع الله عباده وتكبير = وفي هدي خير الانبياء اهتدانـــا
مافوقنا الا الله ولي المقادير = تبت يدين الي يبا مســـتوانـــــــا
نشوش للمعروف ونطول ونجير =ويامن بنا الخايف لامنه نصــانــا
ليا كسرنا وين للكسر تجبير = ونزيله الي مامشاء في هوانـــــا
ولله لو انا نبي نهمش بلير = لنهمشه ونحط واحد حــــدانــــــا
نعامل الطيب بحشمه وتقدير= ومن جالنا يبغا وفانا لقــــــانـــــا
نبطش ونعفي ونتفرد عن الغير = ماتلحق طوال الليالي مدانــــــــا
ابسط رجل فينا يعادل طوابير = وليا وقف يرهب جحافل عــدانـا
حنا ستر للمترفات الغنادير = لبشوتنا هيبه تكمل ذرانـــــــــا
تفخر بنا جل البكار المعاشير= وترعى بامان ٍ تحت فيّـة عصانا
تفخر بنا صفر الدلال المباهير =والعود الازرق ماشتهر لين جانا
تاريخنا ماهو كتابه طباشير =تمحى اساطير الزمن ماانمحانا
والحين جاي تذمنا ( ياعصيفير ) =ياصعب هوزتنا على من بـــغانا
بكره يجون منفخين المزامير= كم واحد يجيك يلهث ورانا
والمعذره لاصار فـ المدح تقصير =ما الحق مدى ربعي طوال اليمانا
ومن زعل من قولي عساه بزمهرير=ويعيش في باقي حياته مهانا
وبعض الليالي ماتعدي على خير =من واحدٍ جانا وبيّح خفانا

