الحوار في ورطة !!!!!!

[عبدالعزيز المحمد]

:D:Dصبحكم الله بالخير
يالربع البارحة ولدت عندنا ناقة ومات حوارها وبعده قمت وسحبته وجبنا حوار ناقتن ثانية عمره شهر وحطينها عليه سبايا الحوار وبلمنا خشمها عشان مايرغي وفقرناله المهم وحطيناه في شبك الحاله وجبنا الناقة عنده وخليناهم الحالهم (بالعلم ان الناقة ماشافت حوارها الميت ) لكن ماركبته ولا رامت عليه ويوم اصبحنا فكيت الحوار وارضعته منها من وشالها وبعده رديته هو وياها للشبك ام الحوار الاصلي المشكلة ان ام الحوار الاصلية عافته الصبح مع انها بغت تكسر الشبوك يوم شلناه في الليل وهي طبعها ماتداني على حوارها والله انها ماامست لين رسغناها يدها في الارض لكن المشكلة ان حوراها يوم جاها الصبح تبيه لكن الحوار كان موالف الجديدة وراضعن منها وهذي الجديدة مارامته ولا تبيه وصار الحوار يتيم هذي تطرده بقوة والجديدة ماتطرده لكن ما تدر ولا تعطف ولا هي فيها لبن واجد
بس مدري ام الحوار مستنكرة حوارة ولا وش القصة
وش الحل
بغيت اضيرها قالولي خلها 3 ايام
وفكرت اضير امه الاصلية
القصد كله ابي الحوار يرضع من الثنتين
والحين افلس منها كلها ....هههههههه شر البلية مايضحك
وسلامة الجميع

[محمد مطير العنزي]

اخ عبدالعزيز والله قصتك غريبة جدااا
خصوصا ان الحوار مع امة وهي تبية ليش تسحبة منهااااا لكن ننتظر مشارك الاخوة الكرام اكيد ان شاء الله بيفيدونك

[عيدالمنصورى]

صحيح مشكله
اذا لم تعطف عليها احداها اعتقد مالك الا الضيار ولكن المحاوله مع امه الاصليه اجدى

[حمد محمد المري]

أقعد بها يالفيلسوف كان خليت الحوار مع أمه وتعوذت من ابليس وخليته يرضع من امه وبتكفيه
لكن مالك اللا واحد من امرين
1- اتخليه مع الناقه اللي مات حوارها 3 أيام فالشبك وانشاء الله اتعطف عليه ولا تستعجل. أذا ماعطفت
2- ظير أمه عليه.

[فيصل بن مرخان]

اتوقع ان ريحت الحوار الي ميت راكبته عشان كذا ماتبيه امه (ما عرفته) اتوقع اذا ان الثنتين بترضعه لاكن اصبر

[بدر العازمي]

اتخليه مع الناقه اللي مات حوارها 3 أيام فالشبك وانشاء الله اتعطف عليه ولا تستعجل
وبالنسبة لامه الاصلية يمكن شمة ريحة الحوار اللي ميت وعافته
والطريقة الاخيرة انك تظيره على امه....
والله الموفق,,,

[عبدالعزيز المحمد]

بيض الله وجيهكم
لكن هذا ماهوب الحل الي ابي منكم انتو مطلوب منكم اكثر


(أقعد بها يالفيلسوف كان خليت الحوار مع أمه وتعوذت من ابليس وخليته يرضع من امه وبتكفيه )
شكرا ياحميد على الاسلوب الطيب

[محمد مطير العنزي]

يا طويل العمر ضير امة علية ..........هذا هو الحل الوحيد
وذا ناقتك اللي مات ولدها فيهااا حليب اشتر لك حوار من السوق وضيرة الناقة علية
وسلامتك يا ابو سعود

[منصور بن محروت الوائلي]

والله راعي الحوار بورطة مو الحوار


اذا ما رامن الناقتين ما لك الا التضيير

و غريب الناقة ما درت على حوارها المفروض الناقة تعرف حوارها من صوته

الله يعينك

[حمد محمد المري]

انت راعي دجاج وش عرفك بالبل جعلك افداها ياعبدالعزيز المحمد لكن وش انقول عزالله انها ابتلت البل

[عبدالعزيز المحمد]

