وش الحل بالناقه اللي راحت عينها بيضاء(وضحه)

[بدر الذيابي]

السلام عليكم ورحمة الله وبركاته


اسعد الله جميع اعضاء المنتدى الرائع



يالربع انا ابي فزعتكم (ولاخاب من نخاء الطيبين)

عندي ناقه صفراء لقحه يوم ضوت امس والا عينها بيضاء وتدمع وتبرق على الشمس ولاتشوف الا اذا قربت يدي منها وشوفها ضعيف
ولادري وش السبب قلت يمكن انه ضفاره ورحت للبيطري وعطاني مرهم وابره فيتامين
وحطيت المرهم والابره ماعطيتها قلت لازم اشوف الشباب بالمنتدى والقاء عندهم الخبر اليقين

وابي فزعتكم يالربع اذا كانت ضفاره وش افضل علاج؟؟؟

واذا كان غير ذالك ردو لنا خبر تكفووووووووووووووووووووووووووون

[عبد الله بن مسعدبن مطلق الجعيد]

اذا كانت ظفاره فالامربسيط بأذن الله تطيب ادخل اصبعك في خشم الناقه وبتحصل مثل الغضروف بارز اضغط عليه باصبعك لين تكسره ويطلع منه دم وان ماتعرف استفزع من يعرف وهذا افضل علاج بأذن الله

[سامر الحربي]

مع اخووي عبدالله بن مسعد ..


ومجرب ونافع باذن الله


والله يشفي ناقتك ويبارك لك فيها ..

[راشد المطيوعي]

مع الاخوان وغسل عينها بماء مع شكر يبرد ويعالج بذن الله

[مبارك المري]

الامر ان شاء الله بسيط

فاما انك تستمر على المرهم اللي عطاك الطبيب واعتقد انه مضاد حيوي

او انك تكويها مطرق صغير فوق جفن العين المصابة

وبتشفى باذن الله

[عايض بن خجيم]

الناقه انشالله انها سليمه على حسب كلامك مادام العين موجوده يعني ماهضمت داخل وهاذي احتمال تكون مطروفه وبتسلم انشالله حتى لو ماعالجتها.

[عبدالرحمن عبدالعزيز]

السلام عليكم ورحمة الله وبركاته

اخوي الناقه ان شاء الله انها طيبه ولو استخدمت ابرة الفيتامينات لكان افضل اما المرهم ففي غالب الظن انه مضاد حيوي كما ذكر الاخ مبارك وعليك الاستمرار فيه لان المضاد من اهم الاشياء فيه ليعمل هو الاستمرار لكامل المدة الموصى بها لاستخدامه
واذا تبي تركيبه لقطرة العين علمني ارسلها لك على الخاص وشكرا

وتقبلوا تحياتي

[بدر الذيابي]

عبدالله الجعيد
سامر الحربي
راشد المطبوعي
مبارك المري
عايض ابن خجيم
عبدالرحمن عبدالعزيز





الله يوفقكم ويرحم والديكم ويجزاكم الله خير على فزعتكم


الناقه استمريت برشها بالماء البارد الصبح

والعصر بالمرهم وابشركم الناقه طابت
وهذا بسبب فزعة النشاما شرواكم