يالله بغيث من صدوق المخاييل = يبرق ويرعد بعدها ينتثر ماه
على ديار مطير سيله هماليل = غرب وجنوب وشرق والشام يلاه
ياخذ اسبوع من الليال المقابيل = اربع ليالي سيل والسبل فتلاه
سيله من الحره اليا اقصى الفحيحيل = سيله ثمان قرون مامر حلياه
واد الرمه من سيلها كنه النيل = سيل ردوم من المحيطات منشاه
والباطن المشهور من سيله يسيل = سيل يقض الضلع والصد يملاه
تذيع به لندن وكل المراسيل = وعبر محطات الفضا نسمع اصداه
من سيلها تنبت جميع المحاصيل = ويربع الصمان والطرش تنصاه
ويعج فالصمان ريح المشاتيل = لاريح كمبودي ولاريح جاواه
جوا عليل تطيب منه المعاليل = وعشب على مد النظر زان ممشاه
فالارض كن الورد وسط الاكاليل = من كل صنف ولون فالارض تلقاه
في مستوى نبته طرى وزماليل = روض مالذ وطاب للبل مشهاه
تصدح طيور بالغنا والمواويل = وتجلي هموم اللي زمانه تولاه
واللي على الركبي يهوبل هوابيل = حيزت له الدنيا على راس مفلاه
يتبع هواها ماجلس فالمداهيل = ون حان وقت الفرض كبر وصلاه
مايطربه ياكود شوف المباهيل = وشوف الربيع ونقوة البل ترعاه
روض وغدير ومجثوي والمعاميل = في جو هادي واخضر الرمث مركاه
في سفح تل تطيب فيه التعاليل = والكيف داير والسوالف منقاه
في دار لاجوال لافاكس لااميل = مرتاح بال ونايف الرجم يرقاه
والصيد ياهل الصيد فيها عرازيل = راع الولع فيها يبي يحصل مناه
ومن الفرح نشعل شموع القناديل = ويبان وجه المنتشي من محياه
وفي كل عام تسيل منه المساييل = على الرفيعه والي الخلق يقداه
ديرة زعيم مطير صاطي وحلحيل = فيصل حفيد الفيصلي لاعدمناه
حنا نعزك يارفيع المناويل =يانسل من تفعل يمينه وشلفاه
على شرفكم للمزايين تمثيل = نقوة نياق مطير وضح منقاه
وضح تحتهن وضح عفر مجاديل = في خايع ماتحدد العين قصياه
والشرف والعليا زهتها الهلاهيل = وتلقى البويضا فايمن الصلب وادناه
سنامها مزبور مليان ويميل = للخلف لاشفته تهولك مزاياه
فجحا رجول وطول قصيره الذيل = شولا يدين وخف الصغر حلاه
الراس جثل وله براطم مهاديل = وطول رقبة مع خد العرض يزهاه
بين الكتوف وركها وسع يهيل = ومرفوع غاربها وممتد لعلاه
وفخذ جلاله والعضود المفاتيل = ميزه تميز زينها لاوصفناه
وبنات عبدان السبايا مشاويل = خيار النياق المكرمات المسواه
للإبل قيمة عند كل الموابيل = لكن عند مطير كالصوم وقضاه
للإبل عند مطير حشمه وتبجيل = هم اهلها يوم السنين المسماه
حامينها بكروش خيل زرافيل = ويغلونها يوم التعب والمعاناه
حامينها يوم الخطر والقلاقيل = بسيف شطير وكم راس جدعناه
الذود مايقناه ناس مباديل =الذود عز لشغاميم تقناه
ونقف ونسترجع زمان الاطاليل = يوم علم الطيب بالسيف حشناه
لاندفع العاني ولانقبل الميل = ولافيه ند ياهل العرف نخشاه
حريبنا منا يشوف البهاذيل = نعطيه درس طول عمره ماينساه
حنا هل الردات قوم الغرابيل = نغربل اللي غرته فزت خطاه
اليا اختلط عج الرمك واقبل الليل = هيبه مطير تزلزل جموع وكماه
يحمسون الخيل تصهل تصاهيل = على الملاحم والمطارد مضراه
الله اكبر قولهم والتهاليل = من بعدها كل تعزوي بحسناه
الويل ثم الويل والويل والويل = للي يعاندنا وحنا نويناه
وقت النتا نكتال ونزود الكيل = تاريخنا في سفح الامجاد تلقاه
لو حرفوا كل التواريخ تظليل = تاريخنا معروف فخر وحفظناه
شجعان مافينا ردي واخر حليل =يقودنا شيخ تعزوي بجوزاه
شيخ يهابونه زحول الرياجيل = مضت عقود وباقين فعل يمناه
ون كانها بالجود ذباحت الحيل = ماينشدون الضيف من وين ملفاه
تلقى مجالسنا بها البن والهيل = وعلم من الاجداد غانم ورثناه
مكملين الواجبه خير تكميل = شيوخنا اللي تبذل المال والجاه
هذا ترى موجز وباق التفاصيل = نحتاج وقت نعدد اللي فعلناه
واللي يخالفني يسوق المعاديل = والله لعلق ناطق الكذب فجماه
واليوم ربي بدل الوضع تبديل = وعم الامان بنعمة من عطاياه
في ظل حكام كماة حلاحيل = في حكمهم شفنا العدل والمساواه
في حكم ابو متعب رفيع المنازيل = قايد يحب الشعب والشعب يفداه
يكفيه فخر انه منع أي تقبيل = ليديه ياطيبه وياطيب مبداه
ويالله ياللي منزل الحق تنزيل = احفظ لنا ال سعود والدار تحماه
من قلب مخلص للرجال المشاكيل = وعهد ولا لأخوان نوره قطعناه
وصلوا عدد ماغرد البلابيل = على الرسول الي صدق وتبعناه

يامرحبا يامطير في ديرة مطير = في ديار علوى مرحباً بالقبيلة
يامرحبا باللي لفونا مسايير = ترحيبتن في كاسين النفيله
عيد الفطر قفى وجاء واحدن غير = وشوف النشامي عيد ثاني مثيله
مطير من بين القبايل المشاهير = اللابه اللي يكسبون الجميله
حمر النواظر بالملاقي مناعير = رجالهم لاقام حل الثقيله
هم تاج راسي مبعدين المشاوير = وحريبهم من همهم عزتيله
حتى لو انه من وراء ظلم والنير = اليا لقاله واحدن يشتكيله
يقول همي متعبين المظاهير = اهل المواقف والامها الاصيله
واللي مايصير غصبن لنا لازم يصير = حنا مطير ومثلنا ينعنيله
حنا مطير نصخر القوم تصخير =نركي على كبد المادي فتيله
حنا هل الردات مافيه تزوير = يشهد لنا التاريخ فوق الكحيله
وكل القبائل والنعم دون تقصير = وكلن على طيبه يحصل حصيله
في ظل حكامن تهز الطوابير = ام وامان وخير واضح دليله
وباسم الدويش اقولها وربي مطير = باسم الدويش الفيصلي والقبيله
نجدد البيعه ونعلن بتبرير = في كف عبد الله سيوف صقيله
حنا معه نمشي على الشر والخير = يمين ابو متعب منجي ادخيله
ومشكور يامن حط عرض المغاتير = حطه مابين ابكارها والجليله
العرض صاير بين دق ومعاشير = عرض ينومس ياعرب من يجيله
وضحن مثل زين البني الغنادير = مثل الهنوف اللي هدبها ضليله
حسن ماطاوع مكثرين الاشاوير = من شان ربعه راقين بالطويله
صعد على القمه كما سالم الزير = ودفع من جيبه والمزاين يبيله
يبي مثل حسن زبون المخاسير = ومزاين المطران هو مرتكيله
ومشكور يامن بان وقت المعاسير = وفعلك ينومس يالمطيري قبيله
وفواز مرخص غاليات الدنانير = كريم سبلا والفعايل جزيله
ويامرحبا يامطير في ديرة مطير = ترحيبيتن في كاسبين النفيله
ويامرحبا باللي لفونا مسايير = بديار علوى مرحبن بالقبيله
وختامها مني تحيه وتقدير = لاهل الكرم واهل الفعول الجميله

