مطلوب مشاركه الجميع ماهو افضل سن لهداد البعير

[عبدالله العلي]

السلام عليكم ورحمة الله وبركاته

اخواني جميعاً ماهو افضل وقت لسن البعير للهداد هل هو وهو اذا تم سنه جذع او اذا تم ثني او اذا دخل جذع وهل هو يختلف البعير في انتاجه في اول هداد له عن ثاني هداد او مستقبلاُ حسب بعض مقوله بعض اهل الابل الشيبان .

ارجو من الجميع المشاركه وابداء الراي لتعم الفائده على الجميع ويستفيد الجميع


اخوكم ........... عبدالله

[خالد العرجاني]

مرحبا بك يا اخي عبدالله وموضوعك طيب والله يطول بعمرك على طاعتة
وانا من وجهة نظري انه اذا جا القعود سنة جذع يفكة في اللبل ويظرب
لان الطيب الي ساسة طيب ماعليه خوف اكيد ان طرحة اذا الله بارك بيكون طيب
لان الجذع نسبة لقاحة اكبر من نسبة لقاح الثني وربك هو الي يبارك
واكرر الله يبيض وجهك على هذا الموضوع الطيب

[عيدالمنصورى]

مع الاخ خالد العرجاني

[عبدالله العلي]

السلام عليكم اخوي خالد ومشكور على مرورك الكريم وابدا رايك اخوي ومشكور اخوي على دعواتك ... ولاكن فيه ناس يقلون كل مايتاخر ضراب القعود افضل له والشي الثاني يقولون الاولين ان القعود يزين طرحه كل مايكبر بالعمر وهذا كان مقصدي ....؟؟؟

...........................................


هلا اخوي عيد والله اسعدني مرورك والله يجزاك خير انت والجميع ..


.................................................


اخوكم ......................... عبدالله

[وليد بن إجليغم]

وهل إذا هديت الجذع يقف طوله أو مايضره؟

[راشد المطيوعي]

احسن هدد القعود الثاني والجذع عده حاشي ولو القح ماي يلقه الا ثلاث او اربع وخطر معاد يلقح احسن الثاني

[علي ال مرعي]

هداد الجذع يغضره خاصه القعود الزين اللي يصير عليه زحمة اضراب ويكون نصف اضرابه مافيه لقاح فهذا يضره الهداد بدون فايده اما اذا كان هداده في ابل قليله ويكون اخر وقت الهداد هذا مايغضره((يغضره يعني يضر على نموه)).

[راشد الغريري]

و عليكم السلام ورحمة الله وبركاته

الاخ عبدالله العلي:بيض الله وجهك على هذا الموضوع الجيد.

اما بنسبه للفحل اذا كان جذع ودك انه يفك في البل يضرب ثلاث او اربع للتعليم وعلشان مايغضره والافضل انه يترك حتى يصيرثني

اما بنسبه للانتاج معروف انه كل سنه افضل من سنه

وشكراً

[محمد علي الهدفه]

مع الاخ راشد الغريري

[محمد بن شريه المطيري]

بسم الله الرحمن الرحيم


موضوع ستحق الشكر عليه

اما بالنسبه للموضوع فالأخوان ما قصرو

بالنسبه للفحل وان كان جذع انه يأثر عليه او يوقف طوله او يكسره فهاذا غير صحيح

لانه ضراب الجذع اضمن باللقاح من الثني كما قال الأوليه عنه ( الجذع لذع = الثني وني )اما اذا كان رباع فهو افضل ضراب من الجذع والثني

اما بالنسبه اللأنتاج فهذا شي من الله حصل عند بعض الناس واضن معروفين ان البعير اول جوله له افشلت

والثانيه فشلت وتعدل انتاجه في الثالثه هذي حالات نادره ماهو شي اكيد لانه البعير ممكن يحذف من انتاجه على امهاته

ويصيب ويخطي في الأنتاج وممكن العكس اول جوله له طيبه والباقي فاشلات

بالنسبه لضرر البعير من الضراب وخاصه في الوقت هذا ان يضرب وطبنه كبير ما ضمر ولا هاج

فهذا يسبب للفحل تغلصات في البطن قد تأدي الي عقم البعير او موته

او تكسيب الأبل قبل مدت 40 يوم ( الأنه الناقه في هذا الوقت تكون ماهي نضيفه وضرابها قد يأذي البعير )


واايد الأخ راشد في باقي كلامه

[سالم المحميد]

الأخ : عبدالله العلي



موضوعـك في قمة الأمتياز وتشكر على طـرح هذا الموضوع

أما بالنسبه لــسن البعـير ماهو الأفضل فالهداد فالناقـه أتقول لراعـيها يوم قال راعيها

وش تبيني أهد عليش من ذالركاب ؟

قالـت له:

الجذع: لذع أيلا تلاحق مانفع
والثني: وني أيلا تلاحق ضفني
والرباع: رباع يلقح مابين السما والقاع

والسديس: سديس يلقح حتى أبليس
وأكثر الناس يؤايد بهد الثني

وسلالالالالالامتك


وتشـكر أخوي الغالي على طـرح هذا الموضوع

[عبدالله العلي]

السلام عليكم ورحمة الله وبركاته على الجميع

واشكركم جميعاً على المشاركه بالموضوع لتعم الفائده على الجميع انشاء الله

والله لايهينكم على كل المجهود والمشاركه ,

اخوكم ................... عبدالله

[عبدالرحمن عبدالعزيز]

