وشرايكم بالضراب الحين متاخر ولا زين

[عبدالعزيز المحمد]

مساكم الله بالخير ,
وعساها جمعة مباركة
يالربع عندي السنة ابل حيل وانا محتار اضربها الحين ولا صار متاخر
يعني ضراب هالوقت حيرانه الحول شتويات ولا صيافا ؟؟؟؟؟؟
ولا اخرها الى الصفري الجاي
وشرايكم يالربع
بالعلم انها ابل غوالي وعلى فحول طيبة وندور الحيران الشتوية الوافية انشالله اذا الله وفق
وسلامتكم

[راشد ال لزيز العجمي]

الا اضربهن ولا انت بخسران شي ان لقحت ولا هي حايل والله يرزقهن القاح

[سامر الحربي]

مع اخوي راشد مانت بخسران شيئ

والله يبارك لك

[عبدالعزيز المحمد]

مرحبا يالربع
كيف حالكم ,
الله لا يهينكم ولا يصغركم
الي اقصده ان الحيران شهر 4 ميلادي صيافا ولا لا
الحوار الصيفي يالربع دايمن صغير ولا ينفع
هذا الي انا اقصده ولا الشتوي ما مثله
والي اسئل عنه هل الضراب الحين للحول اذا الله راد صيافا ولا شتوية
وتسلمون

[فيصل بن مرخان]

الاخ عبد العزيز
الان صيافا
والصفري شتويه
وانصحك استنى لان الصيف اقشر على الحوار من ناحيت الحراره والحليب
ولاكن الصيفي اذا دار الحول يكون وافي واجرد

[عبدالعزيز المحمد]

ارحب يا فيصل
ولاهنت على الرد
لكن الربع يقولون الى الحين والناس تضرب ويقولون باقي عندك شهرين
والله اني محتار ياخوك

[محمد بن شريه المطيري]

حياك الله يا عبدالعزيز

لا بالله ضرب ولا عليك الناس كلها اتضرب لي اليوم ولغايت شهر قدام
رجاها معشر ولا رجاها حايل وفي بعض الابل ما اتعاشر الي اذا دخل علينا الحر

السنه هذي جه برد ماهو بسيط والأبل تكاسرت منه وبعضهم ما تعاشرن
مواليد الوقت هذا لا يعتبرن صيفيات مثل ما انت متصور
لانه الليل والضحي برد
والبعارين ما افدرت لي هالحين ضرب ورجها من الله خير

[علي ال مرعي]

لابالله الا اضربها وحنا الحمدالله في رخا يعني الشتا له ذرا والصيف له ضلال والماء وافر والرضاعات موجوده واللقاح ابرك من الحيال مليون مره.

[حاتم العماري]

اضربها وعيالها باذن الله نسميها (حياضيات) /ماهي صيفيات
لانها تشرب الماء وهي صغيره ولا فيه حر شديد يضرها باذن الله
الحياضي طيب ويكبر بسرعه
وفقك الله

[بدر العازمي]

مايضر ان شاء الله
عليك بالضراب احسن من الحيال للناقة

[عبدالمحسن المقاطي]

لا بالله ضرب البل

لاتحيل عليك بس

[عبدالعزيز المحمد]

يالله حيهم
الله لا يهين كلن باسمه
يالربع اناودي اخرها الى الصفري
لكن الصفري ما تياسر البل بسرعة
والزمول ما تهيج بسرعة

[فهد الأحمد]

لابالله الا اضربها وحنا الحمدالله في رخا يعني الشتا له ذرا والصيف له ضلال والماء وافر والرضاعات موجوده واللقاح ابرك من الحيال مليون مره.


أتفق مع أخوي علي وبشدة
أبرك من الحيال وأنا أخوك