احمد الله اشكره ساق المطيعه = راعي المدات خلاق البرايا
لاح برق الخير في سحب وليعه = واستهلت وامطرت سيل هنايا
واكتسا الصمان من نبت الطبيعه = ولبس ثوب العيد ماجن الضحايا
واحمدالله واشكره مضفي الشريعه = يوم عم الخير سجينا المطايا
ومرحبا بمطير في حفل الرفيعه = عند شيخ مطير زيزوم السرايا
شيخنا فيصل ولد بندر نطيعه = شيخ حمران النواظر والدهايا
شار في حفل المزاين وتشجيعه = وقاد سلم الحفل من حسن النوايا
ثم تبنا الحفل ابو فهد جميعه = ولد عمار الجبيل اجزل عطايا
ياحسن فعلك كبير وتستطيعه = والكبار كبار من رب السمايا
ولا نسيت الشيخ فواز البتيعه = راعي الطالات حماي الونايا
عاشوا الشيخان هبوا بالطليعه = قدموا جزل الجوايز والهدايا
الرجال الوافيه تدفع سريعه =بالتسابق والتعاون هالوفايا
في مقر الحفل وقفات شجيعه =وبذلوا مجهود يشكر لاخفايا
فعلهم ممتاز ويداهم صنيعه =تصنع المعروف في شتا النحايا
كل شيخ جاب مقدوره وديعه = واكتمل جزل العطا بين الثرايا
وجيبت الذيدان بالارض الرتيعه = مثل طرش مطير ماشفنا حلايا
وصفها ممتاز واشكال بديعه = مع جمال المنطقة صارت سوايا
الرقاب طوال وخشوم هنيعه = والبراطم ضافيه هدل دلايا
مع ظخامة روسها مسح القبيعه = واللحايا سهاف وطوال عرايا
والغوارب ناسعه سند تليعه = والنحور اوساع وعضود ملايا
والجنوب اعراض ودفوق متيعه = والوبر مثل الحلق عقده حوايا
والسنام اخلاف وردوف وسيعه = والذيول اقصار وصغار الوطايا
زينة العرقوب هزعاء مانبيعه = محتمينه يوم دقلات السبايا
كم وقيعه جات من بعد الوقيعه = عند حرش اثفانها ايام خلايا
سقت وصف الطرش لمحات سريعه = في عجاله عابره سارت سرايا
والصلاة اختام مافنا نذيعه = عد ماسارت على البيدا الراعايا

ابدا سلام عد من زوار ويطوف = سلام احلى من رشاش المخيله
سلام لها الدار واللي به ضيوف = واخص به فيصل زعيم القبيلة
امير حمران النواظر ومعروف = الفيصلي نعم اللقب والفصيله
ابن الدويش اللي له الطيب معسوف = معسوف في ظلة وعنده مقيلة
زعيم قوم الها طوابير وصفوق = بيمانهم حدب السيوف الصقيله
يصغر تحتها كل عاصي وملقوف = وقوم تحاربها تعود ذليله
من الحجاز الى الحفر وايمن الجوف = وديارهم تبقا عريضه طويله
وان عل هتان المطر كل شفشوف = واسقا العروق وكل شعب وتميله
ترعاه قطعان المغاتير وتحوف = عشب زهار يضان نجد العليله
وبحفلنا الليله تماثيل وحروف = فيها المعاني بالعلوم الجزيله
واهل الابل بالحفل حضار ووقوف = كل يعرض ابله ويجني حصيله
وفيصل حفيد اللي على الباس موصوف = يوم الشتات ويوم ركض الاصيله
من سيفه الصمان تا من من الخوف = ان كان سالت سيله عقب سيله
شيخ الاخوان وشيخ ربعه ومولوف = وسيف الامام وراعين للفضيله
الضيغمي سيف تقدابه سيوف = والهرج يكفي عن كثيره قليله
يشدي سهيل ليا بدا منه عاصوف = واقوا من القطب الشمالي دليله
ويالله ياسامع دعا كل ملهوف = الا من عن ربنا لاتزيله
واحفظ بلدنا عن سبب كل صادوف = ماخاب من يرجي وربه وكيله
وتمت بذكر اللي له الغيب مكشوف = على النبي ماطاف يوم وليله

