لأهل الخبره

[بالود العتيبي]

السلام عليكم ورحمة الله وبركاته
يالربع عندي خلفة ما تداني احد يقرب لها اجيب لها خبز وهي مع البل تجمع علي
الا هي أقرب منها تروح عني ...
والحين حاط فيها قيد وكل ما جيت أحلبها بالقوة قامت ترغي وتطرش وتوسخ ملابسي
حاولت فيها اكثر من مرة ,,, ولكن عجزت حاولت أطبعها لكن مافيه فائدة منها

اللي يخبر لناء احد يطبعها ولا خبره منه يمكن يتعدل حالها

[محمد أبو الجدايل]

ودها المحالب عند السوادنه

ويطبعونها في أسبوع ..

[شجاع عمر الأكلبي]

اذا بتبيعها انا زبونها اذاها سليمة من العيوب غير النحاسة


انتظرك

[حمد بن عيران القريني]

بعد التحية
اذا حليبها يكفي ولدها فلا تطبعها واذا اكثر من ولدها فخطمها ولا ابهلتها اربطها في أي شيء رفيع واثفنها وتهدأ بس يمكن ترغي

[طلال الروقي]

خل نسمك طووووووووووويل يابلود ,,,
عندي خلفة العام قعد القيد فيها 4 شهور
وانا اتعافر انا وياها ,,
وهالحين احلبها بدون قيد وهدية

قيد الناقة وقصر القيد .
وخل معك عصا واذا ردت راسها علاك
تصيد لخشمها وعطها وحده بالعصا بس بإتقان
عند ردت الراس بس ..
لا تضربها في جنوبها وتكثر الضرب .

الطريقة هذي نجحت معي

[حسين عبدالهادي]

بعد التحيـة .. ردها في الشبك واهتم فيها خلها توالفك .. ترا بعض الابل ما تهدا الا بالموالف .. وخل فيها قيد ولا تحرص بالحيل على حلبها .. وصدقني مجرد ما توالفك راح تهدا لابعد الحدود .. وموفق خير

[فايز بن محمد]

خل نسمك طووووووووووويل يابلود ,,,
عندي خلفة العام قعد القيد فيها 4 شهور
وانا اتعافر انا وياها ,,
وهالحين احلبها بدون قيد وهدية

قيد الناقة وقصر القيد .
وخل معك عصا واذا ردت راسها علاك
تصيد لخشمها وعطها وحده بالعصا بس بإتقان
عند ردت الراس بس ..
لا تضربها في جنوبها وتكثر الضرب .

الطريقة هذي نجحت معي

ي سلاااام كلام 100%

هذي طريقتنا في تطبيع العجور من يوم الله خلقنا وفي الأخير تهدأ بس طووول بالك وادخل معها وهادها

ياما وياما سويناها وهدت الناقه .......

[مشعل الشويش]

الامر بسيط مثل ماتفضل طلال
والولف له دور احرص على التطويع بالولف وخل الحزم والضرب حل اخير
علما ان المطيه ودك تصخرها عشان تطيع ولكن ودك ماتضربها ابدا