افاااااااااااااااااااااااااااااااااااااااااااااااا ااااااااااااااااا ماهوب العشم يالمري
ان كان هذا هو اقصاك ومداك فتارك مسموح ومعذور والله يبيح منك ولا تزعل انا عادي ماهمني ولا التفت لذي الامور
انا راع دجاج راعي حمام الي هو
ابد ماهنا الا العوافي وعط عمرك الراحة وانا كان ذا يرضيك فقل الي عندك والله لو تكلم منا الى بكرة تراك مسموح لا تخلي كلمة في خاطرك
ومثل ماقال المثل الرجل مادام ساكت جبل ان تكلم بان ما وراه وعسى لا يحدنا على اقصانا يا حمد
وابشرك الدعوى عوافي حوار وما حوار لو تجيني ذبحتلك اياه ولا تزعل والي انت قلته وغلطت فيه اعتبر نفسك ماقلت شي ومسموح
وابيك تدقق في كلامي اذا فيه شي لا تسامحني وابشر بالي تبيه
ترى اكتب لك هالكلام واناضحك واقول الموضوع مايسوى هالكتابة كلها لكن تقديرا لك ولاني شفت حساس ومهمتم به
والسلام عليكم ورحمة الله وبركاته

[عبدالعزيز المحمد]

ارحب يابومطير
هلابك وغلا الشغلة كلها الحوار بغيته يرضع من ثنتين
اما الغير فامه بتركبه انشالله لاني عزلته هووياها واشوفها اليوم اشوى لكن عادها مادرت
ارحب يامنصور
تسلم على المرور وابشرك الورطة مابه ورطة واناخوك كلها سهالات وان شفناها ماضبطت الشغلة خلينا السوداني يحطه ثلاجة
ولا وشرايك

تسلمون عالمرور

[حمد محمد المري]

(شكرا ياحميد على الاسلوب الطيب)

أعرف اشلون تكتب أسامي الرياجيل اول شي وبعدين انا قلت فيلسوف وانا صادق انت اتبعت فلسفة جديده.

وماعندي لك اللا المثل اللي يقول (على غير أهلها ما تجيب راس مالها)

[محمد مطير العنزي]

يا اخوان يا كرام الاخ حمد المري والاخ عبدالعزيز المحمد
ترا السالفة بسيطة وانتم اخوان والاخوان يصير بينهم مزح وزعل لكن بسرعة يروح وعساكم ع القوة

[حمد محمد المري]

يقويك يابو مطير وابشر طال عمرك مافيه اللا كل علم طيب

[محمد مطير العنزي]

يطول عمرك يا المري ولا هنت علي هالنفس الطيبة انا وانت وجميع الاعضاء هنا بالموقع نستفيد من بعض وناخذ علوم بعض وكل منا يكمل الثاني .

[عبدالعزيز المحمد]

(شكرا ياحميد على الاسلوب الطيب)

أعرف اشلون تكتب أسامي الرياجيل اول شي وبعدين انا قلت فيلسوف وانا صادق انت اتبعت فلسفة جديده.

وماعندي لك اللا المثل اللي يقول (على غير أهلها ما تجيب راس مالها)