الأخ عبدالله
السلام عليكم ورحمة الله وبركاته

يسرني أن أشارك في الرد على تساؤلكم بما يلي :
1)تحديد سن القعود الجذع وهو الأربع سنوات تحديدا مهم وليس كما هو منتشر عند الكثير من الناس بأن القعود يجذع بطلوع سهيل أي في شهر (9) إفرنجي حتى وان كان مولود بشهر 3 إفرنجي حيث جعل الكثير من الناس سهيل هو التاريخ وهذا خطاء شائع وقد استخدمته البادية قديما للكثير من الأسباب وأهمها خروج الصيف والشديد والترحال وضراب الإبل
2)في سن الأربع سنوات تكتمل الأعضاء التناسلية لدى البعير وتكون حيواناته المنوية مخصبه
3)الحيوانات المنوية للجذع تحمل نفس الصفات الوراثية التي ستكون عليها عندما يكون سديس أو حتى هرش وإنما الذي سيختلف هو قوتها ونسبة الإخصاب فقط وهذه سهله ومقدور السيطرة عليها بالتغذية
4)قديما كان الكثير من الناس يؤجل هدد البعير لكي يزيد نموه وذلك لقلة الموارد الغذائية ويرغبون في توجيه ما يأكله لبناء جسمه وليس في التضريب أما اليوم فبجانب المواد الغذائية هناك العديد من محفزات النمو والعلائق المركبة التي تساعد في ذلك
5)الكثير من الناس لا يكثر من الضراب في أول هدد البعير والسبب عدم رؤيته للإنتاج وهذا تجده حتى لدى أصحاب الفحول المشهورة وليس لان البعير يكون عاجز أو يكسر عظمه كما نسمع

وعليه أللخص الرد فيما يلي:
القعود التام لأربع سنوات يكون جاهز للتضريب

وتقبلوا تحياتي

[عبدالله العلي]

السلام عليكم اخوي عبدالرحمن

والله ياخوي انت كفيت ووفيت وانا عاجز عن شكري لك وعلى تفصيلك للموضوع وهذا يرجع بالنفع للجميع انشاء الله وانا طرحت الموضوع لاخذ رائي الجميع وكل يعطي رئيه في الموضوع للاسفتاده والله يرحم شيبانك وشيباني ويجعلهم الجنه والمسلمين اجمعياً ..

اخوك ..................... عبدالله

[عبدالرحمن عبدالعزيز]

جزاك الله خير يا اخوي عبدالله

[مبارك المري]

مع كلام الاخ عبدالرحمن عبدالعزيز

[عبدالله العلي]

حياك الله اخوي مبارك واشكرك على المشاركه بالموضوع ,, وجزاكم الله الف خير ,,

اخوكم ,,, عبدالله

[مبارك الرمالي]

الاخ عبدالله العلي

مشكووور على الموضوع المفيد قبل ان يكون مميز

ومستشارنا الاداري كفى ووفى

بووجود الاعلاف ماينقص على نمو القعوود الجذع
والحيونااات المنوية الموجودة في الجذع نفسهالموجودة في الهرش لاتتغير بشئ

انما التغير في نسبة اللقاح هل يلحق على الناقة او لا

تقبل مرروري

[مشعل بن فهد]

موضوع طيب وردود متميزه

[محيميد الرشيدي]

الخوان ماقصرو ولاكن من وجهة نضري ان احسن سن لضراب الفحل الجذع عشان يتعلم الضراب واليا جاء ثنو مايتعبك اما بالانتاج كل زمان طرحه ازين من اللي قبله والبعير يستمر زينه اليين يشق نابه واذا شق نابه وقف زين البعير وزين انتاجه (وجهة نضر )

[بخيت البريدي]

كفيتو ووفيتو بيض الله وجيهكم

[تركي بن عبدالعزيز]

انا مع الاخ عبدالرحمن العبدالعزيز مادامك تكرمه بالشعير والبرسيم مايضره ان شاء لله

[حسن الحويماني]

الــــــــــــــــــــــــــــجذع لذع

[عبدالله العلي]

السلام عليكم ورحمة الله وبركاته

اشكر الجميع على ابدا الراي في الموضوع ونعم فيه ناس ترى ان القعود اذا هو صحته طيبه وسنه جزع ولاكن في بعض القعدان يكون لقاحه ضعيف ام ان يكون نموه ضعيف او اكله ماهو زين والله هو اعلم ,,, والثني ضعيف لقاحه اذا كثرت عليه الابل وافضل هداد يحبونه اكثر الناس اذا كان سنه رباع ويكون انتاجه والله هو اعلم افضل من وهو جزع او ثني لاني والله شفت قعدان كثيره واشكالها متفاوته واصولها متفاوته وبعض منها انتج انتاج قوي والبعض ردي شوي في اول بطنه له ولاكن في البطنه الثالثه طلع افضل من الاولى والثانيه كلهم وتحسن انتاجه كثير وسبحان الله هو اعلم بكل شي في تركيبه الجينات للابل ,,,

اشكر الجميع على المداخله بالموضع وبانتظار اصحاب التجارب السابقه في الفحول وكيف تحسن الانتاج في الجزع اوالثني اوالرباع ,,



اخوكم ,,,, عبدالله