قالوا متشارك قلت حاظر وشارك = مادام راسي ماغدت به هبوبه
حنا مطير اهل النقا والمعارك = ياكم من شيخا حمنا ذنوبه
يوم السنين الاولى والمعارك = يوم الولد يذل من ضل ثوبه
واليوم يامقصر طول حبالك = في ضل من ناره توقت شبوبه
نعاهد السعود عن كل ذلك = دستورنا القوران يوم اعتزوابه
ومهتال بالارهاب ويش هالمسالك = يابى العش مار العشى من جنوبه
ريمتها مابين عمك وخالك = خواك شيطانك وختم دروبه
شارك في روحك وغالي حلالك = واصبح دوبه كل ماتحوش دوبه
الرجع لدين الحق وطيب فالك = وتصير نفسك للكريم محبوبه
هاذي نصيحة لاتيتم عيالك = اقولها باليوم تسعين نوبه
ومن بعدهه عندي جواب لسؤالك = البل تراه بالحياه محبوبه
ولنجات عفرء ياعساه تبارك = تمشي تهزع بنت شيخ مخطوبه
عزي لحالي ثم عزي المحالك = يعرظلها الخطاب ماهي بصوبه
فيها من المزن المجزي ممالك = يوم يترادف ثم تمسك نصوبه
جرد الرقاب سهيفات المحالك = رثم الخشوم من الطبوع معروبه
سناد بالغارب وعرقوب بارك = وذيل شبر ونصف دوبه ودوبه
عشر واحد زود شبر لشمالك = من الورك الى المنكب حقيقه حكوبه
سنامها لردوفها تقل جالك = فج العظود لاتصير محظوبه
حرشا وبرها من الكداد امتمالك = شوك الكداد اللي جديده قلوبه
في مشتراها لاتغالا ريالك = اطوه طيت مومنين وطوبه
قالو متشارك قلت حاظر وشارك = مادام راسي ماغدت به هبوبه

