عندي قعود جاته حرده عقب شل الفزعه

[عايض جابر العتيبي]

السلام عليكم ورحمة الله وبركاته


اخواني انا عندي قعود حق جاته حرده يقوم يرفع ايده ويحذفها واذا درهم زادت معه

والمشكله جاته عقب ما شالته دنه و عقلو ايد القعود

والقعود ما صارله اسبوع وابي فزعتكم بالقعود الغالي

وكل الشكر للجميع

[سعد الذويب]

القعود اشبكه واكوه عمود من يمين الركبه ويسارها وانفذه من فوق الركبه ويسلم انشاءالله

[عايض جابر العتيبي]

الله يجزاك خير يا سعد لاكن كيف انفذه من فوق الركبه ما فهمت قصدك

[محمد ابو عدوة]

مرحباً يأبو جابر والحرده اللي نعرفه مالها علاج تكوي وتتعبه وتراوالك انه أشلا لكن هي هي ماتغير ولايضره بأمر الله من الحرده .

[حسين عبدالهادي]

صباح الخير .. واحد من الجماعه جاته الحردة في بكرته .. قام وعزلها في شبك ضيق لمدة شهرين.. وقام يعطيها حلبه .. وبعدها فكها مع امهاتها .. وما شاء الله عليها ما ازين من مشيتها .. والحرده راحت ..

[سعد الذويب]

النفذ طال عمرك تاخذلك ابره فيها خيط وتجي من فوق الركبه تسحب الجلد وتخلي الخيط وحركه من شان يضهر الدم وسلامتك

[محمد ابو عدوة]

مرحباً اخوي حسين اللي تقصده التفدع او الحرده

[حسين عبدالهادي]

يا مراحب لا اخوي اقصد الحردة ..

[عايض جابر العتيبي]

الله يجزاكم خير ولا تخلونا يا اخوان نبي شخص مجرب الله يعطيكم العافيه

[عايض جابر العتيبي]

للرفع

[محمد الوهبي التميمي]

مساء الخير للجميع
الحرد لا يذكر له علاج لا كوي ولا بيطري
وبكل الأحوال لاضرر ولاتعيقه من شي غير الشديد
والقعود دربه بالقيد وأنسى موضوع الحرد
أتمنى أني قدمة فائده للموضوع
تقبل مروري

[عايض جابر العتيبي]

اخوي محمد القعود ايده اللي يحرد منها توجعع اذا وقف ما يرتكي عليها الحين الحرده ما عندي مشكله منها لاكن ايده توجعه