الونـــــــــــــــــش

[محمد مطير العنزي]

السلام عليكم ورحمة الله وبركاتة يا اخوان عندي سؤال هل للونش تأثير في تحميل الابل وهل هناك خطر علي شيل الناقة المتلية
(قريب الولادة)عن طريق الونش ونا سمعت ان مرض الذيبة سببة الرئيسي تحمل الابل عن طريق الونش
وسلامتكم

[محمد الراشد]

مرحبا اخوي محمد
نعم فبه تاثير اذا كثر التحميل للمطيه خاصه اذا كانت سمين
اما المتلي اذا كانت قريب يستحسن الشل بعد الولاده
ملاحظه : اذا نويت تشيل مطيه الافضل ان تخليها من الاكل والشرب يوم او يوم ونصف (تجوعها)
تفادياً للاخطار

[فهد صالح السعود]

عطاك العلم اخوي محمد الراشد

[عبدالمحسن المقاطي]

نعم فبه تاثير اذا كثر التحميل

[حمد السحيمي]

ابو مطر

حسب ما سمعت من هل البل

ان من اسباب مرض الذيبه هو الشيل بالونش .


تحياتي

[محمد علي الهدفه]

تاثير وبس منه قطع النصيب


الذيبه + قلب العصب + الوهان + وغيره وغيره

نصيحه لاتحملها

[منصور بن محروت الوائلي]

نصيحه لاتحملها




اجل شلون يحملها

فيه طريقه ثانيه؟؟

[محمد علي الهدفه]

اجل شلون يحملها

فيه طريقه ثانيه؟؟

مادري والله

اكيد فيه بدايل

[خالد عبدالله السبيعي]

السلام عليكم ورحمة الله

مثل ما قالوا الاخوان

يسبب كثير من الأخطار والأمراض مثل الذيبه + قلب العصب + الوهان

واذا كانت مثل ما ذكرت متلي وقريبة الولاد قد تصعد الناقة وتحذف ولدها

ولكن اذا كان ولابد من التحميل يجـــــــــــــــب

تجويعها لمدة يومين ولا تشرب الماء أيضا ويكون التحميل بطريقة سليمة

والله هو الواقي

تحيااااااااااااتي

[طالب راشد المري]

ضرر الشل متعدي للمتلي وغيرها ولو كانت المتلي اكثر ويتزايد الخطر عندما يكون الفقار رخو ويسبب الوهان واللي الله حافظه مايجيه شي

[ناصر نايف الكريزي]

نعم لها تأثير كبير جدآ
ولا نزيد على كلام الاخوان

[راشد العرق]

السلام عليكم ورحمة الله وبركاته

التحميل مخاطره كثيره وتزداد عندما تطول مده الرفع اوتكون السبت دقيقه وكل ما تكون السبته متينه يكون ضررها اقل اذا كان موضع السبته صحيح

الاخ منصور
نعم فيه طرق ماهي طريقه وحده بس

اجل من اول كيف كانو البدو يحملون جلبهم للسوق

ا/ الطريقه الاولى : اربعه شالو جمل والجمل ماشالهم وتحتاج الى اربعة رجال اقوياء (ولازم يكونون الرجال فيهم قوه ونشاط واقواهم يكونون عند المقدم لانه الاثقل) يرفعونها من الارض واذا ركبو موخرها في السياره يتساعدون ويدفونها ويكون واحد منهم ماسك الذيل ويسحبها في السياره ولتسهيل العمليه يفضل ان يحفر للكفرات الخلفيه لكي تكون السياره واطيه قدر المستطاع
2/ الطريقه الثانيه: تنوخ المطيه في مكان مرتفع يكون ارفع من السياره( مثل طعس او ماشابه) وتقرب السياره حتى يسهل سحب االمطيه في السياره

وسلامتكم

[محسن حمد المري]

السلام عليكم

نعم هنـــاك ضــرر من الــونــش ولــكــن إذا كــان الــونش هــايدرلك ماهو مــكره

يقــال ان الــضــرر اقــل ولكن في كل الحالات يجــب ان تــكون الــنــاقة ماهي بــطــيــن

يعــنــي قــبــل الــتــحــمــيــل لا تــشــرب ولا تــاكــل لــمدة 12 ساعة

[راشدالمري]

مثل ماقالوا الاخوان
والشل بالونش مايحد عليه رخى
وضرره على البعير الفحل اشد واشد

[منصور بن محروت الوائلي]

اذا كانت الناقة متلي ممكن يموت حوارها وتموت هي لا سمح الله

ولكن مافي الا هالطريقه

كلام الاخ راشد على عيني وراسي

لكن اذا بغيت تنقل فحل ولا عششر نياق من يقدر يشيلهن؟؟


وحنا مظطرين والله المستعان

وشكرا