ضعف حال شديد

[علي فيصل البقمي]

مساء الخير لجميع أعضاء مزاين وعساكم دائماً مجتمعين على المعزه والطاعه
لدي ثلاث بكار ضعفت حوالهن بالحيل فجأه وفيهن انتفاخ بين الديد والسر
وبعضهن ماعاد يستطعم مع البل وهن كانن من أحسن البكار حال
عطيتهن حبوب الديدان ولانفع والشراب الفرنسي ولا نفع
ولهن على هالحال حول الشهر ونصف؟ وش الراى لاهنتوا.

[راشد المطيوعي]

ياخوي كثر عليهن الشعير وشوار وخف الرودس ولا تعطيهن جت لن الجت حار ويتعب الحاشي في الحر وبذن الله يتعافن

[علي فيصل البقمي]

شكراً ياراشد
طعامها دائم شعيرمجروش و شوار وكثيرررررر والبل كلها تزود
لكن المشكله هالثلاث البكار علما ان البل تسرح ومكانها في نفود وتشبع عبل.

[محمد آل سويلم]

اذا الانتفاخ ( ترهل ) يعني اذا لمسته بيدك تلقاه ( طري ) فهي مرحلة متأخره من ( الهيام ) وعلاجه الابره الهنديه ( الحمرا ) ان شاء الله

[ظافر ال شداد]

اخوي هاذي اعراض الهيام واذا تبي تتئكد شف عيونها اذاهي تدمع واجد هاذا الهيام وعلاجه من واقع تجربه ابرة الهيام الفرنسيه في اللحم وابرة الدود وكرر الجرعه بعد شهرونص وعطها فيتامين
ابشرك كان عندي ناقه وجاها مثل ماقلت انتفاخ خلف السره وتطورت المرحله انتفاخ في النحر والحمدلله عالجتها مثل ماقال اخوي عيدالمنصوري الله يجزاه خير والحمدلله الناقه تحسنت وبدت تسمن والحمدلله والشكرلله
الله يشفي ابلك وابل جميع المسلمين

[خالد سيف السيف]

الخطوه الاولى : اعزل البكار .

الخطوه الثانيه : تأكيد من تشخيص المرض عن طريق أهل الطب والمعرفه .

الخطوة الثالثه : أعطائهن العلاج المناسب .

نتمنى لهن الشفاء من عند الله اولاً واخيراً

[عيدالمنصورى]

اعطهن ابرة هيام وبعدها ابر جرب واي مضاد حيوي بودر لمدة ثلاث الى خمس ايام

[علي فيصل البقمي]

الله لايهين الجميع وبيض الله وجيهكم
حسب البيطري انتفاخ الهيام مايجي خلاف السره وتشخيصه يقول ان المرض دوود والانتفاخ عباره عن ترهل

[سامر الحربي]

والله اعلم انه الهلاع

دواه ابرة الجرب .. والله يشفيها ويبارك لك فيها ..

اخووي علي هل لاحظت عليها انها تاكل الرمل او تتجضع على جنبها ..

[علي فيصل البقمي]

لاهنت ياسامر
نعم تتسدح اوتتجضع على جنبها ولكن اكل الرمل ماأظن

[سامر الحربي]

مرحبا بك اخووي علي

هذي الحاله مرت علينا .. وعطينها ابرة جرب امريكيه تحت الجلد ..

مره وحده وطابت بإذن الله والحمدلله ..

والمرض هذا عباره عن دود ..

وماجاء عندنا الا في البكار ,, النياق الكبار ماجاها شيء والحمدلله .. وعرفنا السبب انه من التبن ..

والله يشفيها ويبارك لك فيها ويبارك لك في حلالك ..

[سعد بن براهيم الخالدي]

الله يشفيها انشاء الله وانا مع الاخ ظافر الدوسرى

[علي فيصل البقمي]

الأخوة الكرام
البكره اصيبت بحالة ذراق شديده (يكرم الجميع) من يومين واعتقد انه سلاق ومن لديه نصيحه لايبخل علينا ولاهنتوا جميعاً.

[نواف الحربي]

السلام عليكم

يمكن الشويكة

تأكد من دمنها اذا هو مدبب فيها شويكة

[علي فيصل البقمي]

البكره ماتت من يومين والله يعوض باطيب منها وشكراً للجميع على تجاوبهم

[سامر الحربي]

فاديه ان شاء الله ,, والله يعوضك باخير منها ..


والله يبارك لك في حلالك ..

[نواف الحربي]

الله يعوضك بخير منها

[بخيت البريدي]

اخوي الغالي تأكد اهل الخبره اتحمال ل