سلام ياشيوخن بنو بيت لمطير = بيتين من الامجاد ماهو بخيمه
مقدم هل الردات يوم الطوابير = يوم الرسن ولجمالها والشكيمه
وسلام مني يالوجيه المسافير = اهل الدعم واللي ملب العزيمه
سلام احلى من حليب المصاغير = واحلى من ال سكر على در ريمه
وبعد سلام اسمعو ياجماهير = البل وهلها كاسبين الغنيمه
والبل خلقها الله فاحسن تصاوير = ومفضله قبل الجبال العظيمه
والبل ضحاياها ارقاب المشاهير = يوم السنين الاولات القديمه
لياء ثناء الخيال قدم المضاهير = وكلن على ماقيل شاهد خصيمه
والبل غداء للخيل يوم المداهير = ومنها تتغذى الخيل ماهي ظليمه
والبل ركوب الناس قبل ا لسيياير = تمشي سهال الارض والا عتيمه
والبل مدايد بالليل المعاسير = تلقا اهلها من رغد في نعيمه
والبل منايح يوم لوذ المساعير = يوم الزمان يضد راع الغنيمه
والبل عزوا الطيبين المناعير = من حبها عند النفوس الكريمه
والبل علاها يتعبون المداوير = والبل موصلت النديم النديمه
والبل عبسها يشقر الراس تشقير = قبل الصابون وصبغته والكريمه
والبل برها ينسجنه عنادير = يوم البجاد فن اليد السليمه
والبل غنايم لابسين المقازير = يوم الظروف القاسيات الاليمه
والبل تجر اغروب من جمه البير = وتسق الزروع اليابسات الصريمه
هاذي فوايدها ومنها تباشير = تجلى مرض بعض القلوب المهيمه
وان كان فيها ماتقول الشواعير = عساء المعاني والمشاعير عقيمه
وانا صخرت القاف فيها صواخير = شين يجيبه مقطعه من جحيمه
البيرجمه والمعاني مسامير = والمعرفه بالوصف ماهي وهيمه
حنا لها ومتهين الاباكير = ونفوسنا يم المعاني هميمه
ومعنا من القطعان ماهي مع الغير = بنات عبدان الزيان الحشيمه
طوال الرقاب اللتي تشوق النواظير = حنا حفظناها ولاهي عديمه
صفرن على صوت الموده مغاوير = لالا عها صوت الموده حطيمه
تندا على الجيان بعد المصادير = البل عليمه والشواهد عليمه
ومعنا مجاهيمن ومعنا مغاتير = وارقابها تلمع علاهها الوسيمه
فج النحور اسناد هزع المواخير = اللي قراها واصلن حدتيمه
اللي علاها ماوفرنا المخاسير = والصبر مفتاح القفول الصخيمه
وشعلن اطوال رقاب حضبن مزابير = غنيمتن ياويها من غنيمه
وحمرن بعالي نجد بيض المناحير = والوانها تشبه اللون الاديمه
هاذي وصايف ماملكنا من ابعير = حامينها وضد حضه هزيمه
حامينها بمصقلات البواتير = اللي تعزل الروس ماهي ثليمه
ومن حيد مالاح لحيا يمه اندير = ونرعابها الرجعان والديار ريمه
مايقطفن الا الزهر والنواوير = ولعدودها تارد ولاهي محميه
على الطوال اللي علاها النواعير = ماجاتنا بحب خشمن واشيمه
صفوا جوائز وحط الدنانير = العز عز وبرده الحض ضيمه
لاترخصون اذوادكم بالمصارير = لو البحر يركب عميمه لطيمه
وامن السلف يم الخلف منهج السير = خلها على ماقيل تبقاء امقيمه
وارزق عند الله عليهم الاسارير = اللي خلق خلقه ويسمع رنيمه
ويالله بنون من مزونن بواكير = عسى على الاوطان ينهل ديمه
يركم اخياله والرعد له زوافير = وسيله يذب من الفياض الخريمه
عساه من الحره ليا جال خرخير = ومن شرقها لاغربها للكظيمه
وعساء على الجيان والصلب ويحير = حيث انها مرتع ولاهي وخيمه
ويسق النفوذ الهالكه والعثامير = ويحيي القشوع اليابسات الهشيمه
ادعو معي حيث ادعاء يجلب الخير = انه يغيث الارض من كل غيمه
لين البدو ماتطري اعلاف وشعير = الا نبات الروض يلاعب نسيمه
من مد جودك غيثهم بالتياسير = يامحيين كل العظام الرميمه
يالواحد الفرد الصمد رازق الطير = يارافعا عيسى وموسى كليمه
والمعذره ان كان فالوصف تقصير = ياهل الاراء واهل العقول الحكيمه
هذا حسب عرفي كتبته بتقرير = مني يقدم للرجال الفهيمه

جهزت جيبي واظهرت التقارير = حاضر على المرواح مافيه رده
امن الكويت الجيب يقطع مشاوير = جيب يحد ولاية احد يحده
ناوٍ على الصمان ويالله التياسير = يازين جيانه ويازين خده
الشوق جاذبني لربعن مسافير = الا بتي مخفي غلات المودة
قاطع ادروبن مارسلت المعاذير = ماهمني ناسٍ تحضن المخده
همي وشوقي شوف ربعن مناعير = اللي لوازمها لزومٍ تسده
وقم ياقصيدي قم في محفل مطير = في محفل المطران مالك مصده
قم نظم الافكار من دون تقصير = واللي يجيك ابخاطرك لاترده
شاعرك مايذخر عن مطير تعبير = الا بته حبل المعاني يمده
وسلام يامير تسلسل من امير = لبن الدويش ازكى سلام لغده
يالفيصلي ياعقب واف التباشير = ياعب كسار الضروس المحده
ياعقب من خلفه تسير الطوابير = كم فارس في سلة السيف قده
هذا الدويش اللي يحل المعاسير = فيصل ولد بندر سمي لجده
وبنات فكري وردن كنهن طير = وانا القنوص وطير شعري اهده
هديتهن واهديتهن للمغاتير = هاك الوضح كنهن واخيامن مشده
وضحن حموها يوم وقت المخاطير = يوم انها من بين هده ورده
حامينها من دونها نشبع الطير = ياويل من حنا هكا اليوم صنده
هذي عطاي الله وهن كلهن خير = ادري بهن ماهن علي مستجده
امن الفجر مغباش لي حزه عصير = 90 كيلوا حاضره مستعده
الراس صندوقن يفوق التصاوير = وارتابهن وارقابهن مستمده
ولا السنام المنفهق شكله يثير = عزي لمن عينه كشوف وتلده
طوال الغوارب مقفيناتن مدابير = مثل الخيام بسهله مجرهده
وصلاة ربي عد وبل الشخاتير = عداد مطرات الغيوم المسده