ياحمد ترا من يدور النشب يلقاه واناخوك انا ما جا مني الا العلم الغانم اسوق لك الكلمة الطيبة واحدك عليها وانت تحدني على امور ثانية
اما اسامي الرجاجيل فنعرفها ونعرف الرجاجيل وتعرفنا وانا اقولك شكرا على الاسلوب الطيب وش تبي اكثر يعني زعلتك حمد وجميد ياخوي انا غلطت بالكتابة ولا انتبهت ولا حسبت انك بتزعل ولا توقعت ان فيه رجال يزعله حرف واعتذرت منك وعذرتك في نفس الوقت وسبقتك على العذر في وقت كان انت لازم تكون انت الي تسبقني وفوق هذا جيتك وقلت لك تبيه ابشربه قلي وش ماسويته وعلى ما تشهد الرجال ولا انت لاعتذرت ولا سويت شي منها الا غلطت ونزلت مستوى نفسك وطحت من عيني
يا حمد نصيحة لله انت تحسب ان الرجال الي تحشم نفسها وتحشم غيرها ماتقدر اترد ولا تغلط لاوالله لكن هذي بهانس ما تلتفتلها الرجال ولا يلتفلها الا الضعيف
ياحمد انت واناخوك ارضاك كايد وحنا ماحنا بعاجزين نجيب علوم ماتصلح ولو بغينا جبنا شي ماطرا على البال لكن ماهيب كذا انا الي ابيك اتعرفه قدر الرجال اذا قدروك واعرف ان هذا كله احترام لك ولا ماهوب غصب ولا احد جابرنا
اما مثلك فمع احترامي لك ماله سنع وحنا ماجينا نردد امثال ولا كان لازم تجيب مثل كان قلت احسن لك بيت الشعر الي يقول
اذا انت ااكرمت الكريم ملكته @@@ واذا اكرمت اللئيم تمردا .............. وانشالله انك كريم وترضى
والي اقوله يالاجودي ترا ما جرى منا قصور رضيت مرحبا ومسهلا وانا مارضيت فالشكوى على الله
والمهم ما يلحقني ملامة من اخواينا والرجال الحاضرين
والسلام ختام

[عبدالعزيز المحمد]

يامحمد انا مانيب زعلان لاني ماغلطت ولا يزعل الا الردي
وحمد الله يهديه زعلان وهو الي غلط والحين نحاول نرضيه
ولا يحتاج يبومطير توصية ارقا سنود اخوان والدعوى سهالات

[خالد العرجاني]

يا الربع خير خير انا طالبكم يا حمد انت وعبدالعزيز لا تطورون السالفة غلطات مطبعية وسلامتكم وكلكم ربع واخوان وكل واحد طيبة معروف وانتو من الرجال الي محسوب عليهم وحنا في هذا المنتدى الطيب نستفيد من خبرت كل واحد ربي عطاه اياة وحنا ناخذ منكم العلوم الطيبة واللة يصلح مابين كل المسلمين وسلمتكم يا اطوال الاعمار

[منصور بن محروت الوائلي]

المهم وش صار على الحوار؟

[شجاع عمر الأكلبي]

أرحبوا يارجال



يالله حي هل البل ترى العلوم الطريّة اللي يحبونها الرجال ماتلقى إلا عند هل البل 0 وتعوذوا من الشيطان لا تتركون له مدخل بينكم كلكم أكبر من هذه الأمور 0؟


ختاما ترى ماحصل إلا الزين والله إن ودي إنكم تسيّرون علي يالربع كلكم قولوا تم والله إنه أبرك الساعات


وتراني طالبكم ماعاد تناقشون فيما مضى جعل الدنيا فداكم 0

[حاصل اليامي]

مع الاخ شجاع....
وانت يا راعي الناقة اذا كان الجديدة توقف على الحوار وتخليه يرضع فهي بترامه بس اصبر عليها ثلاث ايام وان شاء الله ترامه
اما بالنسبة لأمه الاصلية فخلها معه هو والناقة الثانية في الشبك وان كانها عرفته في ذا الثلاثة الأيام والأ ضيرها عليه .
الطريقة الثانية مثل ما قال العنزي وسلامتك[/size]

[عبدالعزيز المحمد]

ارحب ياخالد مرحبا ومسهلا
وابد طلبتك على العين والراس وابشر والامر بسيط واعيد واكرر انا ماني بزعلان ولانيب نادم لاني ماجا غلط ينقدني عندكم وانت والاخوان الي شرواك وشروا المتواجدين هم والله الي نحسب على مشاريهم وابد غالي والطلب رخيص وتمون يابوالوليد

[عبدالعزيز المحمد]

ارحب ياشجاع
يامال الغناة سباق للعلوم الغانمة وانتو اهلها وجعل من ارثك الجنة وعزيمتك ذي تسوى شي واجد
والله لايهينك ولا يصغرك اخو غالي وعزيز والله العظيم ولاهو قصور من النشاما انت والي مثلك نحسب على مشاريهم ونداري خطرهم ولا والله لاحصل منا خطا حسب معرفتي
والله لايهينكم جميع والموضوع انتها وبيض الله وجيهكم واسمحولي والله ماودي ان الشي يعطا اكبر من حجمه لكن رغبة "حمد" المري عسى الله يهديه