1- الأعلامي الحميدي المريبيط - مجلة المختلف .
2 - الأعلامي عبدالله حمير القحطاني - مجلة المتميزون ومجلة ليلة خميس .
3 - الأعلامي تركي المريخي - صحيفة شمس ومجلة مرايا .
4- الأعلامي سعد القباني السهلي - مجلة الأبل العربية .
5 - الأعلامي عبدالله البرازي السهلي - مجلة الأبل العربية .
6 - الأعلامي منصور بن مروي الشاطري - مجلة الأبل العربية .
7 - الأعلامي سعد السبيعي - مجلة الأبل .
8- الأعلامي سلطان القريفه - مجلة قطوف .
9 - الأعلامي سعد بن يوسف الحميداني - مجلة اليمامة .
10 - الأعلامي فريح العقيلي - مجلة مرايا .
11- الأعلامي فهــد الثبيتي - مجلة البواسل .
12- الأعلامي محمد الميموني - مجلة نخبة المختلف .
13- الأعلامي زيد بن غيام - الأذاعة الكويتية .
14- الأعلامي حمد السحيمي - موقع مزاين ومجلة الأبل.
15 - الأعلامي محمد الشــلاّحي - موقع قبيلة مطير .
16- الأعلامي عايض الوسمي - صحيفة المدينة .
17 - الأعلامي عارف العظيله - صحيفة عكاظ .

1 - موقع قبيلة مطير .
2 - موقع مــزاين .
3 - منتدى وطني .
4- منتدى مجلة نجدية .
5- منتديات مزاين .
6 - منتدى مطير التاريخي .
7 - سـاحات قبيلة مطير .
8 - منتدى الصمّــان .
9 - ملتقى قبيلة مطير .
10 - منتدى قبيلة مطير .
11 - ملتقى القبائل .
12- منتدى مهد الذهب .
13- منتدى الحمادين .
14- منتدى الصعران .
15- منتدى الشباشره .
16- منتدى النفيسه .
17- منتدى الهويملات

مركز فديو الحســـام
الفحيحيـــل - مقابل البنك الوطني - شارع مكه - عمارة قيس الغانم
دولة الكــــويت
هاتف : ( 3911356 ) الجوال ( 6477441 ) بندر الشمري .

والموزعون بالمملكة العربية السعودية :

بعنيزه : مكتب المطيري - هاتف (063634461 ) جوال (0505175505 ) .

بالرس : مكتب الطبيعه - طريق المدينة المنوره - هاتف (063334914 ) - جــوال (0506151120) عيسى الحربي .

بالرياض : بيت الجنادرية - العريجاء .
بالرياض : بيت الجنادرية - النسيم .
بالرياض : كوكب الشعراء - الخليج .
بجده : بيت الجنادرية .
بالطائف : بيت الجنادرية .

وسنوافيكم لاحقاً بإذن الله تعالى بعناوينهم وهواتفهم .

مركز فديـــو الحســــام
الفحيحيــل - مقابل البنك والوطني - شارع مكه - عمارة قيس الغانم
دولة الكــــويت
هاتف :( 3911356 )
الجوال : ( 6477441 ) بندر الشمري .

والموزعون بالمملكة العربية السعودية :

بعنيزه : مكتب المطيري - هاتف (063634461 ) جوال (0505175505 ) .

بالرس : مكتب الطبيعه - طريق المدينة المنوره- هاتف (063334914 ) - جــوال (0506151120) عيسى الحربي .

بالرياض : بيت الجنادرية - العريجاء .
بالرياض : بيت الجنادرية - النسيم .
بالرياض : كوكب الشعراء - الخليج .
بجده : بيت الجنادرية .
بالطائف : بيت الجنادرية .

وسنوافيكم لاحقاً بإذن الله تعالى بعناوينهم وهواتفهم .